Psalms 89

¹Ke tlaa opela ka ga mautlwelobotlhoko a ga Jehofa ka bosakhutleng; ka molomo wa me ke tlaa itsise boikanngo jwa gago mo tshikatshikeng tsotlhe.

²Gonne ke rile: Boutlwelobotlhoko bo tlaa agela ruri ka bosakhutleng; boikanngo jwa gago o tlaa bo tlhomamisa le mo magodimong tota.

³“Ke golaganye le moitshenkedwi wa me ke ikanetse Dafite motlhanka wa me.

⁴Ka re: ‘Losika lwa gago ke tlaa lo tlhomamisa ka bosakhutleng, ke tlaa agela ruri setulo sa gago sa bogosi, go ya ditshikeng tsotlhe fela.’ ” Sela.

⁵Magodimo a tlaa baka dikgakgamatso tsa gago, Jehofa; boikanngo jwa gago le jone mo phuthegong ya baitshepi.

⁶Gonne, e ka nna mang mo maaping yo o ka tshwantshiwang le Jehofa? E mang mo go bomorwa bathata yo o tshwanang le Jehofa?

⁷E le Modimo o o boitshegang thata mo lekgotleng la baitshepi; e le o o nang le go sisimogwa bogolo go botlhe ba ba o dikanyeditseng?

⁸Jehofa Modimo wa masomosomo, ana ke mang yo o leng mothata jaaka wena, wena Jehofa? O bile o dikanyeditswe ke boikanngo jwa gago.

⁹O a tle o buse boikgodiso jwa lewatle; e re dintelo tsa lone di rwalelesega o di didimatse.

¹⁰O thubagantse Rahabe, jaaka mongwe yo o bolailweng; o gasagasitse baba ba gago ka letsogo la thata ya gago.

¹¹Magodimo ke a gago, lefatshe le lone ke la gago; lobopo o lo theile le botlalo jwa lone.

¹²Ke wena o tlhodileng botsheka le borwa; Tabore le Heremone di itumela mo ineng la gago.

¹³O na le letsogo le le thata thata; seatla sa gago se thata, seatla sa gago se se siameng se goletsegile.

¹⁴Tshiamiso le katlholo ke motheo wa setulo sa gago sa bogosi; boutlwelobotlhoko bo eteletse sefatlhogo sa gago pele bo na le boammaaruri.

¹⁵Go sego batho ba ba itseng tumo e, ya boitumelo; ba bo ba tsamaya mo leseding la sefatlhogo sa gago, Jehofa.

¹⁶Ba tlhola letsatsi lotlhe ba itumela mo ineng la gago; ba golediwa mo tshiamong ya gago.

¹⁷Gonne o kgalalelo ya thata ya bone, lonaka lwa rona lo tlaa golediwa mo tlhogonolofatsong ya gago.

¹⁸Gonne thebe ya rona ke ya ga Jehofa; le kgosi ya rona ke ya Moitshepi wa Iseraele.

¹⁹Gape o kile wa bua le baitshepi ba gago mo ponatshegelong, wa re: “Ke beile thuso mo go mongwe yo o thata thata; ke goleditse mongwe yo o itshenketsweng mo bathong.

²⁰Ke bonye Dafite motlhanka wa me; ke mo tloditse ka lookwane lwa me lo lo boitshepo.

²¹Ke yo seatla sa me se tlaa tlhomamang mo go ene; letsogo la me le lone le tlaa mo thatafatsa.

²²Mmaba ga a ketla a mo tseela sepe ka patiko; le fa e le morwa boikepo ga a ketla a mo tlhokofatsa.

²³Ke tlaa thubaganyetsa baba ba gagwe fa fatshe, ke gaila ba ba mo ilang.

²⁴Boikanngo jwa me bo tlaa nna le ene, le jone boutlwelobotlhoko jwa me; lonaka lwa gagwe lo tlaa goletsega mo ineng la me.

²⁵Le gone ke tlaa baya seatla sa gagwe mo lewatleng; le seatla sa gagwe se se siameng mo dinokeng.

²⁶O tlaa goela kwa go nna, a re: ‘Ke wena rre, Modimo wa me, le lefika la poloko ya me.’

²⁷Le nna ke tlaa mo dira ngwana wa motsalwapele wa me, mogolo wa dikgosi tsa lefatshe.

²⁸Boutlwelobotlhoko jwa me ke tlaa bo mmolokela ka bosaengkae, le kgolagano ya me e tlaa tlhomama nae.

²⁹Le lone losika lwa gagwe ke tlaa lo dira gore lo eme ka bosakhutleng, le setulo sa gagwe sa bogosi jaaka malatsi a legodimo.

³⁰E tlaa re fa bana ba gagwe ba tlogela molao wa me, mme ba sa tsamaye mo dikatlholong tsa me;

³¹fa ba senya melao ya me, ba sa boloke ditaolo tsa me;

³²e dira gone ke tlaa kgophololang tlolo ya bone ka thupa, le boikepo jwa bone ka dinteo.

³³Le fa go ntse jalo boutlwelobotlhoko jwa me ga nketla ke bo tlosetsa ruri mo go ene, le fa e le go leseletsa boikanngo jwa me go tlhaela.

³⁴Kgolagano ya me ga nketla ke e tlola le fa e le go fetola sone se se duleng ka dipounama tsa me.

³⁵Ke ikanne gangwe fela ka boitshepo jwa me; ga nketla ke aketsa Dafite; ka re:

³⁶Losika lwa gagwe lo tlaa ema ka bosakhutleng, le setulo sa gagwe sa bogosi se tlaa ema jaaka letsatsi fa pele ga me.

³⁷Se tlaa tlhomamisiwa ka bosakhutleng jaaka kgwedi, le jaaka mosupi yo o ikanyegang mo loaping.” Sela.

³⁸Mme o latlhile, o ganne, o ntse o galefetse motlodiwa wa gago.

³⁹O fedisitswe pelo ke kgolagano ya motlhanka wa gago; o tlhapaditse serwalo sa gagwe sa bogosi, go ya fela mo mmung.

⁴⁰O rutlile dikgoro tsa gagwe tsotlhe fela; dikago tsa gagwe tse di thata o di ntshitse marope fela.

⁴¹Botlhe ba ba fetang ka tsela ba a mo thopa; o bile o dule sekgobo mo go ba o bapileng nabo.

⁴²O goleditse seatla se se siameng sa baganetsi ba gagwe; o itumedisitse baba botlhe ba gagwe.

⁴³Ee, bogale jwa tšhaka ya gagwe o bo phetsotse, wa ba wa se ka wa mo emisa mo tlhabanong.

⁴⁴O khutlisitse go phatsima ga gagwe, le setulo sa gagwe sa bogosi o se digetse fa fatshe.

⁴⁵Malatsi a bokau jwa gagwe o a khutsafaditse; o mmipile ka ditlhong. Sela.

⁴⁶E tlaa nna goleele go le kaye Jehofa? A o tlaa iphitlha ka bosakhutleng? Bogale jwa gago bo tlaa tuka jaaka molelo goleele go le kaye?

⁴⁷A ko o gakologelwe motlha wa me, gore o mokhutshwane jang! Kana bana botlhe ba batho o ba bopetse lefela jang!

⁴⁸Ana motho ke ofe yo o tlaa tshelang mme a se ketla a bona loso? Yo o tlaa gololang mowa wa gagwe mo thateng ya Bobipo e mang?

⁴⁹Morena, mautlwelobotlhoko a gago, a jale, a kwa kae, a o kileng wa ikanela Dafite mo boikanngong jwa gago?

⁵⁰Morena, gakologelwa kgobo ya batlhanka ba gago; ka fa ke tshotseng kgobo ya batho botlhe ba ba thata thata mo sehubeng sa me ka gone;

⁵¹e baba ba gago Jehofa, ba kgobileng ka yone, e ba kgobileng dikgato tsa motlodiwa wa gago ka yone.

⁵²A go bakwe Jehofa ka bosakhutleng. A go nne jalo, fela jalo.