Psalms 88

¹Jehofa, Modimo wa poloko ya me, ke ntse ke gala fa pele ga gago motshegare le bosigo.

²A morapelo wa me o tsene, o fitlhe fa pele ga gago; sekegela go gala ga me tsebe ya gago;

³gonne mowa wa me o tletse ditlalelo, le botshelo jwa me bo atamela kwa Bobipong.

⁴Ke balelwa le bone ba ba fologelang mo moleteng; ke ntse jaaka monna yo o se nang thuso.

⁵Ke latlhetswe fela mo baswing, jaaka ba ba bolailweng, ba ba namaletseng mo phupung, ba o sa tlholeng o ba gakologelwa gope; mme ba kgaotswe mo seatleng sa gago.

⁶O mpeile mo moleteng o o kwa tengteng, mo mafelong a a lefifi, mo matennyeng.

⁷Kgalefo ya gago e ntlapisitse ka thata, o ntlhokofaditse ka dinteelo tsotlhe tsa gago. Sela.

⁸Ba ke itsanyeng nabo o ba isitse kgakala le nna; o ntirile se se makgapha mo go bone; ke tswaletswe, mme ke reteletswe ke go tswa.

⁹Leitlho la me le fela ka ntlha ya tlhokofatso; ke ntse ke go bitsa, Jehofa, ka letsatsi le letsatsi ke otlololetse mabogo a me koo go wena.

¹⁰A baswi o a bo o tlaa ba supetsa dikgakgamatso? A ba ba fetileng ba tlaa tsoga ba go baka? Sela.

¹¹A bopelonomi jwa gago jwa lorato bo tlaa kakanngwa mo phupung? le fa e le boikanngo jwa gago mo goora Tshenyo?

¹²A dikgakgamatso tsa gago di tlaa itsiwe mo lefifing? Le tshiamo ya gago mo lefatsheng la tebalo?

¹³Ke wena, Jehofa, yo ke goetseng kwa go wena; mme e tle e re go le ka moso morapelo wa me o tlaa nna o fitlha fa pele ga gago.

¹⁴Jehofa, ana o latlhelang mowa wa me? O ntshubelang sefatlhogo sa gago?

¹⁵Ke sa le ke patikega, ke iketleeletsa go swa le mo bokaung jwa me; e a re fa ke boga ditheriso tsa gago ke be ke rerege.

¹⁶Kgalefo e e tukang ya gago e nthibegeditse; ditheriso tsa gago di nkgaotse.

¹⁷Di ne tsa tlhola di mpharafere jaaka metsi ka letsatsi lotlhe; tsa mphola mmogo.

¹⁸Morati le tsala o ba isitse kgakala le nna, le ba ke itsanyeng nabo o ba isitse mo lefifing.