Proverbs 8

¹A Botlhale ga a kue, tlhaloganyo a ga a tsholetse lentswe la gagwe?

²Kwa godimo ga mafelo a a godimo fa tseleng, fa ditselana di kopanelang gone, o eme gone;

³fa dikgorong, fa botsenong jwa motse, fa go tsenwang ka mejako gone, o kuela godimo; a re:

⁴“Ke kua lona banna; lentswe la me le buisa bana ba batho.

⁵Lona ba lo sa tlhalefang, tlhaloganyang matseba, le lona dieleele lo nne pelo e e tlhaloganyang.

⁶Utlwang, gonne ke tlaa bua dilo tse di gaisang mo go feteletseng; go tumologa ga dipounama tsa me e tlaa nna ga dilo tse di siameng.

⁷Gonne molomo wa me o tlaa bolela boammaaruri; boikepo ke makgapha mo dipounameng tsa me.

⁸Mafoko otlhe a molomo wa me a mo tshiamong; ga go na sepe se se sokameng, le fa e le se se kgopo mo go one.

⁹A bonala sentle fela otlhe mo go ene yo o tlhaloganyang, a siame mo go ba ba bonang kitso.

¹⁰Tsholang thuto ya me, e seng selefera; le kitso bogolo go gouta e e tlhophegileng.

¹¹Gonne botlhale bo molemo bogolo go diperela, mme dilo tsotlhe tse motho o ka di eletsang ga di na go tshwantshiwa le jone.

¹²Nna, botlhale, ke dirile matseba boago jwa me, ke tsoma kitso le pharologanyo.

¹³Go boifa Jehofa ke go ila bosula; boikgodiso, le bogoma, le mokgwa o o bosula le molomo o o lesoko, ke dilo tse ke di ilang.

¹⁴Kgakololo ke ya me, le kitso e e itekanetseng; ke nna tlhaloganyo; ke na le thata.

¹⁵Dikgosi di busa ka nna, le dikgosana di tlhoma molao wa tshiamo ke nna.

¹⁶Dikgosana di laola ka nna le bagolwane, e bong baatlhodi botlhe ba lefatshe.

¹⁷Ke rata bone ba ba nthatang; ba ba mpatlang ka tlhoafalo ba tlaa mpona.

¹⁸Dikhumo ke na natso le tlotlo, ee, dikhumo tse di tlhomameng, le tshiamo.

¹⁹Loungo lwa me lo molemo bogolo go gouta, ee, bogolo go gouta e e itshekileng; le totafalelo ya me bogolo go selefera se se tlhophegileng.

²⁰Ke sepela mo tseleng ya tshiamo, mo gare ga ditselane tsa tshiamiso.

²¹Gore ba ba nthatang ke ba jese boswa jwa dilo, le gore ke tlatse matlo a bone a a bayang mahumo.

²²Jehofa o ne a na le nna mo tshimologong ya tsela ya gagwe, pele ga ditiro tsa gagwe tsa bogologolo.

²³Ke sa le ke emisiwa kwa bosasimologeng kwa tlholegong, lefatshe le ise le be le nne.

²⁴E rile go se na ditsiba tse di botengteng, ka tsalwa; jale go se na metswedi e e tletseng metsi.

²⁵Pele dithaba di ise di itshetlele, le pele ga dithabana, ka tsalwa.

²⁶E rile a ise a dire lefatshe, le fa e le dinaga, le fa e le tshimologo ya lorole lwa lobopo,

²⁷jale ka a etleetsa magodimo, ka bo ke le gone. Jale ka a baya tikwatikwe mo bophadiphading jwa setsiba se se boteng;

²⁸e rile a tiisa loapi kwa godimo, jale ka metswedi ya boteng e pumpunyega;

²⁹e rile a beela lewatle molelwane wa lone, gore metsi a tle a se ka a tlola taolo ya gagwe; ya re a rala metheo ya lefatshe,

³⁰foo ke ne ke le fa go ene, jaaka motho yo e leng tlhogo ya tiro; ke le natefelo ya gagwe ka malatsi otlhe, ke ntse ke itumela ka metlha yotlhe fa pele ga gagwe.

³¹Ka itumelela lefatshe la gagwe le le nnwang; natefelo ya me le yone e le mo baneng ba batho.

³²Ke gone jaana, bomorwaaka, ka re: Ntheetsang, gonne go sego ba ba tshegetsang ditsela tsa me.

³³Utlwang thuto, lo tlhalefe, mme lo se ka lwa e gana.

³⁴Go sego motho yo o nkutlwang, a ntse a lebeletse fa dikgorong tsa me, a ntse a letile fa mephakwaneng ya mejako ya me.

³⁵Gonne yo o mponang o bona botshelo, mme o tlaa bona botsalano mo go Jehofa.

³⁶Mme yo o nteofelang o siamololela mowa wa gagwe tota; botlhe ba ba nkilang ba rata loso.”