Tswana 1992 Bible - 18 verses
1Botlhale o agile ntlo ya gagwe, o betlile maotwana a gagwe a supa.
2O tlhabile dikgomo tsa gagwe; o tlhakantse bojalwa jwa gagwe jwa mofine; o bile o baakantse lomati lwa gagwe lwa bojelo.
3O romile barweetsana ba gagwe, o kua a tlhatlogile mafelo a a godimodimo mo motseng, a re:
4“Le fa e le mang yo o sa tlhalefang, a a tsene kwano!” Ka ga gagwe yo o se nang tlhaloganyo, o mo raya a re:
5“Ntlong lo je senkgwe sa me, lo nwe bojalwa jwa mofine jo ke bo tlhakantseng.
6Bakelang go dira boeleele, lona ba lo sa tlhalefang, lo tshele; lo sepele mo tseleng ya tlhaloganyo.”
7Yo o otlhayang mosotli o inaya ditlhong fela; le yo o kgalemelang moikepi o ipaya setshubaba fela.
8O se ka wa kgalemela mosotli, o ka tla a go ila; kgalemela motho yo o botlhale, mme o tlaa go rata.
9Naya motho yo o botlhale thuto, mme o tlaa tlhalefa bogolo; ruta motho yo o siameng, mme o tlaa totafala mo thutong.
10Go boifa Jehofa ke tshimologo ya botlhale; go itse Moitshepi ke yone tlhaloganyo.
11Gonne malatsi a gago a tlaa ntsifadiwa ke nna, le dinyaga tsa botshelo jwa gago di tlaa okediwa.
12Fa o le botlhale, o a bo o itlhalefetse; fa o sotla, ke wena wesi o tlaa go belegang.
13Mosadi wa seeleele o tle a phokelele fela; ga a a tlhalefa, ga a itse sepe.
14O tle a dule fa mojakong ga ntlo ya gagwe, mo setulong se se mo mafelong a godimo mo motseng,
15gore a tle a tlhaeletse ba ba fetang, ba ba tlhamaletseng le ditsela tsa bone, a re:
16“Le fa e le mang yo o sa tlhalefang, a a tsene kwano;” mme ka ga gagwe yo o se nang tlhaloganyo, a mo reye a re:
17“Metsi a a utswiwang a monate, le senkgwe se se jelwang mo sephiring se a natefa.”
18Mme monna yo a sa itse fa baswi ba gone; le go re ba o ba laleditseng ba mo matennyeng a Bobipo.