Song of Solomon 5

¹Ke tsile mo tshimong ya me, kgaitsadiaka, mogatsaka; ke phuthile mera ya me le senkgisa monate sa me; ke jele lomepe lwa me le dinotshe tsa me; ke nole bojalwa jwa me jwa mafine, le maši. Jang, ditsala; nwa, ee, nwa ka botlalo, wena moratwa.

²Ke ne ke robetse, mme pelo ya me ya thanya; ka re, ke lentswe la moratwa wa me; yo o kgwanyakgwanyang, a re: “Mpulela, kgaitsadiaka, moratwa wa me, letseba la me, moitekanedi wa me; gonne tlhogo ya me e tletse monyo, le makaodi a me ka marothodi a bosigo.”

³Ke apotse hempe, ke tlaa e apara jang? Ke itlhapisitse dinao; ke tlaa di leswefatsa jang?

⁴Moratwa wa me a tsenya letsogo la gagwe ka letshofa la setswalo, mme pelo ya me ya tseega ka ga gagwe.

⁵Ka nanoga ka ya go bulela moratwa wa me, mme diatla tsa me tsa bo di rotha mera, le menwana ya me e rotha mera e e metsi, ya rothela mo matshwarong a sepakelo.

⁶Ka bulela moratwa wa me; mme moratwa wa me a bo a ngongwaetse, a tsamaile. O rile a bua, mowa wa me wa nyera; ka mmatla, mme ka se ka ka mmona; ka mmitsa, mme a se ka a nkaraba.

⁷Balebedi ba ba tsamayatsamayang mo motseng ba mphitlhela, ba mpetsa, ba nntsha dintho, badisa ba dithako ba ntseela kobo.

⁸Ke a lo ikanisa, lona bomorwadia Jerusalema, fa lo bona moratwa wa me, ka re, lo mmolelele fa ke le botlhoko ka lorato.

⁹Ana moratwa wa gago e mang bogolo go moratwa yo mongwe? Wena yo o leng montlentle bogolo mo basading, ana moratwa wa gago e mang bogolo go moratwa yo mongwe, fa e bo ne ne fano o re ikanisa jaana?

¹⁰Moratwa wa me o mosweu le bohibidu, ke yo o itsegeng bogolo mo go ba ba makgolo a lekgolo.

¹¹Tlhogo ya gagwe e ntse jaaka gouta e e itshekileng bogolo, makaodi a gagwe a tshophegile, a mantsho jaaka lehukubu.

¹²Matlho a gagwe a ntse jaaka matseba fa melapong ya metsi; a tlhapisitswe ka maši; a tlhomilwe sentle.

¹³Marama a gagwe a ntse jaaka temana ya ditlhatshana tsa dinkgisa monate, jaaka dimota tsa merogo e e nkgang monate; dipounama tsa gagwe di ntse jaaka masoma, di rotha mera e e metsi.

¹⁴Diatla tsa gagwe di ntse jaaka mehitshana ya gouta e e tsentsweng berule; mmele wa gagwe o ntse jaaka e kete o dirilwe ka naka lwa tlou, o manegilwe disafire.

¹⁵Maoto a gagwe a ntse jaaka maotwana a a emeng metloutlo ya marebela, tse di tlhomilweng mo ditlhakong tsa gouta e e itshekileng; ponalo ya gagwe e ntse jaaka Lebanone, e tlotlometse jaaka masetara.

¹⁶Molomo wa gagwe o monate thata; ee, o montle fela mo go fedileng. Yo ke ene moratwa wa me, yoo ke ene tsala ya me, lona bomorwadia Jerusalema.