Jeremiah 41

¹Ga dirala e rile ka kgwedi ya bosupa, Išemaele morwa Nethania, morwa Elišame wa losika lwa segosi, e bile e le mongwe wa balaodisiwa ba bagolo ba kgosi, a na le banna ba le some, a tla mo go Getalia morwa Ahikame kwa Misepa, mme ba ja mmogo teng mo Misepa.

²Foo ga nanoga Išemaele morwa Nethania, le banna ba ba some ba ba nang nae, mme ba itaya Getalia morwa Ahikame morwa Shafane ka tšhaka, ba mmolaya, ene yo kgosi ya Babilone e mmeileng molaodisiwa mo lefatsheng.

³Le gone Išemaele a bolaya Bajuta botlhe ba ba nang nae, ke go re ba ba nang le Getalia mo Misepa, le Bakalatea ba ba fitlhelwang teng, e bong batlhabani.

⁴Ga dirala ya re ka letsatsi la bobedi a sena go bolaya Getalia, mme ope a sa go itse,

⁵ga tla bangwe ba ba tswang kwa Shekeme, le kwa Shilo, le kwa Samaria, e bong batho ba ba 80 ba ipeotse ditedu ba ikgagotse diaparo, ba itshegakile, ba tla ba tshotse diromololo le maswalo a lebano, ba tla go di isa kwa ntlong ya ga Jehofa.

⁶Išemaele morwa Nethania a tswa mo Misepa a ya go ba kgatlhantsha, a tla a lela; mme ga dirala ya re a kgatlhana nabo a ba raya a re: “Tlang kwa go Getalia morwa Ahikame.”

⁷Ga dirala e rile ba fitlha mo gare ga motse, Išemaele morwa Nethania a ba bolaya ka tšhaka, a ba latlhela mo teng ga molete, ene le banna ba o nang nabo.

⁸Mme ga fitlhelwa mo go bone banna ba le some, mme ba raya Išemaele ba re: “O se ka wa re bolaya, gonne re na le dithoto tse di fitlhilweng mo nageng, tsa mabele, tsa barele, tsa lookwane le tsa dinotshe.” Mme a ithiba, a se ka a ba bolaela mo go ba ga gabo.

⁹Jaana molete o Išemaele o latlhetseng mo go one ditoto tsa batho ba o ba bolaetseng fa go Getalia, (ke one o Asa kgosi o kileng a o dira ka go boifa Baaša kgosi ya Iseraele), Išemaele morwa Nethania a o katela ka bone ba ba bolailweng.

¹⁰Foo Išemaele a tlosa masalela otlhe a batho ba ba mo Misepa e le ditshwarwa, e bong bomorwadia kgosi, le batho botlhe ba ba setseng mo Misepa, ba Nebusaratane molaodi wa balebedi o ne a ba neetse Getalia morwa Ahikame; Išemaele morwa Nethania a ba tlosa e le ditshwarwa, mme a tloga a re o kgabaganyetsa kwa baneng ba Amone.

¹¹E rile Johanane morwa Karea, le balaodi botlhe ba mephato e o ne a na nayo ba utlwa ka ga bosula jotlhe jo Išemaele morwa Nethania o bo dirileng,

¹²foo ba tsaya banna botlhe, ba ya go tlhabana le Išemaele morwa Nethania, mme ba mo fitlhela fa metsing a magolo a a kwa Gibeone.

¹³Jaana ga dirala ya re batho botlhe ba ba nang le Išemaele ba bona Johanane morwa Karea, le balaodi botlhe ba mophato ba o nang nabo, foo ba itumela.

¹⁴Jalo batho botlhe ba Išemaele o ne a ba tlositse kwa Misepa e le ditshwarwa ba retologa, ba boa, ba ya kwa go Johanane morwa Karea.

¹⁵Mme Išemaele morwa Nethania a falola mo go Johanane a na le banna ba ba ferang mebedi, mme ba ya kwa baneng ba Amone.

¹⁶Foo Johanane morwa Karea, le balaodi botlhe ba mephato ba o nang nabo, ba tsaya masalela otlhe a batho ba o ba golotseng mo go Išemaele morwa Nethania, ba ba tswang kwa Misepa, morago ga a sena go bolaya Getalia morwa Ahikame, e bong batlhabani le basadi, le bana le baopafadiwa, ba o ne a ba busitse kwa Gibeone.

¹⁷Mme ba tloga ba ya ba aga mo Geruthe Kimehame, o o fa Betheleheme, ba re ba ya go tsena kwa Egepeto,

¹⁸ka ntlha ya Bakalatea; gonne ba ne ba ba boifa, ka Išemaele morwa Nethania a bolaile Getalia morwa Ahikame, yo kgosi ya Babilone e ne e mmeile molaodisiwa mo lefatsheng.