Jeremiah 42

¹Foo balaodi botlhe ba mephato, le Johanane morwa Karea, le Asaria morwa Hošaia, le batho botlhe, go simolola ka ba babotlana le go ya kwa go ba bagolo, ba atamela.

²Ba raya Jeremia moperofeti, ba re: “Re a go rapela, a mokokotlelo wa rona o amogelwe fa pele ga gago, mme o re rapelele Jehofa Modimo wa gago, e bong masalela a otlhe; gonne re tlogetswe ke bontsi, re setse re le bannye jaaka matlho a gago a re bona,

³gore Jehofa Modimo wa gago o tle o re kaele tsela e re tshwanetseng go tsamaya ka yone, le selo se re tshwanetseng go se dira.”

⁴Foo Jeremia moperofeti a ba raya a re: “Ke lo utlwile; bonang, ke tlaa rapela Jehofa Modimo wa lona ka fa mafokong a lona; mme go tlaa dirala go re, le fa e ka ne e le eng se Jehofa o tlaa lo fetolang ka sone, ke tlaa se lo bolelela; ga nketla ke lo lobela sepe.”

⁵Foo ba raya Jeremia ba re: “A Jehofa a nne mosupi yo o boammaaruri le boikanngo gare ga rona, fa re sa dire fela ka fa lefokong lotlhe le Jehofa Modimo wa gago o tlaa go romang kwa go rona ka lone.

⁶Le fa e ka bo e le molemo, le fa e ka bo e le bosula, re tlaa ineela fela mo lentsweng la ga Jehofa Modimo wa rona, yo re go romelang kwa go ene; gore go tle go nne molemo mo go rona, mogang re akelang lentswe la ga Jehofa Modimo wa rona.”

⁷Ga dirala ya re malatsi a le some a sena go feta, lefoko la ga Jehofa la tla mo go Jeremia.

⁸Foo a bitsa Johanane morwa Karea, le balaodi botlhe ba mephato ba o nang nabo le batho botlhe, go simolola ka ba babotlana, go ya kwa go ba bagolo, a ba raya a re:

⁹“Jehofa Modimo wa Iseraele, yo lo nthomileng kwa go ene go ya go baya mokokotlelo wa lona fa pele ga gagwe o bua jaana, a re:

¹⁰‘Fa lo rata lo fela lo ntse mo lefatsheng le, foo ke tlaa lo aga, mme ke se ketla ke lo rutlolola, ke tlaa lo tlhoma ke se ketla ke lo kumola; gonne ke a ikwatlhaya ka ga bosula jo ke bo lo diretseng.

¹¹Lo se ka lwa boifa kgosi ya Babilone e lo e tshabang; lo se ka lwa e boifa,’ go bua Jehofa; ‘gonne ke na le lona go lo boloka, le go lo golola mo seatleng sa yone.

¹²Ke tlaa lo neela boutlwelo botlhoko, gore e tle e lo utlwele botlhoko, e dire gore lo boele mo lefatsheng la ga lona.’

¹³“Fa lo re: ‘Ga re ketla re aga mo lefatsheng le,’ jalo lo gana go akela lentswe la ga Jehofa Modimo wa lona;

¹⁴fa lo re: ‘Nnyaa; re tlaa ya kwa lefatsheng la Egepeto, kwa re se ketlang re bona ntwa epe teng, le fa e le go utlwa modumo wa lonaka teng, le fa e le go bolawa ke tlala teng; re tlaa aga teng;’

¹⁵ke gone jaana utlwang lefoko la ga Jehofa, lona masalela a Juta: Jehofa wa masomosomo, Modimo wa Iseraele o bua jaana, a re: ‘Fa lo tlhometse ruri mogopolo go ya go tsena kwa Egepeto, le go ya go jaka teng,

¹⁶foo go tlaa dirala go re tšhaka e lo e boifang, e tlaa lo tshwara teng mo lefatsheng la Egepeto, le popamo e lo e boifang, e tlaa lo konatelela ka thata teng mo Egepeto; mme lo tlaa swela teng.

¹⁷Go tlaa nna jalo le banna botlhe ba ba tlhomileng mogopolo go ya kwa Egepeto, go ya go jaka teng; ba tlaa swa ka tšhaka, ka popamo le ka kgogodi; ga go na ope yo o tlaa salang le fa e le go falola mo bosuleng jo ke tlaa bo tlisang mo go bone.’

¹⁸“Gonne Jehofa wa masomosomo, Modimo wa Iseraele o bua jaana, a re: ‘Jaaka bogale jwa me le tšarologo ya me di goromeleditswe mo banning ba Jerusalema, tšarologo ya me e tlaa goromelediwa mo go lona jalo, mogang lo tsenang mo Egepeto; lo tlaa nna seferosa sebete, le kgakgamatso, le phutso, le kgobo; mme felo fa ga lo ketla lo tlhola lo go bona gope.’

¹⁹“Jehofa o buile ka ga lona, lona masalela a Juta, a re: ‘Lo se ka lwa ya kwa Egepeto.’ Itsetseng ruri fa ke lo supeditse gompieno.

²⁰Gonne lo diretse mewa ya lona ka tsietso; gonne lo ne lwa nthoma kwa go Jehofa Modimo wa lona, lwa re: ‘O re rapelele mo go Jehofa Modimo wa rona; mme ka fa go tsotlhe tse Jehofa Modimo wa rona o tlaa di buang, o re bolelele jalo, mme re tlaa go dira.’

²¹Ke se lo boleletse gompieno; mme ga lo a akela lentswe la ga Jehofa Modimo wa lona mo go sepe se o se nthometseng kwa go lona.

²²Ke gone jaana, itsetseng ruri fa lo tlaa swa ka tšhaka, ka popamo, le ka kgogodi mo felong kwa lo eletsang go yo go jaka teng.”