Jeremiah 48

¹Ka ga Moabe. Jehofa wa masomosomo, Modimo wa Iseraele o bua jaana, a re: “A bo go latlhega Nebo! Gonne o kgakgabaditswe; Kiriathaime o tlhabisitswe ditlhong, o gapilwe; kago ya phemela e tlhabisitswe ditlhong, mme e rutlologile.

²Pako ya Moabe ga e tlhole e le gone; ba mo logetse maano a a bosula mo Hešebone, ba re: ‘Ntlong, re mo khutliseng mo go tlholeng a le morafe.’ Le wena, Matemene, o tlaa tuuladiwa, tšhaka e tlaa go konatelela.

³A modumo wa go goa mo go tswang Horonaime: ‘Go thopa le go senya mo go golo!’

⁴Moabe o sentswe; banyana ba gagwe ba utlwaditse go goa.

⁵Gonne ba tlaa tlhatloga ka fa botlhatlogong jwa Luhithe ka selelo se se sa khutleng; gonne mo bofologong jwa Horonaime ba utlwile tlalelo ya go goa ga tshenyego.

⁶Tshabang, ipolokeng, mme lo nne jaaka logolo mo nageng.

⁷Gonne, e re ka o ikantse mo ditirong tsa gago le mo mahumong a gago, le wena o tlaa thopiwa; le Kemoše o tlaa tswa a ya botshwarong, baperesiti ba gagwe le dikgosana tsa gagwe mmogo.

⁸Mothopi o tlaa tla mo motseng mongwe le mongwe, mme ga go motse ope o o tlaa falolang; le molapo o tlaa šwa, le lobala lo tlaa senngwa; jaaka Jehofa a buile.

⁹Nayang Moabe diphuka, gore a fofe a ye koo; mme metse ya gagwe e tlaa nna tshwafalo, e sena ope yo o nnang gone.

¹⁰“A go hutsege ene yo o dirang tiro ya ga Jehofa a itshemeleditse, mme a go hutsege ene yo o kganelelang madi tšhaka ya gagwe.”

¹¹“Moabe o sa le a iketla ka bokau jwa gagwe, o sa le a itsheka mo dintshing tsa gagwe, ga a ka a tlhotlhwa a tswa nkgwaneng a ya nkgwaneng; ga a ka a ya botshwarong; ke gone ka moo moutlwalo wa gagwe o setse mo go ene, le monko wa gagwe ga o a fetoga.

¹²“Ke gone bonang metlha e etla,” go bua Jehofa, “e ke tlaa romang kwa go ene bone ba ba tlhotlhang, mme ba tlaa mo tlhotlha; ba tlaa tsholola se se mo dijaneng tsa gagwe, mme ba tlaa thuba dinkgwana tsa gagwe.

¹³Moabe o tlaa tlhabisiwa ditlhong ke Kemoše, jaaka ba ntlo ya Iseraele ba ne ba tlhabisiwa ditlhong ke Bethele boikanyo jwa bone.

¹⁴“Lo bua jang, lo re: ‘Re banna ba ba thata, re diganka tsa go dira ntwa’?

¹⁵Moabe o kgakgabaditswe, ba tlhatlogetse mo metseng ya gagwe, mme makau a gagwe a a tlhophegileng a fologetse polaong,” go bua Kgosi, e leina la yone e leng Jehofa wa masomosomo.

¹⁶“Tatlhego ya ga Moabe e atametse, le pitlagano ya gagwe e itlhaganela ka thata.

¹⁷Lona lotlhe ba lo mo tikologong ya gagwe, lo mo thukhuthele tlhogo, le lona lotlhe ba lo mo itseng leina, lo re: ‘Ana lore lwa bogosi lo lo thata lo robegile jang, tsamma e ntle.’

¹⁸“Wena ngwana wa mosetsana yo o agileng mo Dibone, fologa mo kgalalelong ya gago, mme o dulele mo lenyoreng; gonne mothopi wa Moabe o go bololetse, o sentse dikago tsa gago tse di thata tsa phemelo.

¹⁹Wena monni wa Aroere, ema fa tseleng o tlhodumele; botsa monna yo o tshabang, le mosadi yo o falolang; o re: ‘Go dirafetseng?’

²⁰Moabe o tlhabisitswe ditlhong; gonne o rutlolotswe; bokolelang lo goe; lo go bolele mo Arenone, lo re: Moabe o kgakgabaditswe.

²¹“Tshekiso e tsile mo lefatsheng la lobala; mo Holone, le mo Jahesa le mo Mefaathe;

²²le mo Dibone, le mo Nebo, le mo Bethe-dibalathaime;

²³le mo Kiriathaime, le mo Bethe-gamule, le mo Bethemeone;

²⁴le mo Keriothe, le mo Bosera, le mo metseng yotlhe ya lefatshe la Moabe, e e kwa kgakala le e e fa gaufi.

²⁵Lonaka lwa ga Moabe lo kgaotswe, le letsogo la gagwe le robilwe,” go bua Jehofa.

²⁶“Mo tagiseng; gonne o na a ikgodisetsa Jehofa; Moabe o tlaa bidikama mo matlhatseng a gagwe, mme le ene o tlaa bolaisa ditshego.

²⁷Ka gonne a Iseraele o ne a sa go bolaise ditshego? A o ne a fitlhelwa mo magodung? Gonne ya tle e re o bua ka ga gagwe, wa bo o tle o nne o tshikinye tlhogo.

²⁸“Lona banni ba Moabe, tlogelang metse, lo ye go nna mo lefikeng; lo nne jaaka letseba le le agang setlhaga sa lone mo ditlhakoreng tsa molomo wa logaga.

²⁹Re utlwile ka ga boikgodiso jwa ga Moabe, go re, o boikgodiso thata; boitlotlomatso jwa gagwe, le bodipa jwa gagwe, le bopelompe jwa gagwe.

³⁰Ke a e itse tšhakgalo ya gagwe, go bua Jehofa, go re, ga se sepe; go ipelafatsa ga gagwe ga go ise go dire sepe.

³¹Ke gone ka moo ke tlaa bokolelelang Moabe; ee, ke tlaa goa ka ga ba Moabe botlhe; ba tlaa hutsafalela banna ba Kireherese.

³²Ke tlaa go lelela ka selelo se se fetang sa ga Jasere, wena mofine wa Sibema; menamo ya gago e ne ya kgabaganya lewatle, ya fitlha fela kwa lewatleng la Jasere; mothopi o wetse maungo a gago a letlhabula, le mo difineng tsa gago.

³³Boipelo bo tlositswe le boitumelo mo masimong a a ungwang le mo lefatsheng la Moabe; mme ke khutlisitse bojalwa jwa mofine mo dikgatisetsong; ga go na ope yo o tlaa gatang ka tuduetso; tuduetso e tlaa bo e se tuduetso ya sepe.

³⁴“Go tswa kgoong ya Hešebone go ya fela kwa Eleale, le go ya fela kwa Jahase, ba tumisitse kodu ya bone, go tswa Soare go ya fela kwa Horonaime, kwa Egelathe-šelešiya; gonne le metsi a Nimerime le one a tlaa swafala fela.

³⁵Gape ke tlaa khutlisa mo Moabe ene yo o isang tshupelo mo felong fa go tlotlometseng, le ene yo o fisetsang medimo ya gagwe maswalo, go bua Jehofa.

³⁶“Ke gone ka moo pelo ya me e dumang ka ga Moabe jaaka ditlhaka, pelo ya me e duma jaaka ditlhaka ka ga batho ba Kireherese; ke gone ka moo letlotlo le o le bonyeng le nyeletse.

³⁷Gonne tlhogo nngwe le nngwe e logatadima, le ditedu tsotlhe di kgaotswe; mo diatleng tsotlhe go na le ditshegako, le mo dithekeng go letsela la kgetse.

³⁸Mo godimo ga mantlo otlhe a Moabe le mo mebileng ya gone go na le modumo wa khutsafalo ka ntlha tsotlhe fela; gonne ke thubile Moabe jaaka sejana se go senang kgatlhego epe mo go sone,” go bua Jehofa.

³⁹“Ana o rutlologile jang? Ba bokolela jang! Moabe o hularetse batho jang ka ditlhong! Jalo Moabe o tlaa nna setshego le seboifiso mo go botlhe ba ba mo tikologong ya gagwe.”

⁴⁰Gonne Jehofa o bua jaana, a re: “Bonang, o tlaa fofa jaaka ntswi yo motona, o tlaa tsharololela Moabe diphuka ka bosula.

⁴¹Keriothe o gapilwe, mme dikago tse di thata tsa phemelo di tshoganetswe, le pelo ya diganka tsa Moabe ka motlha oo e tlaa nna jaaka pelo ya mosadi mo metlotseding ya gagwe.

⁴²Moabe o tlaa senngwa gore e se tlhole e le sešaba, ka a ikgodiseditse Jehofa.

⁴³Poifo, le molete, le seru, di mo go wena, wena monni wa Moabe,” go bua Jehofa.

⁴⁴“Yo o tshabang ka poifo o tlaa wela mo moleteng; mme yo o tsogang a tswa mo moleteng o tlaa tshwarwa mo serung; gonne ke tlaa lere mo go ene, e bong mo go Moabe, ngwaga wa tshekiso ya bone,” go bua Jehofa.

⁴⁵“Ba ba tshabileng ba eme ba sena thata mo moriting wa Hešebone; gonne go dule molelo mo Hešebone, le kgabo mo gare ga Sihone, mme di laitse ntlha ya Moabe, le diphugo tsa ba ba feretlhang.

⁴⁶A bo go latlhega wena Moabe! Batho ba Kemoše ba latlhegile, gonne bana ba gago ba basimane ba tlositswe ba golegilwe, le bana ba gago ba basetsana ba ile botshwarong.

⁴⁷“Le fa go ntse jalo ke tlaa ba ke busa botshwaro jwa ga Moabe mo metlheng ya bofelo,” go bua Jehofa. Tshekiso ya Moabe e kalo.