Jeremiah 47

¹Lefoko la ga Jehofa le le tsileng mo go Jeremia moperofeti ka ga Bafilisitia, Faro a ise a kgemethe Gasa.

²Jehofa o bua jaana, a re: “Bonang, metsi a hohomoga kwa botsheka, mme a tlaa nna noka e e penologang, e tlaa penologela lefatshe le tsotlhe tse di mo go lone, motse le ba ba agileng mo go one; mme batho ba tlaa goa, le banni botlhe ba lefatshe ba tlaa bokolela.

³Ka ntlha ya modumo wa mesito ya ditlhako tsa dinatla tsa gagwe, le ka ntlha ya mokgwaso wa go taboga ga dikara tsa gagwe, le ka ntlha ya modumo wa maoto a gagwe a dikologa, borra bana ga ba šebele kwa baneng ba bone ka ntlha ya go repa ga mabogo;

⁴le ka ntlha ya letsatsi le le tlang, la go thopa Bafilisitia botlhe, le go kgaola mo Ture le Sitone mothusi mongwe le mongwe yo o setseng, gonne Jehofa o tlaa thopa Bafilisitia, masalela a setlhake sa Kafetore.

⁵Logatadima lo wetse ba Gasa; Ašekelone o dirilwe bosengsepe, makhunantshana a molapo wa bone; o tlaa nna o itshegaka ka lobaka lo lo kaye?

⁶Tshaka ya ga Jehofa we, o tlaa nna lobaka lo lo kaye o ise o tuulale? Itsenye mo kgatleng ya gago; ikhutse, mme o tuulale fela.

⁷Ana o ka tuulala jang? ka e le fa Jehofa a go neile tiro; ka fa Ašekelone, le ka fa losing lwa lewatle, o e laoletse gone.”