2 Corinthians 10

¹Jaana nna ka nosi, ke le Paulo, ke a lo rapela ka bopelonolo le ka bopelonomi jwa ga Keresete, e bong nna yo e a reng ke le koo go lona, ke be ke le boikokobetso mo go lona, mme fa ke seyo ke be ke le pelokgale mo go lona.

²Ee, ke a lo rapela, gore e re ke le koo go lona, ke se ka ka nna pelokgale ka boikgantsho jo ke reng ke pelokgale ka jone, mo go bangwe ba ba re kayang jaaka e kete re sepela ka fa nameng.

³Gonne le fa re sepela mo nameng, ga re tlhabane ka fa nameng;

⁴gonne dibolao tsa ntwa ya rona ga se tsa nama, di nonofile fa pele ga Modimo go diga dikago tsa phemelo tse di thata.

⁵Re diga ditlhatlhanyo, le sengwe le sengwe se se tsholetsegileng, se se ikgoleletsang go thiba kitso ya Modimo; re rapela megopolo yotlhe mo kgolegong ya go utlwa Keresete;

⁶re bile re iketleeleditse go busolosa botlhokakutlo jotlhe, kutlo ya lona e sena go dirafala.

⁷Lona lo tle lo lebe dilo tse di fa pele ga matlho a lona. Fa motho mongwe a itsholofetse, gore ene ke wa ga Keresete, a a ke a gopole gape mo pelong ya gagwe, gore le fa jaaka ene a le wa ga Keresete, le rona re ntse jalo.

⁸Gonne le fa nka bo ke ipelafatsa go le gogolwane ka ga thata ya rona e Morena o e re neetseng go tla re lo aga, e seng go lo rutlolola, ga nketla ke tlhajwa ke ditlhong.

⁹Ke raya gore ke se nne jaaka e kete ke rata go lo reregisa ka dikwalo tsa me.

¹⁰Gonne ba tle ba re: “Dikwalo tsa gagwe di boima, di thata; mme fa a le fa sebele sa gagwe, o ba a le bokoa, le puo ya gagwe e be e se sepe.”

¹¹Yo o ntseng jalo, a ke a gakologelwe se, gore se re leng sone mo puong ka dikwalo re seyo, re bo re ntse fela jalo le mo tirong, mogang re leng teng.

¹²Gonne ga re pelokgale ya go ipala, le fa e le go itshwantsha le bangwe ba bone ba ba iphakang. Mme bone ba bosi, ka ba itekanya ka bojosi jwa bone, ba ba ba itshwantsha le bojosi jwa bone, ga ba na tlhaloganyo.

¹³Mme rona ga re ketla re ipelafatsa go fetisa selekanyo sa rona, fa e se ka fa selekanyong sa sebaka se Modimo o se re beetseng go nna selekanyo, e bong go ya go fitlha le koo go lona.

¹⁴Gonne ga re ikgwalatse bobe, jaaka e kete ga re a fitlha le kwa go lona; gonne re ile ra fitlha le kwa go lona ka Mafoko a a Molemo a ga Keresete.

¹⁵Re sa ipelafatse ka mo go fetisang selekanyo sa rona, ke gore ka ditiro tsa batho ba bangwe; mme re na le tsholofelo ya gore fa tumelo ya lona e tota, re tlaa godisediwa kwa botlalong jo bongwe mo go lona, ka fa sebakeng sa rona.

¹⁶Re ba re tla re ya go rera Mafoko a a Molemo le mo mafatsheng a a kwa pele ga lona, e seng go ipelafatsa ka sebaka sa yo mongwe, ka ga dilo tse di fitlhelwang a di baakantse gale.

¹⁷Yo o ipelafatsang, a a ipelafatse ka Morena.

¹⁸Gonne yo o iphakang, e be e se ene yo o lebosegang, fa e se yo Morena o mo fakang fela.