2 Corinthians 11

¹A bo lo ka ka lwa iphapaanya le nna go le gonnye mo boeleeleng; ee, ruri lo ka ka lwa iphapaanya le nna.

²Gonne ke lo tlhoafaletse ka tlhoafalo ya semodimo, gonne ke ne ke lo beeleletse monna a le mongwe fela, gore ke tle ke lo neele Keresete lo le kgarebane e e itshekileng.

³Ke a boifa, gore e se re kgotsa motlha mongwe, jaaka noga e tsieditse Efa ka boferefere jwa yone, pelo tsa lona tsa senyega jalo, tsa kgaogana le tshiamo le boitsheko jo bo ntlheng ya ga Keresete.

⁴Gonne fa yo o tsileng koo a rera Jesu mongwe o sele, yo re se kang ra mo rera, kgotsa fa lo amogela mowa mongwe o sele, o lo se kang lwa o amogela, kgotsa mafoko a a molemo a sele, a lo se kang lwa a amogela, lo dira sentle jang fa lo iphapaanya nae.

⁵Gonne ke solofela gore ga ke kwa morago ga baaposetole ba bagolo, le fa e le go le gonnye.

⁶Le fa ke sa itse go bua sentle, ga ke tlhaele mo kitsong; nnyaa, mo dilong tsotlhe re go bonaditse ka ntlha tsotlhe koo go lona.

⁷Kgotsa a ke leofile ka go ikokobetsa, gore lona lo golediwe, ka ke lo reretse Mafoko a a Molemo a Modimo, ke sa lope sepe?

⁸Ka thukhutha diphuthego tse dingwe, ka amogela tuelo mo go tsone, gore ke direle lona.

⁹Ke rile ke le mo go lona, ke tlhoka sengwe, ga ke a ka ka imela motho ope; gonne e rile bagaetsho ba tswa kwa Maketonia, ba ntlaletsa ka fa selekanyong sa go tlhoka ga me; mme mo dilong tsotlhe ke ne ka ithiba gore ke se lo imele. Mme ke tlaa nna ke ithiba jalo.

¹⁰Jaaka boammaaruri jwa ga Keresete bo le mo go nna, ga go ketla go dira le motho ope yo o tlaa nkhutlisang go ipelafatsa mo mafatsheng a Akaia.

¹¹Ka ntlha yang? A ke ka gobo ke sa lo rate? Modimo o a itse.

¹²Se ke se dirang, ke tlaa nna ke se dira fela, gore ke tle ke ba tlhokise seipato ba ba eletsang seipato; e tle e re fa ba ipelafatsa ka sengwe, ba fitlhelwe ba tshwana le rona fela.

¹³Gonne batho ba ba ntseng jalo, ke baaposetole ba e seng bone, ke badiri ba ba tsietsang, ba ba itshwantshang le baaposetole ba ga Keresete fela.

¹⁴Ga se mo go ka gakgamalelwang, gonne Satane le ene o tle a itshwantshe le moengele wa lesedi.

¹⁵Ke gone, e be e se selo se segolo fa batlhanka ba gagwe le bone ba ka itshwantsha le batlhanka ba tshiamo; ba bokhutlo jwa bone bo tlaa nnang ka fa ditirong tsa bone.

¹⁶Ke bua gape ka re, a go se nne motho ope yo o nkgopolang seeleele; mme fa lo bua jalo, le fa go ntse jalo lo ntshole fela jaaka yo o seeleele, gore le nna ke tle ke ipelafatse go le gonnye.

¹⁷Se ke se buang, ga ke se bue ka fa Moreneng, e le jaaka mo boeleeleng, mo boikgantshong jo jwa go ipelafatsa.

¹⁸E re ka batho ba le bantsi ba tle ba belafale ka fa nameng, le nna ke tlaa belafala.

¹⁹Gonne lo a tle lo iphapaanye le dieleele sentle fela, ka lona lo le botlhale.

²⁰Gonne lo tle lo iphapaanye le motho fa a lo ntsha batlhanka, fa a lo ja, fa a lo thopa, fa a ikgodisa, fa a lo tlhanya mo sefatlhogong.

²¹Ke bua ka mokgwa wa go inyatsa, jaaka e kete re ne re le bokoa. Le fa go ntse jalo se mongwe o leng pelokgale ka sone, le nna ke pelokgale; ke bua ka boeleele.

²²A ke Bahebere? Le nna ke ntse jalo. A ke Baiseraele? Le nna ke ntse jalo. A ke losika lwa ga Aberahame? Le nna ke ntse jalo.

²³A ke badiredi ba ga Keresete? Nna bogolo; ke bua jaaka yo o sa ikutlweng ka bontsi jwa ditiro, le ka go tsena mo matlong a kgolegelo gantsi, le ka dithupa tse di fetang selekanyo, le ka go swa gantsi.

²⁴Ke kgwathisitswe gatlhano ke Bajuta, ke ntse ke bewa dithupa di le 39.

²⁵Ke iteilwe ka dithobane gararo, ka kgobotlediwa ka maje gangwe fela, ka thubegelwa ke sekepe gararo, ka lala gangwe fela ka ba ka tlhola mo botennyeng jwa lewatle;

²⁶ke ntse ke le mo diketong gantsi, ka nna mo poitshegong ya dinokwane, le mo poitshegong ya ba gaetsho, le mo poitshegong ya Baditšhaba, mo poitshegong mo motseng, mo poitshegong mo nageng, mo poitshegong mo lewatleng, mo poitshegong mo go bakaulengwe ba e seng bone;

²⁷ke le mo tirong le mo tapisegong, mo ditisong gantsi, mo tlaleng le mo lenyoreng, mo go itimeng dijo gantsi, mo serameng le mo bosaikategang.

²⁸Kwa ntle ga dilo tse di kwa ntle, go na le mo go nkimelang ka malatsi otlhe, ke raya tlhobaelo ka ga diphutego tsotlhe.

²⁹Go na le mang yo o bokoa, nna ke se bokoa? Mang yo o kgopisiwang, nna ke sa gakale?

³⁰Fa ke na le go ipelafatsa, ke tlaa ipelafatsa ka dilo tse di amang bokoa jwa me.

³¹Modimo le Rra Morena Jesu, one o o bakwang ka bosakhutleng, o a itse fa ke sa ake.

³²E rile kwa Damaseko, molaodisiwa wa kgosi Aretase a lalela motse wa Badamaseko, gore a ntshware.

³³Mme ka lepelediwa ka seroto ka fa seiponeng se se mo lorakong, ka falola mo diatleng tsa gagwe.