Deuteronomy 32

¹“Lona magodimo, sekegang tsebe, mme ke tlaa bua; a lefatshe le utlwe mafoko a molomo wa me.

²Thuto ya me e tlaa rotha jaaka pula, puo ya me e tlaa wa jaaka monyo; jaaka pula ya medupe mo loremeng, le jaaka pula ya maebana mo morogong;

³gonne ke tlaa opela leina la ga Jehofa mokgosi; kayang Modimo wa rona bogolo.

⁴Lefika, tiro ya gagwe e itekanetse; gonne ditsela tsa gagwe tsotlhe ke tshiamiso; Modimo o o boikanngo, o o se nang tshiamololo, one o tekatekanyo, o tshiamo.

⁵Ba o ipodiseditse, ga se bana ba gagwe, ke setshubaba mo go bone; ke losika lo lo logwadi, lo lo kgopo.

⁶A lo a bo lo duel Jehofa jalo, batho ke lona ba dieleele? A ga se ene rraago yo o go rekileng? O go dirile a ba a go tlhomamisa.

⁷Ikgakolole malatsi a bogologolo, gopola dinyaga tsa dikokomana di le dintsi; botsa rraago, o tlaa go tlhotlhela; bagolwane ba gago, ba tlaa go bolelela.

⁸E rile Mgodimodimo a abela merafe boswa jwa yone, ka a kgaoganya bana ba batho, a tlhomela ditšhaba melelwane ka fa palong ya bana ba Iseraele.

⁹Gonne kabelo ya ga Jehofa ke batho ba gagwe; Jakobe ke kabo e e lekantsweng ya boswa jwa gagwe.

¹⁰O mo fitlhetse mo lefatsheng le le sekaka, mo nageng e e bobidibidi fela, e e dumadumang; a mo dikanyetsa, a mo disa, a mo direla jaaka nyetse ya leitlho la gagwe.

¹¹Jaaka ntswi yo motona yo o tleng a fudue setlhaga sa gagwe a bokabokele mo godimo ga mamphorwana a gagwe, ene a ba tsharololele diphuka tsa gagwe, a ba tsaya, a ba rwala mo diphukeng tsa gagwe;

¹²Jehofa a le esi a ba goga, go se na modimo ope wa seeng nae.

¹³A mo palamisa mafelong a a godimo a lefatshe, a ja totafalo ya naga; a mo ntshetsa dinotshe mo lefikeng, le lookwane mo lefikeng la legakwa.

¹⁴Madila a dikgomo le maši a dinku a na le mafura a dikwanyana, le diphelefu tsa losika lwa Bašane le dipodi di na le mafura a diphilo tsa mabele; ka madi a loungo lwa mofine wa nwa bojalwa.

¹⁵Mme Ješurune a nona, a raga; o nonne, o enne, o borethe; foo a latlha Modimo o o mo dirileng, a kobela tlase lefika la poloko ya gagwe.

¹⁶Ba ne ba tlhotlheletsa lefufa la one ka medimo ya seeng, ba o gakatsa ka tse di makgapha.

¹⁷Ba ne ba isetsa badimo ditlhabelo, ba e neng e se Modimo ope, e le medimo e ba neng ba sa e itse, medimo e e sa tswang go tlhaga, e borra ba lona ba ne ba sa e tshabe.

¹⁸Lefika le le go tsetseng o le tlhokomologile, o lebetse Modimo o o go belegeng.

¹⁹Jehofa a go bona, a ba ferogela sebete ka ntlha ya kgakatso ya bomorwawe le bomorwadie.

²⁰A re: Ke tlaa ba subela sefatlhogo sa me, ke tlaa bona gore bokhutlo jwa bone e tlaa nna eng; gonne ke losika lo lo lesoko, bana ba ba se nang boikanngo.

²¹Ba nkhufantse ka se e seng Modimo; ba nkgakaditse ka maithamako a bone; le nna ke tlaa ba tlhotlheletsa lefufa ka ba e seng tšhaba; ke tlaa ba gakatsa ka morafe o o seeleele.

²²Gonne molelo o tshubilwe mo bogaleng jwa me, o fisetsa kwa moleteng o o kwa tengteng, o laila lefatshe le totafalo ya lone, o tshuba metheo ya dithaba.

²³Ke tlaa koelela masula mo go bone; ke tlaa feletsa metswi ya me mo go bone.

²⁴Ba tlaa fediwa ke tlala, ba tlaa rungwa ke mogote o o tutumang, le tshenyego e e galakang; ke tlaa ba tsosetsa meno a dibatana, le botlhoko jwa dilelemedi tsa lorole.

²⁵Kwa ntle tšhaka e tlaa thopa, mme mo matlwaneng a a kwa teng therego; go tlaa senya wa lekau le wa kgarebane, seanyi le monna yo mmududu.

²⁶Ke rile: Ke tlaa ba gasamisetsa kwa kgakala, ke khutlisa kgakologelo ya bone mo bathong.

²⁷Fa nkabo ke ne ke sa boife kgakatso ya mmaba, e tle e re kgotsa baganetsi ba bone ba gopola ka go sele, e se re kgotsa ba re: Go tsholetsegile letsogo la rona, mme selo se sotlhe fela Jehofa ga a a se dira.

²⁸Gonne ke morafe o o se nang kgakololo, ga go na tlhaloganyo mo go bone.

²⁹A bo ba ka bo ba ne ba le botlhale, mme ba tlhalogantse se, ba ka bo ne ne ba akanya bokhutlo jwa bone!

³⁰Ana a le mongwe fela o ne a tlaa leleka jang ba ba makgolo a some, le ba le babedi ba tshabisa ba ba makgolo a lekgolo fa Lefika wa bone a ka bo a se ka a ba rekisa, le fa Jehofa a se ka a ba neelela?

³¹Gonne lefika la bone ga le a nna jaaka Lefika wa rona, le e leng bone baba ba rona ka bosi e le baatlhodi.

³²Gonne mofine wa bone ke wa mofine wa Sotoma, wa matlhagare a Gomora; loungo lwa bone lwa mofine ke loungo lo lo mogau, le masitlha a bone ke a a galakang.

³³Bojalwa jwa bone jwa mofine ke botlhoko jwa dikgogela, ke botlhoko jo bo bolalome jwa dišaušawane.

³⁴Selo se, a ga se a bewa mo polokelong fa go nna, se kaneletswe mo mahumong a me?

³⁵Pusoloso ke ya me, le tefetso, mo lobakeng lo lonao lwa bone lo tlaa relelang ka lone; gonne letsatsi la thekisego ya bone le gaufi, le dilo tse di nang le go ba wela di tlaa akofa.

³⁶Gonne Jehofa o tlaa atlhola batho ba gagwe, o tlaa ikwatlhaya ka ga batlhanka ba gagwe mogang o bonang fa thata ya bone e ile, mme go se na ope yo o setseng, le fa e le yo o tswaletsweng kgotsa yo o lesiwang a itsamaela fela.

³⁷O tlaa re: Medimo ya bone e fa kae, e bong lefika le ba ne ba le ikantse;

³⁸e e jeleng mafura a ditlhabelo tsa bone, ya nwa bojalwa jwa mofine jwa bone jwa tshupelo e e nowang. A e nanoge e lo thuse, e nne phemelo ya lona.

³⁹Bonang jaana, fa e le Nna one, e bong Nna, mme go se na Modimo ope le nna; ke a bolaya, ke bile ke a tshedisa; ke ntshitse ntho, ke bile ke a fodisa; ga go na ope yo o ka gololang mo seatleng sa me.

⁴⁰Gonne ke tsholeletsa letsogo la me legodimong, ke re, jaaka ke tshela ka bosakhutleng,

⁴¹fa ke lootsa tšhaka ya me e e šadiang, fa letsogo la me le tshwara katlholo; ke tlaa ipusolosetsa mo babeng ba me, ke itefetsa mo go bone ba ba nkilang.

⁴²Metswi ya me ke tlaa e tagisa ka madi, tšhaka ya me e tlaa ja nama; ka madi a ba ba bolailweng, le a batshwarwa, a a tswang tlhogong ya magosana a mmaba.

⁴³Lona merafe, itumeleng le batho ba gagwe; gonne o tlaa lefetsa madi a batlhanka ba gagwe, o tlaa iposolosetsa mo babeng ba gagwe, mme o tlaa direla lefatshe la gagwe, le batho ba gagwe, tefololo.”

⁴⁴Moše a tla, a bua mafoko otlhe a sefela se mo ditsebeng tsa batho, ene, le Hošea morwa Nune.

⁴⁵Moše a wetsa mafoko otlhe a go a bua le Baiseraele botlhe.

⁴⁶A ba raya, a re: “Tlhomang dipelo tsa lona mo mafokong otlhe a molao o, a ke lo a itsiseng gompieno, go tla lo a bolelela bana ba lona go a dirafatsa.

⁴⁷Gonne ga se lefela mo go lona; ka ke botshelo jwa lona, mme lo tlaa lelefatsa malatsi a lona ka sone selo se mo lefatsheng le lo kgabaganyang Joretane lo ya kwa go lone go le rua.”

⁴⁸Jehofa a bua le Moše ka lone letsatsi leo, a re:

⁴⁹“Tlhatloga thaba e ya Abarime, o ye thabeng ya Nebo, e e mo lefatsheng la Moabe, e e lebaganyeng le Jeriko; mme o bone lefatshe le Kanana, le ke le nayang bana ba Iseraele go le rua.

⁵⁰O swele gone mo thabeng e o e tlhatlogang, o phuthelwe kwa bathong ba gaeno; jaaka Arone mogoloo a ne a swela mo thabeng ya Hore, a phuthelwa bathong ba ga gabo.

⁵¹Gonne lo no lwa nteofela mo gare ga bana ba Iseraele fa metsing a Meriba wa Kateše, mo nageng ya Tsine; gonne lo ne lo se kwa lwa intshepisa mo gare ga bana ba Iseraele.

⁵²Ka jalo o tlaa bona lefatshe fa pele ga gago; mme ga o ketla o ya gone mo lefatsheng le ke le nayang bana ba Iseraele.”