Deuteronomy 33

¹E ke yone tshegofatso e Moše monna wa Modimo o ne a segofatsa bana ba Iseraele ka yone, pele ga loso lwa gagwe.

²A re: “Jehofa o ne a tswa kwa Sinai, a ba tlhabela a tswa mo Seire, a phatsima a betlama a le mo thabeng ya Parane, a bo a tswa mo makgolong a makgolo mantsi a baitshepi, ka fa ntlheng ya gagwe ya letsogo le legolo ga bo go le molao o o ba tutumelang molelo.

³Ee, o a di rata ditšhaba, Baitshepi ba gagwe botlhe ba mo seatleng sa gago; ba ne ba dula fa dinaong tsa gago; mongwe le mongwe o tlaa amogela mafoko a gago.

⁴Moše o ne a re laolela molao, e le boswa jwa phuthego ya ga Jakobe.

⁵Ene e ne e le kgosi mo Ješurune, ka ditlhogo tsa batho di phuthwa, ditsho tsotlhe tsa Iseraele di le mmogo.

⁶A Rubene a tshele a se ka a swa; le fa go ntse jalo a batho ba gagwe ba nne babotlana.”

⁷E ke yone tshegofatso ya ga Juta, a re: “Jehofa, utlwa lentswe la ga Juta, o mo lere mo bathong ba ga gabo; o ne a itwela ka mabogo a gagwe, wena o tlaa nna thuso go mo tlhabantsha le baba ba gagwe.”

⁸Ka ga Lefi, a re: “Thumime wa gago, le Urime wa gago ba na le ene yo o mo ratang, ene yo o ne wa mo leka kwa Masa, yo o ne wa ganela nae kwa metsing a Meriba.

⁹Yo o ne a bua ka ga rraagwe, a re: ‘Ga ke a mmona,’ le ka ga mmaagwe; le gone ga a ka a re bomorwa rraagwe ke bomangmang; le gone ga a ka a itse ba e leng bana ba gagwe, gonne ba tlhokometse lefoko la gago, ba tshegeditse kgolagano ya gago.

¹⁰Ba tlaa ruta Jakobe dikatlholo tsa gago, le Iseraele molao wa gago; ba tlaa baya maswalo fa pele ga gago, le tshupelo e e fisiwang e le mmogo mo sebesong sa gago.

¹¹Jehofa, segofatsa dithoto tsa gagwe, o amogele tiro ya diatla tsa gagwe; ba ba mo tsogologelang o phololetse lotheka lwa bone, le lwa ba ba mo ilang, gore ba se ka ba tlhola ba ema.”

¹²Ka ga Benjamine, a re: “Moratwa wa ga Jehofa o tlaa aga mo polokegong fa go ene; o tlhola o mmipile motshegare otlhe, o ntse fa gare ga magetla a gagwe.”

¹³Ka ga Josefe, a re: “A lefatshe la gagwe le segofadiwe ke Jehofa, ka dilo tse di tlhokegang tsa legodimo, ka monyo, le ka boteng jo bo namaletseng kwa tlase,

¹⁴le ka dilo tse di tlhokegang tsa loungo lwa letsatsi, ka dilo tse di tlhokegang tse di golang le dikgwedi,

¹⁵le ka dilo tse di tlhophegileng tsa dithaba tsa bogologolo jo bo feteletseng, ka dilo tse di tlhokegang tsa makhubu a a sa yeng kae.

¹⁶Le ka dilo tse di tlhokegang tsa lefatshe le botlalo jwa lone, le bopelo e monate jwa gagwe yo o ne a agile mo setlhareng, a tshegofatso e tle mo tlhogong ya ga Josefe, le mo phogong ya gagwe yo o ne a lomologanye le bomorwa rraagwe.

¹⁷Leitibolo la kgomo ya pholo ya gagwe, borena ke jwa gagwe; dinaka tsa gagwe ke dinaka tsa nare; o tlaa fegolela ka tsone ditšhaba tsotlhe fela, e bong dikhutlo tsa lefatshe, bone ke ba makgolo a makgolo, a ba ga Eferaime, le makgolo a makgolo a ba ga Manase.”

¹⁸Ka ga Sebulone, a re: “Itumele wena Sebulone, iumele mo go bololeng ga gago; le wena Isakare mo megopeng ya gago.

¹⁹Ba tlaa biletsa ditšhaba kwa thabeng; ba tlaa isa ditlhabelo tsa tshiamo gone; gonne ba tlaa anya letlotlo la mawatle, le mahumo a a fitlhegileng a mošawa.”

²⁰Ka ga Gate, a re: “A go segofale yo o atlhamolosang Gate; o agile jaaka tau e namagadi, o gagola letsogo, ee, le yona phogo.

²¹Kabelo ya ntlha a e ikgethela, gonne go ne go beilwe kabelo ya motlhoma molao gone; mme a tla le ditlhogo tsa batho a diratsa tshiamiso ya ga Jehofa, le dikatlholo tsa gagwe le Iseraele.”

²²Ka ga Dane, a re: “Dane ke ngwana wa tau, yo o tlolang a tswa kwa Bašane.”

²³Ka ga Nafetali, a re: “Wena Nafetali, yo o kgotsheng letlhogonolo, le yo o tletseng tshegofatso ya ga Jehofa, o rue ntlha ya bophirimatsatsi le borwa.”

²⁴Ka ga Ašere, a re: “A Ašere a segofale ka bana, a lebosegele bomorwa rraagwe, a ine lonao lwa gagwe mo lookwaneng.

²⁵Ditlhako tsa gago di tlaa nna tshipi le kgotlho; mme fela jaaka malatsi a gago a ntse, thata ya gago e tlaa nna fela jalo.

²⁶Ješurune! ga go ope yo o tshwanang le Modimo o o palamelang magodimo go go thusa, le ka tlotlomalo ya one mo loaping.

²⁷Modimo wa bosakhutleng ke boago jwa gago mme ka fa tlase ga mabogo a a sa yeng kae, o ne wa leleka, wa kgarametsa mmaba, fa pele ga gago, a ba a re: Senya.

²⁸Iseraele o agile mo polokegong, motswedi wa ga Jakobe o osi mo lefatsheng la mabele le bojalwa jwa mofine; ee, magodimo a gagwe a wa monyo.

²⁹A bo o le sego wena Iseraele! E mang yo o tshwanang nao, e le tšhaba e e bolokwang ke Jehofa, thebe ya thuso ya gago, yo o bileng a le tšhaka ya borena jwa gago! Baba ba gago ba tlaa go ineela; mme o tlaa gata mafelo a a tlotlometseng a bone.”