Joshua 10

¹Jaana ga dirala e rile Atoni-seteke kgosi ya Jerusalema a utlwa fa Jošua a thopile Ai, a bile a o senyeditse ruri; jaaka a diretse Jeriko le kgosi ya teng, a direla jalo Ai le kgosi ya gone; le jaaka banni ba Gibeone ba dirile kagiso le Iseraele, ba bile ba ntse mo go bone,

²ba boifa thata, gonne Gibeone e ne e le motse o mogolo, o ntse jaaka mongwe wa metse ya segosi, le ka gonne o ne o feta Ai, le banna botlhe ba gone e ne e le diganka fela.

³Ke gone ka moo Atoni-seteke kgosi ya Jerusalema a roma kwa go Hohame kgosi ya Heberone, le kwa go Pirame kgosi ya Jaremuthe, le kwa go Jafia kgosi ya Lakiše, le kwa go Debire kgosi ya Egelone, a re:

⁴“Tlang kwano go nna lo nthuse, re yeng go kgemetha Gibeone; gonne o dirile kagiso le Jošua le bana ba Iseraele.”

⁵Ke gone ka moo dikgosi tse tlhano tsa Baamore, e bong kgosi ya Jerusalema, le kgosi ya Heberone, le kgosi ya Jaremuthe, le kgosi ya Lakiše, le kgosi ya Egelone, tsa phuthega, tsa bolola le dintwa tsotlhe tsa tsone, tsa ya tsa thibelela Gibeone, tsa o tlhasela.

⁶Banna ba Gibeone ba roma kwa go Jošua kwa bothibelelong jwa Gilegale, ba re: “O se ka wa repisa letsogo la gago mo batlhakeng ba gago, o re itlhaganelele, o tle go re golola, le go re thusa, gonne dikgosi tsotlhe tsa Baamore, tse di agileng mo lefatsheng la makgabana, di re phuthegetse go tlhabana le rona.”

⁷Jošua a tlhatloga mo Gilegale, ene le batho botlhe ba ntwa nae, le diganka tsotlhe tse di pelokgale.

⁸Jehofa a raya Jošua a re: “O se ka wa boifa, gonne ke ba tsentse mo seatleng sa gago; ga go ketla go ema motho ope wa bone fa pele ga gago.”

⁹Ke gone Jošua a ba wela ka tshoganetso ka a letse a tsamaya bosigo jotlhe a tswa Gilegale.

¹⁰Jehofa a ba feretlha fa pele ga Iseraele, a ba bolaya ka polao e kgolo kwa Gibeone, a ba konatelela ka tsela ya botlhatlogo jwa Bethehorone, a ba kgemetha go ya go fitlha kwa Aseka le kwa Maketa.

¹¹Ga dirala, ya re ka ba tshaba fa pele ga Iseraele, ka ba le mo phologong ya Bethehorone, Jehofa a ba usetsa maje a magolo a tswa legodimong go ya go fitlha kwa Aseka, mme ba swa. Ba ba suleng ka sefako ba nna bantsi go feta ba bana ba Iseraele ba ba bolaileng ka tšhaka.

¹²Foo Jošua a bua le Jehofa ka tsatsi le Jehofa o neetseng Baamore mo seatleng sa bana ba Iseraele ka lone, a bua mo ponong ya Iseraele, a re: “Wena Letsatsi, sisibala godimo ga Gibeone, le wena Kgwedi mo molapong wa Aijalone.”

¹³Letsatsi la sisibala, le kgwedi ya ema, ga tsamaya morafe wa ipusolotsetsa baba ba one. Moo, a ga go a kwalwa mo lokwalong lwa ga Jašare? Letsatsi la ema gare ga legodimo, le se ka la itlhaganelela go phirima e ka ne e le ka tsatsi lotlhe fela.

¹⁴Go ne go se na letsatsi lepe le le tshwanang le leo gope, pele ga lone le fa e le morago ga lone, le Jehofa o reeditseng lentswe la motho ka lone, gonne Jehofa o ne a tlhabanela Iseraele.

¹⁵Jošua a boela kwa bothibelelong kwa Gilegale, a na le Baiseraele botlhe.

¹⁶Dikgosi tse tlhano tseo tsa tshaba, tsa ya tsa iphitlha mo logageng lo lo kwa Maketa.

¹⁷Mme ga bolelelwa Jošua ga twe: “Dikgosi tse tlhano di bonywe di iphitlhile mo logageng kwa Maketa.”

¹⁸Mme Jošua a re: “Hidikololelang maje a magolo mo molomong wa logaga, mme lo beye banna fa go lone go di lebelela;

¹⁹mme lona lo se ka lwa diega; lo konatelele baba ba lona, lo bo lo bolaye ba ba fa moraga mo go bone; lo se ka lwa ba leseletsa ba tsena mo metseng ya bone, gonne Jehofa Modimo wa lona o ba tsentse mo diatleng tsa lona.”

²⁰Ga dirala ya re Jošua le bana ba Iseraele ba sena go wetsa go ba bolaya ka polao e kgolo thata, ga tsamaya ba fela, le masalela a a setseng a ne a tsenye mo metseng e e thekeleditsweng,

²¹batho botlhe ba boela kwa go Jošua mo bothibelelong kwa Maketa ka kagiso, go se na ope yo o ka lelenyetsang bana ba Iseraele loleme lwa gagwe.

²²Foo Jošua a re: “Thibololang molomo wa logaga, lo ntshetse dikgosi tseo tse tlhano kwa ntle, di tle kwano go nna.”

²³Ba dira jalo, ba mo ntshetsa dikgosi tseo tse tlhano mo logageng, kgosi ya Jerusalema, le kgosi ya Heberone, le kgosi ya Jaremuthe, le kgosi ya Lakiše le kgosi ya Egelone.

²⁴Ga dirala ya re ba ntsheditse dikgosi tseo kwa go Jošua, Jošua a bitsa banna botlhe ba Iseraele, a raya ditlhogo tsa banna ba ntwa ba o ne a tsamaile nabo, a re: “Atamelang lo beye dinao tsa lona mo dithamong tsa dikgosi tse.” Ba atamela ba baya dinao tsa bone mo dithamong tsa tsone.

²⁵Mme Jošua a ba raya a re: “Lo se ka lwa boifa, le fa e le go tseana; lo nne thata le pelokgale, gonne Jehofa o tlaa direla baba botlhe ba lona jalo, ba lo tlhabanang nabo.”

²⁶Morago ga moo Jošua a di bolaya, a di otlela, a di pega mo ditlhareng di le tlhano; tsa tlhola di lepeletse mo ditlhareng go ya maitseboeng.

²⁷Ga dirala ya re letsatsi le ya phirimong, Jošua a laola, gore ba di pagolole mo ditlhareng, ba di latlhela mo logageng lo di ne di iphitlhile mo go lone, ba baya maje a magolo fa molomong wa logaga, nako e sa le eno.

²⁸Jošua a thopa motse wa Maketa ka tsatsi leo, a o kgemetha ka bojetla jwa tšhaka, le kgosi ya one; a ba senyetsa ruri le mewa yotlhe e e mo go one, ga a ka a tlogela ope; a direla kgosi ya Maketa jaaka a ne a diretse kgosi ya Jeriko.

²⁹Jošua a tswa mo Maketa, a na le Baiseraele botlhe, ba fetela kwa Libena, mme ba tlhasela Libena.

³⁰Le one Jehofa a o tsenya mo atleng sa Iseraele, le kgosi ya one; a o kgemetha ka bojetla jwa tšhaka, le batho botlhe ba ba mo go one; ga a a ka a tlogela ope mo go one; a direla kgosi ya one jaaka a ne a diretse kgosi ya Jeriko.

³¹Jošua a tswa mo Libena, a na le Baiseraele botlhe, ba fetela kwa Lakiše, ba o thibelela, ba o tlhasela;

³²Jehofa a tsenya Lakiše mo seatleng sa Iseraele, a o thopa ka tsatsi la bobedi, a o kgemetha ka bojetla jwa tšhaka, le batho botlhe ba ba mo go one, jaaka tsotlhe tse o ne a di diretse Libena.

³³Foo Horame kgosi ya Gesere a tla go thusa Lakiše; Jošua a mo kgemetha le batho ba gagwe, ga tsamaya a se ka a mo tlogelela ope.

³⁴Jošua a tswa mo Lakiše, a na le Baiseraele botlhe, ba fetela kwa Egelone; ba o thibelela, ba o tlhasela;

³⁵ba o thopa ka tsatsi leo, ba o kgemetha ka bojetla jwa tšhaka, mme batho botlhe ba ba mo go one a ba senyetsa ruri ka tsatsi leo, jaaka tsotlhe tse o ne a di diretse Lakiše.

³⁶Jošua a tswa mo Egelone, le Baiseraele botlhe ba na nae, ba ya Heberone, ba o tlhasela;

³⁷ba o thopa, ba o kgemetha ka bojetla jwa tšhaka, le kgosi ya one, le metse yotlhe ya one, le batho botlhe ba ba mo go one; ga a ka a tlogela ope, jaaka tsotlhe tse o ne a di diretse Egelone, a o senyetsa ruri, le batho botlhe ba ba mo go one.

³⁸Jošua a boela kwa Debire, a na le Baiseraele botlhe; ba o tlhasela,

³⁹mme a thopa, le kgosi ya one, le metse yotlhe ya one; ba e kgemetha ka bojetla jwa tšhaka, ba senyetsa ruri batho botlhe ba ba mo go yone; ga a ka a tlogela ope: jaaka a ne a diretse Heberone, a direla Debire jalo, le kgosi ya one; le jaaka a diretse Libena, le kgosi ya one.

⁴⁰Jalo Jošua a gailela ruri lefatshe lotlhe la makgabana, le la borwa, le la sekhuti, le la meripo, le dikgosi tsotlhe tsa gone; ga a ka a tlogela ope; a senyetsa ruri botlhe ba ba hemang mowa, jaaka Jehofa Modimo wa Iseeraele a laotse.

⁴¹Jošua a ba kgemetha go tswa Kateše-barenea go ya fela kwa Gasa, le lefatshe lotlhe la Gošene, go ya fela kwa Gibeone.

⁴²Dikgosi tse tsotlhe le mafatshe a tsone, Jošua a di thopa ka lobaka lo le longwe fela, gonne Jehofa Modimo wa Iseraele o ne a tlhabanela Iseraele.

⁴³Jošua a boela kwa bothibelelong kwa Gilegale, a na le Baiseraele botlhe.