Joshua 9

¹Ga dirala e rile dikgosi tsotlhe tse di kwa moseja ga Joretane di utlwela tirafalo e, e bong dikgosi tse di mo lefatsheng la makgabana, le tse di mo go le le kwa sekhuting, le tse di mo go le le ikamileng lewatle le legolo bolebagana le Lebanone, e bong Bahite, Baamore, Bakanana, Baperise, Bahife le Bajebuse;

²tsa iphuthela go tla go tlhabana le Jošua le Baiseraele, tsa ya seoposengwe fela.

³E rile banni ba Gibeone ba utlwela se Jošua o ne a se diretse Jeriko le Ai,

⁴le bone ba dira ka boferefere, ba ya ba ipaya barongwa, ba baya dikgetse tse dikgologolo mo dieseleng tsa bone, ba tsaya makuka a a onetseng a bojalwa a a kgautlhegileng, a a tlamakeletsweng;

⁵ba rwala ditlhako tse dikgologolo tse di sosobaganyeng, ba apara diaparo tse di onetseng, le senkgwe sa bone sa mofago se ne se omeletse, se bile se kubile.

⁶Ba ya kwa go Jošua kwa bothibelelong kwa Gilegale, ba raya ene le batho ba Iseraele, ba re: “Re tswa lefatsheng le le kgakala, mme ra re lo dire kgolagano le rona.”

⁷Banna ba Iseraele ba raya Bahife ba re: “Motlhamongwe lo bo o agile mo gare ga rona fela; re ka dira kgolagano le lona jang?”

⁸Ba raya Jošua ba re: “Re batlhanka ba gago.” Jošua a ba raya a re: “Lo bomang? Lo tswa kae?”

⁹Ba mo raya ba re: “Batlhanka ba gago ba tswa lefatsheng le le kgakala thata ka ntlha ya leina la ga Jehofa Modimo wa gago; gonne re utlwile tumedi ya gagwe le tsotlhe tse o di dirileng kwa Egepeto.

¹⁰Le tsotlhe tse o di diretseng dikgosi tse pedi tsa Baamore, tse di ne di le kwa moseja ga Joretane, Sihone kgosi ya Hešebone le Oge kgosi ya Bašane, yo o ne a le kwa Ašetarothe.

¹¹Bagolwane ba rona le banni botlhe ba lefatshe la rona ba bua le rona, ba re: ‘Tseelang loeto lwa lona mofago, lo ye go ba kgatlhantsha lo ba reye lo re: Re batlhanka ba lona; jaana dirang kgolagano le rona.’

¹²E rile re bolola re tla kwano go lona, senkgwe se sa rona ra se tsaya mofago se le molelo se tswa mo matlong a rona ka tsatsi leo; mme jaana bonang se omeletse se bile se kubile.

¹³Le makuka a, re a tshetse a tlala, a le maša; mme bonang, a kgautlhegile. Diaparo tse tsa rona, le ditlhako tsa rona, di onetse ka ntlha ya boleele jo bogolo jwa loeto.”

¹⁴Banna bao ba tsaya ga mefago ya bone; mme ba se ka ba lopa kgakololo mo molomong wa ga Jehofa.

¹⁵Jošua a dira kagiso nabo, a ba a dira kgolagano nabo, go ba lesa ba tshela, le dikgosana tsa phuthego tsa ba ikanela.

¹⁶Ga dirala ya re go fetile malatsi a le mararo ba sena go dira kgolagano nabo, ba utlwa, go twe, ba bapile nabo, ba agile mo gare ga bone.

¹⁷Bana ba Iseraele ba tsamaela pele, ba fitlha kwa metseng ya bone ka letsatsi la boraro. Jaana metse ya bone e ne e le Gibeone, le Kefira, le Beerothe, le Kiriathe-jearime.

¹⁸Bana ba Iseraele ba se ka ba ba kgemetha, ka dikgosana tsa phuthego di ba ikanetse ka Jehofa Modimo wa Iseraele. Phuthego yotlhe ya ngongoregela dikgosana.

¹⁹Dikgosana tsotlhe tsa raya phuthego yotlhe, tsa re: “Re ba ikanetse ka Jehofa Modimo wa Iseraele; jaana ga re kake ra ba ama.

²⁰Re tlaa ba direla jaana, re ba lesa ba tshela; gobale bo se ka jwa tla go re wela ka ntlha ya ikano e re ba ikanetseng ka yone.”

²¹Dikgosana tsa ba raya tsa re: “A ba lesiwe ba tshele.” Jalo ba tswa barwaledi ba dikgong, le bagi ba metsi ba phuthego yotlhe, jaaka dikgosana di buile nabo.

²²Jošua a ba bitsa, a bua nabo, a re: “Lo re tsieleditseng, lwa re: ‘Re kgakala thata le lona;’ le mororo lo agile mo gare ga rona?

²³Ke gone jaana lo hutsegile, ga go ketla go tlhokafalela bangwe ba lona go nna batlhanka gope, barwaledi ba dikgong, le bagi ba metsi bantlo ya Modimo wa me.”

²⁴Ba fetola Jošua, ba re: “Ke ka gonne ga bolelelwa batlhanka ba gago ka tlhomamo jaaka Jehofa Modimo wa gago a laotse Moše motlhanka wa gagwe, gore a lo neye lefatshe lotlhe, le gore a senye banni botlhe ba lefatshe fa pele ga lona; ke gone ka moo re ne ra ipoifela thata ka ntlha ya lona, mme ra dira selo se.

²⁵Mme jaana, bona, re mo seatleng sa gago: se se molemo, le se se siameng mo matlhong a gago go se re direla, o se dire fela.”

²⁶Mme a ba direla jalo, a ba golola mo seatleng sa bana ba Iseraele, gore ba se ka ba ba bolaya.

²⁷Ka tsatsi leo Jošua a ba dira barwadi ba dikgong, le bagi ba metsi ba phuthego, le ba sebeso sa ga Jehofa, nako e sa le eno, mo felong fa o ne a tlaa go itshenkela.