Joshua 5

¹Ga dirala e rile dikgosi tsotlhe tsa Baamore tse di ne di le mosejeng ga Joretane ntlheng ya bophirimatsatsi, le dikgosi tsotlhe tsa Bakanana tse di ne di le fa lewatleng, di utlwa fa Jehofa a kgadisitse metsi a Joretane fa pele ga bana ba Iseraele, go tsamaya ba tshela, pelo tsa tsone tsa nyerega, mme ga bo go sa tlhole go le mowa mo go bone, ka ntlha ya bana ba Iseraele.

²Ya re ka lobaka loo Jehofa a raya Jošua a re: “Itirele dithipa tsa makgethu, o rupise bana ba Iseraele lwa bobedi.”

³Jošua a itirela dithipa tsa makgethu, a rupisa bana ba Iseraele kwa Gibea-haralothe.

⁴Se ke sone se Jošua o ne a rupisa ka ntlha ya sone: batho botlhe ba ba ne ba tswa Egepeto, ba e leng banna, e bong batlhabani botlhe ba ntwa, ba ne ba swetse mo nageng mo tseleng, ba sena go tswa mo Egepeto.

⁵Gonne batho botlhe ba ba duleng ba ne ba rupisitswe; mme batho botlhe ba ba tsaletsweng mo nageng, mo tseleng ba tswa Egepeto bone, ba ne ba sa rupisiwa.

⁶Gonne bana ba Iseraele ba ne ba sepela mo nageng ka dinyaga di le 40 ga tsamaya morafe otlhe, e bong batlhabani ba ntwa botlhe, ba ba duleng mo Egepeto, ba nyelediwa, ka ba se ka ba reetsa lentswe la ga Jehofa; ba Jehofa o ne a ba ikanela, a re: Ga a ketla a ba leseletsa ba bona lefatshe le Jehofa o ne a le ikanetse borraabo, a re o tlaa le ba naya, lefatshe le le elang Maši le dinotshe.

⁷Bana ba bone ba o ba tsositseng mo boemong jwa bone, Jošua a rupisa bone, gonne ba ne ba sa rupisiwa, ka ba se ka ba ba rupisa mo tseleng.

⁸Ga dirala ya re ba sena go wetsa go rupisa morafe otlhe, ba nna fela mo mannong a bone mo botlhaolelong, ba tsamaya ba fola.

⁹Jehofa a raya Jošua a re: “Gompieno ke lo tloseditse kgobo ya Egepeto.” Ke gone ka moo leina la felo foo la bidiwa ga twe, Gilegale, le gompieno.

¹⁰Bana ba Iseraele ba thibelela mo Gilegale; ba ja tlolaganyo ka letsatsi la 14 la kgwedi go le maitseboa, mo dipaleng tsa Jeriko.

¹¹E rile ka moso jaaka ba letse ba jele tlolaganyo, ba ja mabele a magologolo a lefatshe, dipapetlana tsa senkgwe se se sa bedisiwang, le mabele a a gadikilweng, ka tsatsi leo fela.

¹²E rile ka moso, ba letse ba jele mabele a magologolo a lefatshe, mana a khutla; mme bana ba Iseraele ba se ka ba tlhola ba bona mana; mme ba ja loungo lwa lefatshe la Kanana ka ngwaga oo.

¹³Ga dirala ya re Jošua a le fa Jeriko, a tsholetsa matlho a gagwe a leba, mme a fitlhela go eme monna mongwe a lebaganye nae, a tshotse tšhaka ya gagwe e ekilwe ka seatla; mme Jošua a ya kwa go ene, a mo raya, a re: “A o ntlheng ya rona, kgotsa a ntlheng ya baba ba rona?”

¹⁴A re: “Nnyaa; mme ke tsile ke le kgosana ya ntwa ya ga Jehofa.” Jošua a wela ka sefatlhogo fa fatshe, a mo obamela, a mo raya, a re: “Morena wa me o raya motlhanka wa gagwe a reng?”

¹⁵Kgosana ya ntwwa ya ga Jehofa ya raya Jošua, ya re: “Rola setlhako sa gago; gonne felo fa o emeng gone go boitshepo.” Jošua a dira jalo.