Job 10

¹“Mowa wa me o tennwe ke botshelo jwa me; ke tlaa golola go itoka ga me; ke tlaa bua ka bogalaka jwa mowa wa me.

²Ke tlaa raya Modimo ke re, O se ka wa ntshekisa; o nkaele ka fa o ganelang le nna ka gone.

³A go molemo mo go wena fa o ka patika, fa o ka nyatsa tiro ya diatla tsa gago, mme o phatsimela kgakololo ya baikepi?

⁴A o na le matlho a nama, kgotsa a o bona jaaka motho a bona?

⁵A malatsi a gago a tshwana jaaka malatsi a motho, kgotsa dinyaga tsa gago, jaaka malatsi a motho,

⁶fa e bo ne ne o botsa ka ga boikepo jwa me, o hukutsa ka ga boleo jwa me,

⁷le fa o ntse o itse fa ke se boikepo; le gone go se na ope yo o ka gololang mo seatleng sa gago?

⁸Diatla tsa gago di mpopagantse, tsa ntshwatshwaela fela gotlhe; le fa go ntse jalo o a ntshenya.

⁹Ke a go rapela, a ko o nkgakologelwe go re o mpopile jaaka letsopa; mme a o tlaa ba o mpusetsa mo loroleng?

¹⁰A ga o a nthela jaaka maši, wa nthemisa jaaka madila a a loileng.

¹¹O nkapesitse letlalo le nama, o ntshwaragantse ka marapo le mesifa.

¹²O nneile botshelo le botsalano, le pabalelo ya gago e tlametse mowa wa me.

¹³“Le fa go ntse jalo, dilo tse o ne wa di loba mo pelong ya gago; ke a itse fa selo se, se na nao;

¹⁴fa ke leofa, foo o a tle o ntlhokomele, mme ga o ketla o nkgolola mo boikepong jwa me.

¹⁵Fa ke le boikepo, go tlaa bo go latlhega nna; mme fa ke le tshiamo, le fa go ntse jalo ga nketla ke tsholetsa tlhogo; ka ke tletse ditlhong, ke ntse ke lebile patikego ya me.

¹⁶Ka tlhogo ya me e ikgoletsa, o a tle o ntsome jaaka tau; gape o iponatse kgakgamatso mo go nna.

¹⁷O ntšhafaletsa basupi ba gago ba ba nnayang molato, o ntotisetse kgakalo ya gago; ntwa e e tlhomaganyeng le ntwa e tlhabana le nna.

¹⁸“E le foo o nntsheditse eng mo sebopelong? Nka bo ke ne ke sule, leitlho lepe le koo le se ka la mpona.

¹⁹Nka bo ke ne ke tshwana jaaka fa nka bo ke seyo gope; nka bo ke ne ke tsewa mo sebopelong ka isiwa phupung.

²⁰A malatsi a me ga a mabotlana? Ke gone khutla, mme o ntese gore ke tle ke ikgomotse go le gonnye,

²¹ke ise ke ye kwa ke se ketlang ke boa gone, e bong kwa lefatsheng la lefifi le la moriti wa loso;

²²lefatshe la lefifi le le kwenneng jaaka lefifi tota; lefatshe la moriti wa loso le le se nang thulagano, le kwa lesedi le ntseng jaaka lefifi gone.”