Job 9

¹Foo Jobe a fetola a re:

²“Le gale ke a itse fa go ntse jalo, mme motho o ka siama jang fa pele ga Modimo?

³Fa a rata go ganela nao, ga a kake a o fetola ka ga molato o le mongwe fela mo go e e makgolo a lesome.

⁴O botlhale mo pelong, o thata mo nonofong; e mang yo o o ithatafaleditseng mme a tlhogonolofala?

⁵O o sutisang dithaba, di se ke di itse, mogang o di pitikololang mo bogaleng jwa one.

⁶O o reketlisang lefatshe, le tloge felong ga lone, le maotwana a lone a rorome.

⁷O o laolang letsatsi, mme le se ke le tlhabe; o bo o kane dinaledi.

⁸O o phuthololang magodimo o le osi, o gate makhubu a metsi a lewatle.

⁹O o dirang dinaledi tsa Kgogamasigo, Oriona, Selemela, le matlwana a kwa Borwa.

¹⁰O o dirang dilo tse dikgolo tse di se nang botlhotlhomiso; ee, dilo tse di gakgamatsang tse di se nang palo.

¹¹Bonang, o kgabaganya fa go nna, mme ga ke o bone; le gone o fetele kwa pele, mme ga ke o lemoge.

¹²Bonang, o a thopa, mme e mang yo o ka kganelang? E mang yo o tlaa o rayang a re: ‘O dirang?’

¹³“Modimo ga o ketla o kganelela bogale jwa one kwa morago; bathusi ba moikgogomosi ba ikokobetse fa tlase ga gagwe.

¹⁴Ana nna bogolo jang, ke tlhoka ka fa ke ka o fetolang ka gone, le go itlhophela mantswe a nka ganetsanyang nao ka one.

¹⁵O, le fa ke ne ke le tshiamo, le fa go ntse jalo ke ne ke se ketla ke o fetola, ke ne ke ka kokotlela moganetsi wa me fela.

¹⁶Fa nka bo ke ne ke biditse, mme fa o ne o nkarabile; le fa go ntse jalo ke ne ke se ketla ke dumela fa o reeditse lentswe la me.

¹⁷Gonne o nthobaka ka ledimo la phefo, o ntsifatsa dintho tsa me ka bomo.

¹⁸O gana go nteseletsa ka kgwa setšhe, o ntlatsa ka bogalaka.

¹⁹Fa re bua ka ga thata ya mothata, bonang, o a bo a le fa! Fa e le ka ga tsheko, e mang yo o tlaa ntaolelang lobaka?

²⁰Le fa ke le tshiamo, o o leng molomo wa me o tlaa ntshekisa; le fa ke le boitekanelo o tlaa ntshupa gore ke lesoko.

²¹Le fa ke itekanetse ga ke itlhokomele; ke nyatsa botshelo jwa me.

²²Go tshwana fela; ke gone ke reng, o senya moitekanedi le moikepi.

²³Fa sebetso se bolaya ka tshoganetso, o tlaa sotla ka tshenyegelo ya yo o se nang molato.

²⁴Lefatshe le tsentswe mo seatleng sa baikepi, o khurumetse sefatlhogo sa baatlhodi ba lone; fa e se one, ana e tlaa bo e le mang?

²⁵“Jaanong malatsi a me a bofefo bogolo go motabogi yo o isang dikwalo; a tshabela koo, ga a bone molemo ope.

²⁶A fetile jaaka dikepe tse di hadimang; jaaka ntswi yo motona yo o tsuulalelang phologolo.

²⁷Fa ke re: ‘Ke tlaa lebala boitoko jwa me, ke tlaa apola sefatlhogo se se tlhontseng, ke tlaa nametsega pelo;’

²⁸ke boifa mahutsana a me otlhe, ke a itse fa o se ketla o nkaya go re ga ke na molato.

²⁹Ke tlaa sekisiwa; ke ka ntlha yang fa ke kgokololela lefela?

³⁰Fa ke tlhapa ka metsi a kapoko, ke ba ke intlafatsa diatla mo go ntseng jang;

³¹le fa go ntse jalo, o tlaa nthabuetsa mo moseleng wa metsi, diaparo tse e leng tsa me di tlaa nkila.

³²Gonne one ga se monna jaaka nna, yo ke ka reng ke ka mo fetola, gore re tle re kopane mmogo mo tshekong.

³³Ga go na motsereganyi gare ga rona, yo o ka re bayang seatla roo babedi.

³⁴A o tlose thupa ya one mo go nna, a theregiso ya one e se mpoifise;

³⁵foo ke ne ke tlaa bua, ke sa o boife, gonne mo go nna ka nosi ga ke a nna jalo.