Job 13

¹“Bona, leitlho la me le bonye gotlhe fela mo, tsebe ya me e go utlwile, e go tlhalogantse.

²Se lo se itseng, ke sone se le nna ke se itseng; ga ke kwa tlase ga lona.

³Ruri ke rata ka bua le Mothatayotlhe, ke eletsa go ganetsanya le Modimo.

⁴Lona lo balogi ba maaka lotlhe fela, lo dingaka tse di se nang tiro.

⁵Lo a bo lo ka ka lwa didimala! Mme e ne e tlaa bo e le botlhale mo go lona.

⁶Utlwang jaana kganetsanyo ya me, lo reetse kganelelo tsa dipounama tsa me.

⁷A lo tlaa buelela Modimo ka fa go sa siamang, a lo tlaa buelela one ka tsietso?

⁸A lo tlaa tlhokomela bomangmang jwa one? A lo tlaa ganelela Modimo?

⁹A go ka nna molemo fa o lo keleka? Kgotsa jaaka motho a tle a tsietse motho, a lona lo tlaa tsietsa one jalo?

¹⁰Ruri o ka tla wa lo omanya, fa lo tlhokomela bomangmang jwa batho ka bosaitsiweng.

¹¹A tlotlomalo ya one ga e ketla e lo boifisa, le poitsho ya one ga e ketla e lo wela?

¹²Dipolelo tsa lona tse di itsegeng ke diane tsa melora; dikago tsa phemelo tsa lona ke diphemelo tsa seretse fela.

¹³“Didimalang, lo nte ke bue, go ntlele se se ntlelang fela.

¹⁴Nkoo ke tseelang nama ya me ka meno, ka itsenya botshelo jwa me mo seatleng sa me go reng?

¹⁵Le fa o mpolaya, ke tlaa nna ke o lebelela fela; le fa go ntse jalo ke tlaa gantshetsa ditsela tsa me fa pele ga one.

¹⁶Se le sone e tlaa nna poloko ya me; gonne motho yo o sa reng Modimo sepe ga a ketla a tla fa pele ga one.

¹⁷Utlwang puo ya tlhoafalo, mme a go kakanya ga me go nne mo tsebeng tsa lona.

¹⁸Bonang jaana, ke rulagantse mafoko a me a a sekwang; ke a itse fa ke tlaa siamisiwa.

¹⁹Ene yo o tlaa ganelang le nna e mang? Gonne jaanong fa ke ka didimala fela ke tlaa swa.

²⁰Fa e se dilo di le pedi, o se ka wa di ntirela, foo ga nketla ke iphitlhela sefatlhogo sa gago.

²¹Tlosetsa seatla sa gago kgakala le nna; a theregiso ya gago e se ka ya mpoifisa.

²²Foo o bitse, mme ke tlaa go araba; kgotsa o mme ke bue, mme o mphetole.

²³Maikepo a me le maleo a me a kae? Nkitsise tlolo ya me le boleo jwa me.

²⁴O subelang sefatlhogo sa gago, o ba o nkaya go re ke mmaba wa gago?

²⁵A o tlaa gabea lekakaba le le tsubutlwang, a o tlaa alola phufe ya soma?

²⁶Gonne o kwala dilo tse di galakang ka ga me, o njesa boswa jwa maikepo a bokau jwa me;

²⁷le maoto a me o a tsenya mo disaneng, o tlhokometse ditselana tsotlhe tsa me; o ithalela moralo mo tikologong ya dipato tsa dinao tsa me.

²⁸Le fa ke tshwana le selo se se bodileng se se felang, se se tshwanang le kobo e e jelweng ke motoutwane.”