Job 16

¹Foo Jobe a fetola a re:

²“Ke utlwile dilo di le dintsi tse di ntseng jalo; lo bagomotsi ba lo lapisang lotlhe fela.

³A mafoko a boithamako a ka dirana le bokhutlo? Kgotsa ke eng se se go gakatsang fa e bo ne ne o fetola jaana?

⁴Le nna ke ne ke ka bua jaaka lona; fa mowa wa lona o ka bo o le mo boemong jwa mowa wa me, ke ne ke ka lo gololela mafoko a a lo nyatsang, ke lo thukhuthela tlhogo.

⁵Mme nna, ke ne ke tlaa lo nonotsha ka molomo wa me, le kgomotso ya dipounama tsa me e ne e tlaa kokobetsa bohutsana jwa lona.

⁶Le fa ke bua, bohutsana jwa me ga bo a kokobela; le fa ke ithiba ke a bo ke imologile eng?

⁷Mme jaanong o ntapisitse, o swafaditse lesomo la me lotlhe fela.

⁸O nkudupantse, e le tshupo e e nnyatsang; borole jwa me bo a ntsogologela, bo ntsha tshupo fa pele ga sefatlhogo sa me.

⁹O nkgagotse mo bogaleng jwa one, o mpogisitse; o ntšhenetse meno; moganetsi wa me o šadikanya matlho a gagwe ka nna.

¹⁰Ba nkatlhamoloseditse melomo; ba ntiteile lesama ka kgobo, ba nkgobokanetse go tlhabana le nna.

¹¹Modimo o ntsenya mo seatleng sa ba ba sa reng Modimo sepe, o ntatlhela mo diatleng tsa baikepi.

¹²Ke ne ke le mo boiketlong, mme wa nthobaganya ka bogare, ee, o ntshwere ka thamo a nthubaganya; o bile o ntlhomile, gore ke nne sekonopiwa sa one.

¹³Bahudi ba one ba ntikanyeditse, o fatola diphilo tsa me, a sa rekegele; o tshololela santlhokwe wa me fa fatshe.

¹⁴O mphatlakanya ka go nthubaka, o ntshotlhomelela jaaka seganka.

¹⁵Ke rokeletse letlalo la me letsela la kgetse, ke beile lonaka lwa me mo loroleng.

¹⁶Sefatlhogo sa me se kganatheditswe ke go lela, moriti wa loso o mo dintshing tsa matlho a me;

¹⁷le fa go se na thubakanyo mo diatleng tsa me, le morapelo wa me o le boitsheko.

¹⁸“Lefatshe wee, o se ka wa bipa madi a me, a kgajajego ya me e se bone felo ga boikhutso.

¹⁹Le jaana, bona, mosupi wa me o kwa legodimong, le yo o nkemelang o kwa godimong.

²⁰Ditsala tsa me di a ntshotla, leitlho la me le thelela Modimo dikeledi;

²¹gore o tle o emele tshiamo ya motho mo Modimong, le ya morwa motho mo go wa ga gabo!

²²Gonne e tlaa re dinyaganyana di sena go feta, ke be ke ya tseleng e ke se ketlang ke bowa mo go yone.