Job 27

¹Jobe a ba a tloga gape a tlhaba seane sa gagwe, a re:

²“Jaaka Modimo o tshedile, o o ntloseditseng tshiamelo ya me; le Mothatayotlhe yo o tshwentseng mowa wa me:

³(Gonne botshelo jwa me bo sa ntse bo itekanetse mo go nna le mowa wa Modimo o mo dinkong tsa me);

⁴ruri dipounama tsa me ga di kake tsa bua tshiamololo, le loleme lwa me ga lo ketla lo bua tsietso.

⁵A go nne kgakala le nna fa nka lo siamisa; ga nketla ke itlosa thokgamo ya me, go ba ke tla ke swa.

⁶Tshiamo ya me ke e tshwaretse ruri, ga nketla ke e lesa; ke tlaa re ke sa ntse ke tshedile, pelo ya me ga e ketla e nkgoba.

⁷A mmaba wa me a nne jaaka baikepi, le gone a yo o ntsogologelang a nne jaaka basiamolodi.

⁸Gonne tsholofelo ya yo o sa reng Modimo sepe ke eng, le fa a bona papadi mogang Modimo o tlosang mowa wa gagwe?

⁹A Modimo o tlaa utlwa go goa ga gagwe monna yo, fa pitlagano e tla mo go ene?

¹⁰A o tlaa inatetshetsa Mothatayotlhe, a biletsa kwa Modimong ka metlha yotlhe?

¹¹Ke tlaa lo ruta ka ga letsogo la Modimo; se se kwa go ene Mothatayotlhe ga nketla ke se loba.

¹²Bonang, lona lotlhe ka losi lo se bonye; ke ka ntlha yang lo ithamaketse ruri?”

¹³“E ke yone kabelo ya moikepi mo Modimong, le boswa jwa bapatiki jo ba bo amogelang mo go Mothatayotlhe.

¹⁴Fa bana ba gagwe ba ntsifala, e be e le ba ntsifalela tšhaka fela; lotsalo lwa gagwe ga lo ketla lo kgora dijo.

¹⁵Ba gagwe ba ba setseng ba tlaa fitlhwa mo losong, batlholagadi ba gagwe ga ba ketla ba dira khutsafalo.

¹⁶Le fa a ka koa selefera jaaka lorole, a ba a baakanya diaparo jaaka seretse;

¹⁷o ka di baakanya fela, mme basiami ba tlaa di apara, le ba ba se nang molato ba tlaa kgaogana selefera.

¹⁸O aga ntlo ya gagwe jaaka serurubele, le jaaka loobo lo moleti o lo agang.

¹⁹O itelega a humile, mme e be e le lwa bofelo; a budulole matlho, mme a ba a seyo.

²⁰Ditherego di mo tshware jaaka metsi; ledimo la phefo le mo utswe bosigo.

²¹Phefo ya botlhabatsatsi e mo kgopholele koo, mme a tloge; e mo feele, a tloge mo felong ga gagwe.

²²Gonne Modimo o tlaa mo hureetsa, mme o se ke o rekegele; o ka rata a ka bo a tshaba a tswa mo seatleng sa one.

²³Batho ba tlaa mo opela diatla, ba mo otsa, ba mo ntsha felong ga gagwe.