Job 36

¹Le gone Elihu a tswelela pele, a re:

²“Ntesa go le gonnye, mme ke tlaa go kaela; gonne ke sa na le sengwe se ke se buang ntlheng ya Modimo.

³Ke tlaa ya go tsaya kitso ya me kgakala, ke tlaa kaela Modiri wa me tshiamo.

⁴Gonne ruri mafoko a me ga se a maaka; mongwe yo o itekanetseng mo kitsong o na nao.

⁵Bona, Modimo o nonofile, ga o nyatse ope; o thata mo nonofong ya tlhaloganyo.

⁶Ga o boloke botshelo jwa ba ba bosula; mme o naya ba ba patikwang tshiamelo ya bone.

⁷Ga o tlose matlho a one mo basiaming; mme o ba baya le dikgosi mo setulong sa bogosi ka bosakhutleng, mme ba goletsege.

⁸Fa ba golegwa ka dikeetane, ba ba ba tshwarwa ka megala ya patiko;

⁹foo o ba supetse tiro ya bone le ditlolo tsa bone fa ba dirile ka boikgodiso.

¹⁰Gape o kabololele thuto tsebe ya bone, o laole gore ba bowe mo boikepong.

¹¹Fa ba reetsa, ba o direla, ba tlaa fetisa malatsi a bone mo tlhogonolofalong le dinyaga tsa bone mo monateng.

¹²Mme fa ba sa reetse, ba tlaa nyelela ka tšhaka, ba tlaa swa go se na kitso.

¹³Bone ba ba sa reng Modimo sepe mo pelong ba kokotletsa bogale; ga ba goele thuso fa o ba bofa.

¹⁴Ba tle ba swe mo bokaung, botshelo jwa bone bo felele mo go ba ba itshekologileng.

¹⁵O golola ba ba patikwang ka patiko ya bone; o kabolole ditsebe tsa bone ka pogiso.

¹⁶Ee, o ne a tlaa bo a go ntshitse mo patikegong, a go isa felong fa go atlhameng, kwa go se nang pitlagano gone; mme se se bewang mo lomating lwa gago lwa bojelo se ne se tlaa tlala mahura.

¹⁷“Mme o tletse tshekiso ya baikepi; tshekiso le tekatekanyo di go tshwere.

¹⁸E re ka go na le bogale, o itise gore o se ka wa timediwa ke boikgantsho jwa gago; le gone, a bogolo jwa thekololo bo se go fapose.

¹⁹A dikhumo tsa gago di tlaa lekana, gore o se nne mo patikegong, kgotsa dithata tsotlhe tsa nonofo ya gago?

²⁰O se ka wa eletsa bosigo, e le lobaka lwa batho go kgaolwa mo bonnong jwa bone.

²¹O itise, o se ka wa tlhokomela boikepo, gonne o itshenketse jone bogolo go patikego.

²²Bona, Modimo o dira ka bogodi mo thateng ya one. E mang yo e leng moruti jaaka one?

²³E mang yo o o laoletseng tsela ya one, kgotsa e mang yo o ka reng, o dirile tshiamololo?

²⁴“O gakologelwe go godisa tiro ya one e batho ba e opetseng.

²⁵Batho botlhe ba ntse ba e lebile; motho o e bonela kgakala.

²⁶Bona, Modimo o mogolo, ga re o itse; palo ya dinyaga tsa one e retela go tlhotlhomisiwa.

²⁷Gonne o gogela dithothi tsa metsi godimong, tse di fetogang pula e e tswang mo mouwaneng wa one;

²⁸e loapi lo e thelang, lo e thotheletsa mo bathong ka letlotlo.

²⁹Ee, a mongwe o ka tlhaloganya diphuthologo tsa maru, le tutumo ya mogope wa tsharologo wa one?

³⁰Bona, o phutholola lesedi la one tikologong ya one; o khurumetsa boteng jwa lewatle.

³¹Gonne o atlhola ditšhaba ka dilo tse; o naya batho dijo ka botlalo.

³²O ipipa diatla tsa one ka tladi, o e laela gore e iteye fa go laotsweng.

³³Loratla lwa yone lo bolela ka ga one, le tsone dikgomo lo a di bolelela ka ga ledimo le le tlogang le tla.”