Job 37

¹“Se le sone pelo ya me e a se roromela, e garoge mo felong ga yone.

²Reetsang loratla lwa lentswe la one, le tumo e e tswang mo molomong wa one.

³O e dumisetse fa tlase ga legodimo lotlhe fela, le logadima lwa one o lo gadimisetse kwa dikhutlong tsa lefatshe.

⁴Morago ga lone go dume kodu; o dume ka kodu ya borena jwa one; mme ga o thibe dikgadima mogang kodu ya one e utlwalang.

⁵Modimo o duma kgakgamatso ka kodu ya one, o dira dilo tse dikgolo tse re sa kakeng ra di tlhaloganya.

⁶Gonne o tle o reye kapoko o re: ‘Na mo lefatsheng;’ le pula ya medupe, le marothodi a ya maebana a magolo.

⁷O konela seatla sa motho mongwe le mongwe; gore batho botlhe ba o ba dirileng ba go itse.

⁸Foo diphologolo le dibatana di ye mo maiphitlhong, di nne mo dikutleng tsa tsone.

⁹Ledimo le tle le tswe mo kutleng ya borwa; le serame ntlheng ya botsheka.

¹⁰Dikgapetla tsa metsi di abiwa ka pudulo ya Modimo; mme boatlhamo jwa metsi bo gatsediwe.

¹¹Ee, o belesa leru le le kwenneng metsi; o phutholole leru la one la logadima;

¹²le dikolosiwe ka kgoro ya one gore di tle di dire sengwe le sengwe se o se di laoletseng mo lefatsheng lotlhe le le nnwang.

¹³Le fa o di tlisitse gore di nne kwatlhao, kgotsa go thusa lefatshe la one, kgotsa ka kutlwelobotlhoko.

¹⁴“Jobe, a ko o reetse se; ema fela, o akanye ditiro tse di gakgamatsang tsa Modimo.

¹⁵A o itse ka fa Modimo o tleng o di laye ka gone, mme o phatsimise logadima lwa leru la one ka gone?

¹⁶A o itse go retelediwa ga maru le ditiro tse di gakgamatsang tsa o o leng boitekanelo mo kitsong?

¹⁷Le ka fa diaparo tsa gago di leng bothitho ka gone fa lefatshe le tuuletse fela ka ntlha ya phefo ya borwa?

¹⁸A o ka tsharolola nao loapi lo lo thata jaaka seiponi se se thetsweng?

¹⁹O re rute se re tlaa se buang nao, gonne ga re kake ra rulaganya puo ya rona ka ntlha ya lefifi.

²⁰A o ka bolelelwa fa ke rata go bua, kgotsa a motho o ka eletsa a ka bo a komediwa?

²¹Jaana batho ga ba kake ba leba lesedi fa le phatsima mo loaping; fa phefo e fetile e lo ntlafaditse.

²²Mo ntlheng ya botsheka go tswa kgalalelo e eketeng ya botsodutsokwane, Modimo o na le borena jo bo boitshegang mo go one.

²³Ka ga Mothatayotlhe, ga re kake ra mo tlhantlhabetsa, o tlotlometse mo thateng, mo katlholong le mo tshiamisong e e tletseng, ga a ketla a patika.

²⁴Mme batho ba mmoifa ka ntlha ya gone moo; ga a tlhokomele bape ba ba pelo e e tlhalefileng.”