Job 38

¹Foo Jehofa a le mo sefefong a fetola Jobe, a re:

²“E mang yo o fifatsang kgakololo ka mafoko a a se nang kitso?

³A ko o ikokwaele lotheka jaaka monna; gonne ke tlaa go botsa, mme o nkakanyetse.

⁴E rile ke thaya metheo ya lefatshe, wa bo o le fa kae? Kakanya, fa o na le tlhaloganyo.

⁵E mang yo o tlhomileng dilekanyo tsa lone, fa o itse? E mang yo o ne a le namalaletsa thapo?

⁶Metheo ya lone e nitamisitswe mo go eng? Kgotsa: Yo o beileng lentswe la kgokgotsho la lone e mang?

⁷Jale ka dinaledi tsa moso di opela mmogo le bomorwa Modimo botlhe ba thela lošalaba lwa boitumelo?

⁸“Kgotsa e mang yo o tswaletseng lewatle ka ditswalo, jale ka le thoba, jaaka ekete le tswa mo sebopelong;

⁹jale ka ke dira leru seaparo sa lone, le lefifi le lentsho go nna letsela la phapo mo go lone.

¹⁰Ka le beela molelwane wa me, ka ba ka tlhoma mephakalego le ditswalo.

¹¹Ka le raya, ka re: ‘O ka fitlha fa, mme o se ka wa go feta; dintelo tsa gago tse di mabela di tlaa kganelelwa fa?’

¹²“A e sa le ka malatsi a gago a simologa a o kile wa laola moso, wa itsise mahube felo ga one;

¹³gore a ye go tshwara dikhutlo tsa lefatshe, le gore baikepi ba udubadiwe mo go lone?

¹⁴Le tle le fetoge jaaka mmopa fa tlase ga sekano; mme dilo tsotlhe di kwetoge jaaka mo seaparong.

¹⁵Mo baikeping lesedi la tsone le tle le kganelwe, letsogo le le tsholetsegileng le rojwe.

¹⁶“A o kile wa tsena kwa metsweding ya lewatle, kgotsa a o kile wa tsamaya mo dikunyaneng tsa boteng?

¹⁷A o kile wa senolelwa dikgoro tsa loso, kgotsa a o kile wa bona dikgoro tsa moriti wa loso?

¹⁸A o tlhalogantse boatlhamo jwa lefatshe? Kakanya fa o go itse gotlhe.

¹⁹“Tsela e kae e e yang kwa boagong jwa lesedi, mme ka ga lefifi felo ga lone ke kae?

²⁰Gore o tle o le ise kwa borakanelong jwa lone, mme o lemoge ditselana tse di yang kwa ntlong ya lone.

²¹Le gale, o tlaa bo o itse, gonne go jale o ne o tsetswe, palo ya malatsi a gago e kgolo!

²²“A o kile wa tsena mo mabolokelong a kapoko, kgotsa a o kile wa bona mabolokelo a sefako,

²³tse ke di boloketseng motlha wa phuduego le letsatsi la dira le ntwa?

²⁴Lesedi le kgaoganngwa ka tsela efe, le phefo ya botlhabatsatsi e iphalatsa mo lefatsheng ka efe tsela?

²⁵“E mang yo o fatoletseng morwalela wa metsi tsela, kgotsa a fatola tsela ya logadima lwa maru;

²⁶go nesa pula mo lefatsheng le go se nang motho mo go lone; mo nageng e go se nang motho mo go yone;

²⁷go kgorisa mmu wa tshwafalo le wa kgakgabalo; le go tlhogisa loreme gone?

²⁸“A pula e na le rra yone, kgotsa mang yo o tsetseng dithothi tsa monyo?

²⁹Dikgapetla tsa metsi di tswa sebopelong sa ga mang le kgogotshwane ya legodimo e mang yo o e tsetseng?

³⁰“Metsi a tle a bipiwe jaaka ekete ka letlapa, mme mo godimo ga boteng go gatsele.

³¹“A o ka bofa lesetlha la Selemela, kgotsa o ka funolola dithapo tsa dinaledi tse go tweng Dikolobe.

³²A o ka gogela ntle masomo a naledi tsa Masarotha mo metlheng ya tsone, kgotsa a o ka tsamaisa naledi tsa Kgogabosigo le popelelo ya yone?

³³A o itse melao ya magodimo? A o ka tlhoma puso ya yone mo lefatsheng?

³⁴A o ka tsholeletsa lentswe la gago kwa marung, gore letlotlo la metsi le go khurumetse?

³⁵A o ka roma dikgadima gore di tsamaye, mme tsa go raya tsa re: ‘Re fano’?

³⁶E mang yo o tsentseng botlhale mo matennyeng, kgotsa e mang yo o neileng pelo tlhaloganyo?

³⁷E mang yo o ka balang maru ka botlhale, kgotsa mang yo o ka tshololang dinkgwana tsa legodimo,

³⁸fa lorole lo golokega le makote a ngaparelana?

³⁹A o tlaa tsomela tau e namagadi phologolo, kgotsa wa kgorisa ditawana,

⁴⁰fa di namaletse mo dikutleng tsa tsone, di ntse mo setswatsweng di laletse?

⁴¹E mang yo o baakanyetsang mohukubu dijo tsa one, ka mamphorwana a one a lelela Modimo, a kgarakgatshega fela ka go tlhoka dijo?