Job 6

¹Foo Jobe a fetola a re:

²“A bo go tshwenyega ga me go ka bo go lekantswe bokete, le tshenyegelo ya me ya bewa mmogo mo selekanyong sa pego.

³Gonne jaana go ka bo go le bokete bogolo go mošawa wa mawatle; ke gone ka moo mafoko a me a ntseng a phomesegela fela.

⁴Gonne metswi ya Mothatayotlhe e mo teng ga me, e botlhoko jwa yone mowa wa me o bo nwelang ruri; ditheregiso tsa Modimo di a inthulaganyetsa.

⁵A esela ya naga e tle e lele fa e na le bojang, kgotsa a kgomo e tle e lele e e ja?

⁶A selo se se senang moutlwalo se ka jewa se sena letswai? Kgotsa, a go na le moutlwalo mo khwaaneng ya letsae?

⁷Mowa wa me o gana go ama dilo tseo; mo go nna di tshwana jaaka dijo tse di ferosang sebete.

⁸“A bo ke ka bo ke bona topo ya me; le gore Modimo o ka ka wa nnaya se ke se eletsang.

⁹Ke raya gore, go ka kgatlha Modimo go mphatlakanya fela; e leng gore o ikgolole letsogo, mme o nkgaolele koo!

¹⁰Foo nka bo ke sa ntse ke na le kgomotsego; ee, nka bo ke kgana ka botlhoko jo bo sa rekegeleng; gonne ga ke a itatola mafoko a Moitshepi.

¹¹Thata ya me ke eng, fa e ka bo ne ne fano ke ka lebelela? Le bokhutlo jwa me ke eng fa nka itshoka?

¹²A thata ya me ke thata ya maje, kgotsa a nama ya me ke kgotlho?

¹³A ga se go re ga ke na thuso mo go nna, le go re go dira mo go thusang go leleketswe ruri mo go nna?

¹⁴Yo o gaufi le go idibala o tshwanetse go bona bopelonomi mo tsaleng ya gagwe; ee, le ene yo o latlhang poifo ya Mothatayotlhe.

¹⁵Bana ba ga rre ba dirile ka tsietso jaaka molatswana, jaaka meedi ya melatswana e e fetelang koo fela;

¹⁶e e leng mentsho ka ntlha ya metsi a a gatsetseng, le e kapoko e iphitlhang mo go yone.

¹⁷Mme mogang go thuthafalang e nyelele; fa go gotetse e fele, e tloge mo felong ga yone.

¹⁸Masomo a baeti ba ba reng ba eta ka tsela ya yone a fapoge, ba tlhatlogele kwa go kgadileng, mme ba swe.

¹⁹Masomo a baeti ba Tema a batla, masomo a Sheba a lebelela mo go yone.

²⁰Ba tlhajwa ke ditlhong ka ntlha ya gonne ba ne ba solofetse; ba fitlha gone, mme ba sosobaganngwa.

²¹Gonne gompieno ga lo sepe; lo bona therego, mme lo a boifa.

²²A ke rile: ‘Nnayang,’ Kgotsa: ‘Lo mpeele pele mpho ya thoto tsa lona?’

²³Kgotsa, a ke rile: ‘Lo nkgolole mo seatleng sa moganetse’ kgotsa: ‘Lo nthekolole mo seatleng sa bapatiki?’

²⁴“Nthutang, mme ke tlaa didimala; ntlhaloganyetseng fa ke timetseng gone.

²⁵Mafoko a thokgamo a nonofile jang! Mme go ganela ga lona go a bo go kgalemela eng?

²⁶A lo tlhatlhanya go kgalemela mafoko fela? Ka mantswe a motho yo o gaketseng a ntse jaaka phefo fela.

²⁷Ee, lo rata lo ka bo lo thelela masiela bola, le go ntsha tsala ya lona tlhwatlhwa fela.

²⁸“Jaana tswee, a lo ke lo ntebe; gonne ruri ga nketla ke aka fa pele ga lona.

²⁹Ke a lo rapela, a ko lo boeng, a go se nne tshiamololo, ee, bang lo boe, mafoko a me a tsheko a siame.

³⁰A go na le tshiamololo mo lolemeng lwa me? A magalapa a me ga a kake a lemoga dilo tse di bosula?