Job 8

¹Foo ga fetola Biletate wa Mošuha a re:

²“O tlaa bua dilo tse ka lobaka lo lo kae? Mafoko a molomo wa gago a tlaa nna jaaka phefo e kgolo ka lobaka lo lo kae?

³A Modimo o tle o sokamise katlholo? Kgotsa a Mothatayotlhe o tle a sokamise tshiamiso?

⁴Fa bana ba gago ba o leofetse, mme o ba tsentse mo seatleng sa tlolo ya bone;

⁵fa o ne o ka batla ka tlhoafalo mo Modimong, mme wa dira mokokotlelo wa gago mo go Mothatayotlhe,

⁶fa o ne o le boitsheko le thokgamo; ruri o ka bo fano a go kubugela, a dira bonno jwa tshiamo ya gago gore bo segofale.

⁷Le fa tshimologo ya gago e ne e le potlana, le fa go ntse jalo bokhutlo jwa gago bo ne bo tlaa totafala segolo.

⁸“Gonne ke a go rapela, a ko o botse ka ga motlha wa pele, mme o tseye tsia se borraabo ba se tlhotlhomisitseng:

⁹(Gonne rona re ba maabane fela, mme ga re itse sepe, gonne malatsi a rona mo lefatsheng ke moriti fela).

¹⁰A bone ga ba ketla ba go ruta, ba go bolelela, ba bua mafoko a a tswang mo pelong tsa bone?

¹¹“A motsitla o ka gola go se na loraga? A mophutlo o ka gola go se na metsi?

¹²E re o sa ntse o le mo botaleng jwa one, o sa ntse o segwa, o bo o swabe pele ga merogo e mengwe.

¹³Ditsela tsa botlhe ba ba lebalang Modimo di ntse jalo; tsholofelo ya motho yo o sa reng Modimo sepe e tlaa nyelela;

¹⁴yo boikgantsho jwa gagwe bo tlaa kgaogang ka bogare, le yo boikanyo jwa gagwe e leng bobi jwa segokgwane fela.

¹⁵O tlaa ikaega ntlo ya gagwe, mme ga e ketla e ema; o tlaa itshwarelela ka one, mme ga e ketla e tlhomama.

¹⁶O a tle a nne motala pele ga letsatsi le ise le tlhabe, mme matswela a gagwe a anamele mo tshimong ya gagwe.

¹⁷Medi ya gagwe e tlamparele thotobolo, a lebe felo ga maje.

¹⁸Fa a sengwa a ntshiwa mo felong ga gagwe, foo go tlaa mo itatola go re: ‘Ga ke ise ke go bone.’

¹⁹Bona jo ke boitumelo jwa tsela ya gagwe, ba bangwe ba tlaa tlhongwa mo mmung wa gagwe.

²⁰“Bona, Modimo ga o ketla o latlha motho yo o itekanetseng, le gone ga o ketla o ema badira bosula nokeng.

²¹O tlaa nama o tlatsa molomo wa gago ka setshego, le dipounama tsa gago ka moduduetso.

²²Ba ba go ilang ba tlaa apesiwa ditlhong; le mogope wa moikepi ga o ketla o tlhola o leyo.”