Psalms 10

¹O emetseng kgakala, Jehofa? O iphitlhelang mo metlheng ya pitlagano?

²Mohumanegi o khukhelwa ka tlhoafalo ka boikgodiso jwa baikepi; a ba tshwarwe ka ditogamaano tse ba di logileng.

³Gonne moikepi o belafala ka ga keletso ya pelo ya gagwe, le yo o pelotshetlha o a itatola, ee, o kgala Jehofa.

⁴Moikepi o bua ka boikgodiso jwa sefatlhogo sa gagwe, a re: “Ga o ketla o go lefetsa.” Megopolo yotlhe ya gagwe ke go re: “Ga go na Modimo ope.”

⁵Ditsela tsa gagwe ke mo go tlhomameng ka metlha yotlhe; dikatlholo tsa gago di kwa godimodimo kgakala le pono ya gagwe; mme ka ga baba ba gagwe botlhe, o ba budula fela.

⁶O ithaya mo pelong ya gagwe a re: “Ga nketla ke tshikinyega; ga nketla ke ba ke nna mo bothateng bope mo tshikatshikeng.”

⁷Legano la gagwe le tletse khutsakanyo le tsietso le patiko; kwa tlase ga loleme lwa gagwe go na le bosenyi le boikepo.

⁸O a tle a dule mo mafelong a talelo a metsana; a bolaele ba ba se nang molato mo mafelong a boiphitlho; ba ba se nang boithuso a ba gotolele matlho.

⁹O a tle a lalele mo setswatswaneng jaaka tau mo selaong sa yone, a lalele mohumanegi go mo tshwara; o mo tshware ruri, ene mohumanegi, mogang o mo gogang ka lotloa lwa gagwe.

¹⁰O a tle a bobe, a iname, mme ba ba se nang boithuso ba we ka ba ba thata ba gagwe.

¹¹O ithaya mo pelong ya gagwe a re: “Modimo o lebetse; o bipile sefatlhogo sa one; ga o ketla o go bona gope.”

¹²Tloga o eme, Jehofa! Modimo, tsholetsa letsogo la gago; o se ka wa lebala bahumanegi.

¹³Ana moikepi o nyaletsang Modimo; a ithaya mo pelong a re: “Ga o ketla o go lefetsa”?

¹⁴O go bonye; gonne o lebile bosenyi le bopeloyatlhoi go bo tsaya mo seatleng sa gago; yo o se nang boithuso o itesa mo go wena; o ne o ntse o le mothusi wa masiela.

¹⁵Roba letsogo la moikepi; motho yo o bosula ene, o no o tlhotlhomise boikepo jwa gagwe, o bo o tle o se ka wa tlhola o bona bope.

¹⁶Jehofa ke Kgosi ka bosakhutleng le ka bosaengkae; baditšhaba ba nyeleletse ruri mo lefatsheng la gagwe.

¹⁷Jehofa, o utlwile keletso ya baikokobetsi; o tlaa baakanya pelo tsa bone, o tlaa tlhwaa tsebe ya gago go utlwa;

¹⁸go tla o atlhola masiela le bapatikwi, gore motho yo e leng wa lefatshe fela a se ka a tlhola a boitshega gope.