Psalms 102

¹A ko o utlwe morapelo wa me, Jehofa, mme a go goa ga me go ke go fitlhe koo go wena.

²O se ka wa mphitlhela sefatlhogo sa gago mo letsatsing la pitlagano ya me; O ntshekegele tsebe; e re mo letsatsing le ke bitsang ka lone o nkarabe ka bonako.

³Gonne malatsi a me a nyelela jaaka mosi; marapo a me le one a a ša jaaka serumola.

⁴Pelo ya me e tapetegile jaaka bojang, e swabile; gonne ke lebala go ja sejo sa me.

⁵Ka ntlha ya lentswe la go duma ga me, marapo a me a ngaparetse nama ya me.

⁶Ke ntse jaaka khukara ya naga; ke fetogile jaaka morubisi wa marotobolo fela.

⁷Ke ntse ke lebeletse, mme ke fetogile jaaka thaga e e ntseng e le nosi mo setlhoeng sa ntlo.

⁸Baba ba me ba tlhola ba nkgoba ka letsatsi lotlhe; ba ba itirang ditsenwa ka ga me ba hutsakanya ka nna.

⁹Gonne ke jele melora jaaka sejo, ka tlhakanya se ke se nwang le dikeledi.

¹⁰Ke ka ntlha ya kgakatsego ya gago, le kgalefo ya gago; gonne o ntsholeditse wa ntatlhela koo.

¹¹Malatsi a me a tshwana le moriti o o yang go fela; mme ke swabile jaaka bojang.

¹²Mme wena, Jehofa, o tlaa nnela ruri ka bosakhutleng; le segopodiso sa gago go ya ditshikatshikeng tsotlhe fela.

¹³O tlaa nanoga o utlwela Sione botlhoko; gonne ke lobaka lwa go mo tlhomogela pelo; ee, lobaka lo lo laotsweng lo fitlhile.

¹⁴Gonne batlhanka ba gago ba na le kgatlhego mo majeng a gone, ba tlhomogela lorole lwa gone pelo.

¹⁵Jalo merafe e tlaa boifa leina la ga Jehofa, le dikgosi tsotlhe tsa lefatshe, di tlaa boifa kgalalelo ya gago;

¹⁶gonne Jehofa o tsosolositse Sione go o aga; o bonetse mo kgalalelong ya gagwe.

¹⁷O tlhokometse morapelo wa ba ba hotlhegileng ba se na sepe, ga a ka a nyatsa morapelo wa bone.

¹⁸Moo, go tlaa kwalelwa losika lo lo tlang; mme tšhaba e e tlaa tlholwang e tlaa baka Jehofa.

¹⁹Gonne o okometse a le kwa bogodimong jwa felo ga gagwe ga boitshepo; Jehofa o ne a lebile lefatshe a le kwa legodimong;

²⁰go utlwa go fegelwa ga mogolegwi; go hunolola ba ba laoletsweng loso;

²¹gore batho ba tle ba bolele leina la ga Jehofa mo Sione, le pako ya gagwe mo Jerusalema;

²²mogang ditšhaba di phuthegileng di le mmogo, le magosi, go direla Jehofa.

²³O ne a koafatsa thata ya me mo tseleng; a khutsafatsa malatsi a me.

²⁴Ke ne ka re: “Modimo wa me we! O se ka wa ntlosa ke le fa gare ga malatsi a me; aitse dinyaga tsa gago tsone, di ya le ditshikatshika tsotlhe fela.

²⁵O sa le o thaya motheo wa lefatshe bogologolo; le magodimo ke tiro ya diatla tsa gago.

²⁶Tsone di tlaa nyelela, mme wena o tlaa nna fela; ee, tseo tsotlhe di tlaa onala jaaka seaparo; o tlaa di fetola jaaka morepo; mme di tlaa fetoga;

²⁷mme wena, o ntse o ntse jaaka o ntse fela; dinyaga tsa gago ga di ketla di dira le bokhutlo.

²⁸Bana ba batlhanka ba gago ba tlaa nna fela, le losika lwa bone lo tlaa tlhomamisiwa fa pele ga gago.”