Psalms 103

¹Baka Jehofa, mowa wa me; le tsotlhe tse di mo teng ga me a di bake leina la gagwe le le boitshepo.

²Baka Jehofa, mowa wa me, mme o se ka wa lebala dithuso tsa gagwe tsotlhe;

³yo o itshwarelang maikepo otlhe a gago; a fodise malwetse a gago otlhe fela;

⁴yo o rekololang botshelo jwa gago mo tshenyegong; a go rwese tlhogo ka bopelonomi jwa lorato, le ka mautlwelobotlhoko a manana;

⁵yo o kgorisang legano la gago ka dilo tse di molemo; bokau jwa gago boo bo tle bo šafadiwe bo nne jaaka jwa ntswi yo motona.

⁶Jehofa o dirafatsa ditiro tsa tshiamo, le dikatlholo o di dirafaletsa botlhe ba ba patikwang.

⁷O ne a itsise Moše metsamao ya gagwe, le madiro a gagwe a a itsise bana ba Iseraele.

⁸Jehofa o tletse bopelotlhomogi, mme o pelotshweu, o bonya go galefa, o letlotlo la boutlwelobotlhoko.

⁹Ga a ketla a omana ka metlha yotlhe; le fa e le go nna ka bogale ka bosenabokhutlo.

¹⁰Ga a a re direla ka fa maleong a rona, le fa e le go re duela ka fa maikepong a rona.

¹¹Gonne jaaka legodimo le ntse le le kwa godimo, godimo ga lefatshe, boutlwelobotlhoko jwa gagwe mo go ba ba mmoifang bo ntse bogolo jalo.

¹²Jaaka botlhabatsatsi bo le kgakala le bophirimatsatsi; le ene o re tloseditse ditlolo tsa rona bokgakala jo bo kalo.

¹³Jaaka rrabana a tle a utlwele bana ba gagwe botlhoko; Jehofa le ene o tlhomogela ba ba mmoifang pelo jalo.

¹⁴Gonne o itse popego ya rona, o gakologetswe fa re le lorole fela.

¹⁵Ka ga motho ene, malatsi a gagwe a ntse jaaka bojang fela; jaaka sethunya sa naga, le ene o kgaba fela jalo.

¹⁶Gonne phefo ya se foka, mme se ile; le bonno jwa sone ga bo ketla bo tlhola bo se itse.

¹⁷Mme boutlwelobotlhoko jwa ga Jehofa bo ntse fela go tswa bosasimologeng go ya bosaengkae mo go ba ba mmoifang, le tshiamo ya gagwe go ya baneng ba bana;

¹⁸mo go ba ba bolokang kgolagano ya gagwe, le mo go ba ba gakologelwang ditaelo tsa gagwe go di dira.

¹⁹Jehofa o tlhomamisitse setulo sa gagwe sa bogosi mo magodimong; mme bogosi jwa gagwe bo busa gotlhe fela.

²⁰Bakang Jehofa lona baengele ba gagwe; lona dinatla mo nonofong, ba lo dirafatsang lefoko la gagwe, lo ntse lo reeditse lentswe la lefoko la gagwe.

²¹Bakang Jehofa lona masomosomo otlhe a gagwe; lona badiredi ba gagwe ba lo dirang go natefelwa ga gagwe.

²²Bakang Jehofa lona ditiro tsotlhe tsa gagwe, mo mafelong otlhe a puso ya gagwe. Baka Jehofa mowa wa me.