Psalms 104

¹Baka Jehofa, mowa wa me. Jehofa, Modimo wa me, o mogolo thata! O apere tlotlo le borena.

²Yo o ikapesang ka lesedi jaaka ka seaparo; yo o ngamolang magodimo jaaka sesiro;

³yo o tlhomang maotwana a mantlwana a gagwe mo metsing; yo o dirang maru go nna kara ya gagwe; yo o tsamayang ka dinao mo diphukeng tsa phefo;

⁴yo o dirang diphefo go nna barongwa ba gagwe; badiredi ba gagwe ke melelo e e tutumang;

⁵yo o beileng metheo ya lefatshe, gore le tle le se ka la tshikinngwa ka bosakhutleng.

⁶Wa le khurumetsa ka bodiba jo bo boteng, jaaka e ka bo e le ka morepo; metsi a ne a ema a feta dithaba.

⁷A na a tshaba ka kgalemo ya gago; a tloga a ya koo ka potlako ka kodu ya tumo ya gago ya maru;

⁸a na a tlhatloga ka fa dithabeng, a fologa ka fa megorogorong, a ya go fitlha kwa mafelong a o a a thaetseng.

⁹O beile mmotwana gore a se ka a o tlola; gore a se ka a ba a boa a khurumetsa lefatshe.

¹⁰O eledisetsa metswedi kwa megorogorong; e elele mo gare ga dithaba.

¹¹E nose diphologolo tsotlhe tsa naga; diesela tsa naga di itimole lenyora mo go yone.

¹²Dinonyane tsa legodimo di nne le boago fa go yone; di letse melodi mo dikaleng tsa ditlhare.

¹³O nose dithaba ka metsi a a tswang matlwaneng a gagwe; lefatshe le kgore loungo lwa ditiro tsa gago.

¹⁴O tlhogisetsa dikgomo bojang, le yone merogo go nna thuso ya batho; gore a tle a ntshe dijo mo mmung;

¹⁵le bojalwa jwa mofine jo bo ipedisang pelo ya motho, le lookwane, gore lo phatsimise sefatlhogo sa gagwe, le senkgwe se se thatafatsang pelo ya motho.

¹⁶Ditlhare tsa ga Jehofa di a kgora; masetara a Lebanone a o a tlhomileng;

¹⁷kwa dinonyane di agang ditlhaga tsa tsone gone; ka ga mogolodi, ditlhare tsa mafira ke ntlo ya one.

¹⁸Dithaba tse di godileng ke tsa mehele; meole ya mafika ke botshabelo jwa dipela;

¹⁹o laoletse kgwedi metlha; letsatsi le ikitse go phirima ga lone.

²⁰O dira lefifi, mme go nne bosigo; jo ditshedi tsotlhe tsa sekgwa di gagabelang kwa ntle ka lone.

²¹Ditawana di dume, di dumele se di ka se bolayang, mme di senke nama ya tsone mo Modimong.

²²Letsatsi le a tlhaba, mme di gonyele, di ye go robala mo dikutleng tsa tsone.

²³Motho a tswele kwa tirong ya gagwe le kwa mofufutsong wa gagwe go ya maitseboeng.

²⁴Jehofa, ana ditiro tsa gago di methalethale jang! O di dirile ka botlhale tsotlhe fela; lefatshe le tletse dikhumo tsa gago.

²⁵Fale go lewatle, le legolo, le atlhame, le dilo tse di gagabang tse di se nang palo di mo go lone, ditshedi tse dipotlana le tse dikgolo.

²⁶Dikepe di tsamaya gone; leruarua le gone, le o le bopetseng go tshamekela mo go lone.

²⁷Tsotlhe tse, di lebeletse mo go wena, gore o tle o di fe dijo tsa tsone mo motlheng o o lebanyeng.

²⁸Se o se di nayang di se phuthe; o huporolole seatla sa gago, mme di kgore mo go molemo.

²⁹O sube sefatlhogo sa gago, mme di huduege; o tlose mowa wa tsone, di swe, di boele loroleng lwa tsone.

³⁰O rome, o ntshe mowa wa gago, mme di tlholege; o šafatse sefatlhogo sa lefatshe.

³¹A kgalalelo ya ga Jehofa e eme ka bosakhutleng; a Jehofa a itumele mo ditirong tsa gagwe;

³²yo o lebang lefatshe, mme le rorome; a ame dithaba, mme di kue mosi.

³³Ke tlaa re ke sa ntse ke tshedile ke nne ke opelele Jehofa; ke tlaa re ke sa ntse ke leyo ke nne ke bake Modimo wa me.

³⁴A go akanya ga me go nne monate mo go one; ke tlaa itumela mo go Jehofa.

³⁵A baleofi ba nyelediwe, ba tloge mo lefatsheng, mme a baikepi ba se tlhole ba leyo gope. Baka Jehofa mowa wa me. Lona, bakang Jehofa.