Psalms 106

¹Bakang Jehofa. A lo ko lo ntshetseng Jehofa malebogo; gonne o molemo; ka gobo boutlwelobotlhoko jwa gagwe bo eme ka bosakhutleng.

²E mang yo o ka bolelang ditiro tsa ga Jehofa tsa bonatla, le fa e le go bonatsa pako ya gagwe yotlhe?

³Go sego ba ba tshegetsang katlholo, le ene yo o dirang tshiamo ka metlha yotlhe.

⁴O tle o nkgakologelwe, Jehofa, ka lesego le o le ngoketseng batho ba gago; a ko o ntekole ka poloka ya gago;

⁵gore ke tle ke bone go kokotlegela ga baitshenkedwi ba gago, gore ke tle ke ipele mo go itumeleng ga morafe wa gago, gore ke kgane ka boitumelo le boswa jwa gago.

⁶Re leofile le borraetsho, re ikepile, re dirile maswe.

⁷Borraetsho ga ba a ka ba tlhaloganya dikgakgamatso tsa gago kwa Egepeto; ga ba a ka ba gakologelwa bontsi jwa mautlwelobotlhoko a gago; mme ba nna dirukhutlhi fela kwa lewatleng, e bong kwa Lewatleng le Lehibidu.

⁸Le fa go ntse jalo a ba boloka ka ntlha ya leina la gagwe, gore a itsefatse thata ya gagwe e e bonatla.

⁹Le gone a kgalemela Lewatle le Lehibidu, mme la kgala; jalo a ba goga a ba ralatsa mo madibeng a a boteng jaaka mo nageng fela.

¹⁰A ba dibela mo seatleng sa yo o ba ilang, a ba rekolola mo seatleng sa mmaba.

¹¹Metsi a khurumetsa baganetsi ba bone; ga se ka ga sala ope wa bone.

¹²E dira gone ba dumelang mafoko a gagwe; ba opela pako ya gagwe.

¹³Ba tloga ba lebala ditiro tsa gagwe ka bonako; ba se ka ba lebelela kgakololo ya gagwe;

¹⁴ba ineela thata mo dikeletsong mo nageng, ba leka Modimo mo dipoweng tsa naga.

¹⁵Wa ba naya topo ya bone; mme wa tsenya mowa wa bone malolo fela.

¹⁶Ba nna pelotshetlha le mo go ene Moše, mo bothibelelong, le mo go Arone moitshepi wa ga Jehofa.

¹⁷Lefatshe la phatloga la kometsa Dathane, la ba la bipa lesomo la ga Abirame.

¹⁸Molelo wa tshujwa mo lesomong la bone; kgabo ya fisetsa ruri baikepi.

¹⁹Ba dira namane mo Horebe, ba obamela setshwantsho se se thetsweng.

²⁰Jalo ba fetolela kgalalelo ya bone mo setshwantshong sa kgomo e e jang bojang.

²¹Ba lebala Modimo Mmoloki wa bone, yo o dirileng dilo tse dikgolo kwa Egepeto;

²²ditiro tse di gakgamatsang mo lefatsheng la ga Hame, le dilo tse di boitshegang fa Lewatleng le Lehibidu.

²³Ke gone ka mo o rileng, o tlaa ba senya, fa Moše moitshenkedwi wa one a ne a se ka a ema fa pele ga one mo phatlheng, go faposa bogale jwa one jo bo thata, gore e se re kgotsa wa ba senya.

²⁴Ee, ba ne ba nyatsa lefatshe le le natefang; ba se ka ba dumela lefoko la gagwe;

²⁵ba ngongorega ba le mo megopeng ya bone, mme ba se ka ba reetsa lentswe la ga Jehofa.

²⁶Ke gone ka moo a ba tsholeletsa seatla sa gagwe, o re o tlaa ba digela mo nageng;

²⁷le gone a re, o tlaa digela losika lwa bone mo gare ga merafe, a ba gasagasa mo mafatsheng.

²⁸Le gone ba ne ba ikopanya le Baalepeore, mme ba ja ditshupelo tsa baswi.

²⁹Jalo ba mo tlhotlheletsa bogaleng ka madiro a bone, mme sebetso sa ba phagelela.

³⁰Foo ga ema Finehase, mme a dirafatsa tshekiso; jalo sebetso sa khutlisiwa;

³¹mme moo, a go balelwa fa e le tshiamo go ya ditshikatshikeng tsotlhe ka bosenabokhutlo.

³²Le gone ba mo gakatsa kwa metsing a Meriba, ga ba ga tla ga nna maswe mo go Moše ka ntlha ya bone;

³³ka gobo ba rukhutlhela mowa wa gagwe, mme a bua ka phorumelo ka dipounama tsa gagwe.

³⁴Ga ba a ka ba senya ditšhaba, jaaka Jehofa a ba laotse;

³⁵ba itlhakanya le merafe, ba ithuta ditiro tsa yone.

³⁶Ba direla medimo ya yone ya disetwa; e e tsileng ya nna seru mo go bone;

³⁷ee, ba ntsha bomorwaa bone, le bomorwadia bone ditlhabelo tsa badimo.

³⁸Ba tsholola madi a a se nang molato, e bong madi a bomorwaa bone ba ba ba iseditseng medimo ya disetwa ya Kanana ditlhabelo; lefatshe la leswefadiwa ke madi.

³⁹Jalo ba tsenngwa leswe ke ditiro tsa bone, ba akafala mo madirong a bone.

⁴⁰Ke gone ka moo tšhakgalo ya ga Jehofa ya tukela batho ba gagwe, a fedisiwa pelo ke boswa jwa gagwe.

⁴¹Mme a ba tsenya mo seatleng sa merafe; mme ba ba ba ilang ba ba busa.

⁴²Baba ba bone ba ba patika le gone; ba fenngwa, ba nna mo thateng ya seatla sa bone.

⁴³A ba golola gantsintsi; le fa go ntse jalo ba nna borukhutlhi fela mo kgakololanong ya bone, ba ba ba isiwa kwa tlase mo boikepong jwa bone.

⁴⁴Le fa go ntse jalo a tlhokomela pitlagano ya bone, mogang o utlwang selelo sa bone.

⁴⁵A gakologelwa kgolagano ya gagwe, a ikwatlhaya ka fa bontsing jwa mautlwelobotlhoko a gagwe.

⁴⁶A ba a dira gore ba tlhomogelwe pelo ke botlhe ba ba ba tshwereng ba ba golegile.

⁴⁷Re boloke, Jehofa, Modimo wa rona, o bo o re phuthe go re ntsha mo merafeng, go tla re ntshetsa leina la gago le le boitshepo malebogo, le go ja koma mo pakong ya gago.

⁴⁸A go bakwe Jehofa, Modimo wa Iseraele, go tswa bosasimologeng go ya fela bosaengkae. Mme batho botlhe ba re: “A go nne jalo.” Bakang Jehofa.