Psalms 107

¹A ko lo ntshetseng Jehofa malebogo; gonne o molemo; gonne boutlwelobotlhoko jwa gagwe bo eme ka bosakhutleng.

²A barekolodwi ba go Jehofa ba bue jalo, ba o ba rekolotseng mo seatleng sa moganetsi;

³a ba phutha a ba ntsha mo mafatsheng, go tswa kwa botlhabatsatsi, le kwa bophirimatsatsi, kwa botsheka le kwa borwa.

⁴Ba ne ba pholetha mo nageng mo tseleng ya sekaka; ga ba a ka ba bona motse ope o o nnwang.

⁵Ba le tlala le lenyora, mowa wa bone wa idibala mo go bone.

⁶Foo ba goela kwa go Jehofa mo tlalelong ya bone, mme a ba golola a ba ntsha mo dipitlaganong tsa bone.

⁷Le gone a ba goga ka tsela e e lolameng, gore ba ye go fitlha kwa motseng o o ka nnwang.

⁸A bo batho ba ka ka ba baka Jehofa ka ntlha ya molemo wa gagwe, le ka ntlha ya ditiro tsa gagwe tse di gakgamatsang mo baneng ba batho!

⁹Gonne o kgorisa mowa o o eletsang, le mowa o o bolailweng ke tlala o o kgorise ka molemo.

¹⁰Ba ba neng ba dutse mo lefifing le mo moriting wa loso, ba bofetswe mo patikong le mo tshiping;

¹¹e le ka gonne ba rukhutlhetse mafoko a Modimo, ba tswitla kgakololo ya Mogodimodimo;

¹²ke gone ka ntlha ya mo, a pagolola pelo ya bone ka muhuhutso; ba wa, mme go se na ope yo o thusang.

¹³Foo ba ikuela Jehofa mo tlalelong ya bone, mme a ba boloka, a ba ntsha mo dipitlaganong tsa bone.

¹⁴A ba ntsha mo lefifing le mo moriting wa loso, a komoganya dipofo tsa bone.

¹⁵A bo batho ba ka ka ba baka Jehofa ka ntlha ya molemo wa gagwe, le ka ntlha ya ditiro tsa gagwe tse di gakgamatsang mo baneng ba batho!

¹⁶Gonne o thubile ditswalo tsa kgotlho, a remaganya mephakalego ya tshipi.

¹⁷Ba ba dieleele ba tle ba bogisiwe ka ntlha ya ditlolo tsa bone, le ka ntlha ya maikepo a bone.

¹⁸Mowa wa bone o feretlhwe ke dilo tsotlhe fela, mme ba atamele kwa dikgorong tsa loso.

¹⁹Foo ba ikuele Jehofa mo tlalelong ya bone, mme a ba golole a ba ntshe mo dipitlaganong tsa bone.

²⁰A ise lefoko la gagwe, a ba fodise, a ba swatole mo ditshenyegong tsa bone.

²¹A bo batho ba ka ka ba baka Jehofa ka ntlha ya molemo wa gagwe, le ka ntlha ya ditiro tsa gagwe tse di gakgamatsang mo baneng ba batho!

²²A ba ise ditlhabelo tsa tebogo, a ba kakanye ditiro tsa gagwe ka go opela.

²³Ba ba fologelang kwa lewatleng ka dikepe, ba tiro ya bone e leng mo metsing a magolo;

²⁴bao, ba bona ditiro tsa ga Jehofa, le dikgakgamatso tsa gagwe mo bodibeng jo bo botengteng.

²⁵Gonne o a laola, mme a tsose phefo e e matsubutsubu e e kokomosang makhubu a yone.

²⁶Ba tlhatlogela kwa legodimong, ba fologela gape kwa matennyeng; mowa wa bone o nyere o fele ka ntlha ya tlalelo.

²⁷Ba theekele, ba kgokgweetsege jaaka motho yo o tagilweng, mme ba felelwe ke maano otlhe a bone.

²⁸Foo ba goele kwa go Jehofa mo tlalelong ya bone, mme a ba swatole mo dipitlaganong tsa bone.

²⁹A ritibatse matsubutsubu, makhubu a one a ba a tla a tle a eme fela.

³⁰Foo ba ipele ka gobo ba iketlile; jalo a ba gorosetse mo bogorogelong jo ba ratang ba bo ba le mo go jone.

³¹A bo batho ba ka ka ba baka Jehofa ka ntlha ya molemo wa gagwe, le ka ntlha ya ditiro tsa gagwe tse di gakgamatsang mo baneng ba batho!

³²A ba ke ba mo goletse le mo phuthegong ya sešaba, ba mmake mo sennong sa bagolwane.

³³O fetola dinoka naga fela, le metswedi ya metsi mmu o o nyorilweng;

³⁴le lefatshe le le matshebe a le fetole sekaka se se letswai ka ntlha ya boleo jwa ba ba agileng mo go lone.

³⁵A fetole naga fela mogobe o o metsi, le lefatshe le le omeletseng metswedi ya metsi.

³⁶A agise ba ba bolailweng ke tlala gone, gore ba tle ba baakanye motse o o ka nnwang;

³⁷ba jale masimo, ba tlhome masimo a mafine, mme ba iponele maungo a totafalo.

³⁸Le gone a ba segofatse, ba tle ba nne ba ntsifale thata; mme a sa leseletse dikgomo tsa bone go ngobela.

³⁹Gape ba ngotlege, ba kokobediwe ka patiko, le tlalelo le bohutsana.

⁴⁰O gorometsa lonyatso mo dikgosaneng, a di pholethise mo dipoeng fela, kwa go se nang tsela gone.

⁴¹Le fa go ntse jalo, motlhoki o tle a mmeye kwa godimo kwa ntle ga pogiso, a mo dire ditshika jaaka letsomane.

⁴²Bathokgami ba tlaa go bona, ba itumela; mme boikepo jotlhe bo tlaa ithiba molomo wa jone.

⁴³Le fa e le bomang ba ba botlhale, ba tlaa ela dilo tse tlhoko, mme ba tlaa akanya mautlwelobotlhoko a ga Jehofa.