Psalms 111

¹Bakang Jehofa. Ke tlaa ntshetsa Jehofa malebogo ka pelo yotlhe ya me mo lekgotleng la bathokgami, le mo phuthegong.

²Ditiro tsa ga Jehofa di kgolo, di tlhotlhomisiwa ke botlhe ba ba kgatlhegang mo go tsone.

³Tiro ya gagwe ke tlotlo le borena, mme tshiamo ya gagwe e eme ka bosakhutleng.

⁴O dirile gore ditiro tsa gagwe tse di gakgamatsang di gakologelwe; Jehofa o pelotshweu, o tletse pelotlhomogi.

⁵Ba ba mmoifang o ba neile dijo; o tlaa nna a gakologelwa kgolagano ya gagwe ka gale.

⁶O supeditse batho ba gagwe thata ya ditiro tsa gagwe, ka go ba naya boswa jwa merafe.

⁷Ditiro tsa diatla tsa gagwe ke boammaaruri le tshiamiso; dikaelo tsotlhe tsa gagwe di tlhomame.

⁸Di tlhomamisitswe ka bosakhutleng le ka bosaengkae, di dirilwe mo boammaaruring le mo thokgamong.

⁹O iseditse batho ba gagwe kgololo; kgolagano ya gagwe o e laoletse ruri; leina la gagwe le boitshepo, le a sisimogwa.

¹⁰Go boifa Jehofa ke tshimologo ya botlhale botlhe ba ba dirang ka ga gone ba na le tlhaloganyo e e molemo; pako ya gagwe e eme ka bosakhutleng.