Psalms 114

¹E rile Iseraele a tswa mo Egepeto, le ntlo ya ga Jakobe mo bathong ba puo e sele,

²Juta a tla a nna felo ga gagwe ga boitshepo, le Iseraele bogosi jwa gagwe.

³Lewatle la go bona, la tshaba; Joretane a kgarametsegela kwa morago.

⁴Dithaba tsa ja mokaragana jaaka diphelefu, dithotana jaaka dikwanyana.

⁵O a bo o reng, wena lewatle fa e bo ne ne o tshaba jaana? Wena Joretane fa e bo ne ne o boela kwa morago jaana?

⁶Lona dithaba, lwa reng, ka e le fa lo ja mokaragana jaaka diphelefu? Lona dithotana jaaka dikwanyana?

⁷Roroma, wena lefatshe, fa pele ga Morena, fa pele ga Modimo wa ga Jakobe;

⁸yo o fetotseng lefika la nna mogobe wa metsi, le legakwa la nna motswedi wa metsi.