Psalms 129

¹A Iseraele a bue jaana, a re: “Ba sa le ba ntlhokofatsa gantsintsi, le mo bokaung jwa me go tla nakong eno;

²ba sa le ba ntlhokofatsa gantsintsi mo bokaung jwa me go tla nakong eno; le fa go ntse jalo ga ba ise ba mphenye.

³Balemi ba lemile mokotla wa me; ba lelefatsa meralo ya bone.”

⁴Jehofa o tshiamo, o kgaotse dikgole tsa baikepi.

⁵Botlhe ba ba ilang Sione a ba tlhajwe ke ditlhong, mme ba busediwe kwa morago.

⁶A ba nne jaaka bojang jo bo mo godimo ga matlo, jo bo omelelang bo ise bo gole;

⁷jo mokgetli o sa tlatseng seatla sa gagwe ka jone, le yo o bofang dingata o sa tlatseng sehuba ka jone;

⁸le ba ba fetang ga ba ke ba bua ba re: “Tshegofatso ya ga Jehofa e nne mo go lona; re lo segofatsa mo ineng la Jehofa.”