Tswana 1992 Bible - 11 verses
1Ntibela, Modimo; gonne ke ikanya mo go wena.
2Ke reile Jehofa ka re: “O Morena wa me; ga ke na molemo ope kwa ntle ga gago.”
3Ka ga baitshepi ba ba mo lefatsheng, ke bone batlotlegi bogolo, ba go itumela ga me gotlhe go leng mo go bone.
4Ba ba ananyang Jehofa ka modimo o sele, mahutsana a bone a tla ntsifadiwa; ditshupelo tsa bone tse di nowang tsa madi, ga nketla ke di isa, le fa e le go umaka maina a medimo ya bona ka dipounama tsa me.
5Jehofa ke kabelo ya boswa jwa me, le ya senwelo sa me; o emetse se ke se abetsweng.
6Melelwane e ntiteetse mo mafelong a mantle; ee, ke na le boswa jo bontle.
7Ke tla baka Jehofa, yo o nneileng kgakololo; ee, diphilo tsa me di a nthuta mo dipakeng tsa bosigo.
8Ke ntse ke tlhomile Jehofa fa pele ga me ka gale; e re ka a le ka fa tsogong la me le legolo, ga nketla ke tshikinyega.
9Ke gone ka mo pelo ya me e itumelang, le kgalalelo ya me e ipelang; nama ya me le yone e tlaa nna mo polokegong.
10Gonne ga o ketla o tlogelela Bobipo mowa wa me; le gone ga o ketla o lesa moitshepi wa gago a bona go bola.
11O tlaa ntshupetsa tsela ya botshelo; fa pele ga gago go na le letlotlo la boitumelo; mo seatleng sa gago se segolo go na le tse di jesang monate ka bosakhutleng.