Psalms 17

¹Utlwa e e leng tshiamo Jehofa, o tlhokomele go goa ga me; tsebe o e beele morapelo wa me o o sa tsweng mo dipounameng tse di ipatang.

²Go atlholwa ga me a go tswe mo go wena; matlho a gago a lebe ka tekatekanyo.

³O hukuditse pelo ya me; o ntekotse bosigo; o ntekile, mme ga o a fitlhela sepe; ke ikaeletse go re molomo wa me ga o ketla o tlola.

⁴Ka ga ditiro tsa batho, ke ithibile mo ditseleng tsa bathubaki ka lefoko la dipounama tsa gago.

⁵Dikgato tsa me di tshwere ditselana tsa gago ka thata, dinao tsa me ga di a relela.

⁶Ke bileditse koo go wena, gonne o tlaa nkaraba Modimo; sekegela tsebe ya gago kwa go nna, o utlwe puo ya me.

⁷Supa bopelonomi jwa gago jwa lorato jo bo tseanyang wena yo o dibelang ba ba go ikanyang, o ba dibele ka letsogo la gago le legolo mo go ba ba ba tsogologelang.

⁸Mpoloka jaaka thaka ya leitlho, o mphitlhe mo moriting wa diphuka tsa gago.

⁹O ntshubele baikepi ba ba nthopang, baba ba me ba ba bolayang ba ba ntikileng.

¹⁰Ba apesitswe ke mahura a bone; ba bua ka boikgogomoso ka melomo ya bone.

¹¹Ba re dikile jaanong mo dikgatong tsa rona; ba tlhoma matlho a bone gore ba re digele fa fatshe.

¹²O ntse jaaka tau e e bogagaru mo go se e se bolaileng, le jaaka ekete ledumedi le le lalelang mo mafelong a boiphitlho.

¹³Tloga o eme Jehofa, o mo kgatlhantshe, o mo dige; golola mowa wa me mo baikeping ka tšhaka ya gago;

¹⁴mo banneng, ka seatla sa gago, Jehofa, mo banneng ba lefatshe ba kabelo ya bone e leng mo botshelong jono, le ba o ba kgorisang mpa ka khumo ya gago; ba itumedisiwa ke go tshola bana, mme letlotlo le le setseng ba le tlogelele banyana ba bone ba bannye.

¹⁵Ka ga me, ke tlaa leba sefatlhogo sa gago mo tshiamong; ke tlaa itumedisiwa ke tshwano ya gago mogang ke tsogang.