Psalms 18

¹Ke a go rata Jehofa, thata ya me.

²Jehofa ke lefika la me, le kago ya me ya phemelo, le mogolodi wa me; Modimo wa me, lefika la me le le thata, ke tlaa ikanya mo go one; thebe ya me, le lonaka lwa poloko ya me, le kago ya me e e godileng ya tlhabanelo.

³Ke tlaa bitsa Jehofa yo o tshwanetsweng ke go bakwa; jalo ke tlaa bolokwa mo babeng ba me.

⁴Dikgole tsa loso di ne di ntsentse gare, le merwalela ya boikepo ya mpoifisa.

⁵Dikgole tsa Bobipo di ne di ntharile; dirai tsa loso tsa nkwela.

⁶Mo pitlaganong ya me ka bitsa Jehofa, ka goela Modimong wa me; a utlwa lentswe la me a le mo tempeleng ya gagwe e e boitshepo, selelo sa me fa pele ga gagwe sa mo tsena ka ditsebe.

⁷Foo lefatshe la reketla la roroma, metheo ya dithaba le yone ya suta ya reketla, ka gobo a le bogale thata.

⁸Ga kua mosi o tswa dinkong tsa gagwe, molelo o o tswang mo molomong wa gagwe wa laila; magala a tshubiwa ke one.

⁹Magodimo le one a a oba, a ba a fologa; lefifi le lentsho la bo le le fa tlase ga dinao tsa gagwe.

¹⁰A bo a palame tšheruba, a fofa; ee, a fofa ka bofefo mo diphukeng tsa phefo.

¹¹A dira lefifi felo ga gagwe ga maiphitlho, mogope wa gagwe ka fa ntlheng tsotlhe tsa gagwe; lefifi la metsi, maru a maima a legodimo.

¹²Ka go galalela mo go neng go mo eteletse pele, maru a gagwe a maima a feta, sefako le magala a molelo.

¹³le gone Jehofa a dumisa maru mo magodimong, Mogodimodimo a ntsha kodu; sefako le magala a molelo.

¹⁴A hula metswi ya gagwe a ba phatlalatsa; ee, dikgadima di le dintsi mme a ba phatlalatsa a ba alola.

¹⁵Foo meedi ya metsi ya bonala, metheo ya lefatshe le yone ya bipololwa, ka kgalemo ya gago, Jehofa, ka pudulo ya mowa wa dinko tsa gago.

¹⁶A roma a le godimong, a ntsaya; a ntshwatola mo metsing a magolo.

¹⁷A nkgolola mo mmabeng wa me yo o thata, le mo go ba ba nkidileng, gonne ba le thata bobe mo go nna.

¹⁸Ba ne ba nkwela godimo mo letsatsing la tatlhego ya me; mme Jehofa ya nna ene seitshwarelelo sa me.

¹⁹A nntshetsa kwa felong fa go atlhameng; a nkgolola, ka gobo a itumela thata mo go nna.

²⁰Jehofa o ne a ntuela ka fa tshiamong ya me; ka fa go itshepeng ga diatla tsa me o ntefetse.

²¹Gonne ke tshwere ditsela tsa ga Jehofa, le gone ga ke a kgaogana le Modimo wa me ka go ikepa.

²²Gonne dikatlholo tsotlhe tsa gagwe di ne di le fa pele ga me, mme ke se ka ka tlosa melao ya gagwe fa go nna.

²³Le gone ke ne ke le boitekanelo mo go ene, mme ka ithiba mo boikepong jwa me.

²⁴Ke gone ka moo Jehofa o ntefetseng ka fa tshiamong ya me, ka fa go itshepeng ga diatla tsa me mo matlhong a gagwe.

²⁵Yo o kutlwelobotlhoko o tlaa mo itshupetsa fa o le kutlwelobotlhoko; monna yo o boitekanelo o tlaa mo itshupetsa o le boitekanelo;

²⁶yo o itshekileng o tlaa mo itshupetsa o le boitsheko; yo o kgopo o tlaa mo itshupetsa fa o le lesoko.

²⁷Gonne o tlaa boloka batho ba ba patikwang; matlho a a kadileng o tlaa a bokalatsa.

²⁸Gonne o tlaa tshuba lobone lwa me; Jehofa Modimo wa me o tlaa bonesa lefifi la me.

²⁹Gonne ke sotlhomela lesomo ka wena; ke ba ke tlola lorako ka Modimo wa me.

³⁰Ka ga Modimo, tsela ya one e lekanetse; lefoko la ga Jehofa le lekilwe; ene ke thebe mo go bone botlhe ba ba mo ikanyang.

³¹Gonne yo e leng Modimo ke mang, fa e se Jehofa? Yo o leng lefika ke mang, fa e se Modimo wa rona?

³²E bong Modimo o o ntlamang ka nonofo, o bo o dire tsela ya me e nne boitekanelo.

³³O dira dinao tsa me go nna jaaka maoto a tshephe; mme o mpeye mo mafelong a me a a godimo.

³⁴O ruta diatla tsa me go tlhabana; mabogo a me a ba a tle a obe bora jwa kgotlho.

³⁵O bile o nneile le thebe ya poloka ya gago; letsogo la gago le le siameng le ntshegeditse, le bonolo jwa gago bo ntirile mogolo.

³⁶Dikgato tsa me o di atlhamoloseditse fa tlase ga me, dinao tsa me ga di a relela.

³⁷Ke tlaa khukhela baba ba me, ke ba tshwara; le gone ga nketla ke bowa go tsamaya ba nyelediwa pele.

³⁸Ke tlaa ba kgabuka, ba ba ba tla ba retelelwa ke go tsoga; ba tlaa wela fa tlase ga dinao tsa me.

³⁹Gonne o ntlamanyeditse tlhabano ka nonofo; bone ba ba neng ba ntsogologetse o ba khubamisitse fa tlase ga me.

⁴⁰Le gone o dirile gore baba ba me ba nneye mekotla gore ke tle ke kgaole ba ba nkilang.

⁴¹Ba ne ba goa, mme ga bo go se na ope yo o bolokang; le kwa go Jehofa, mme a se ka a ba araba.

⁴²Foo ka ba leta jaaka lorole fa pele ga phefo; ka ba gelolela kwa ntle jaaka seretse sa mebila.

⁴³O nkgolotse mo petapetanong tsa batho; o ntirile tlhogo ya merafe; sešaba se ke ntseng ke sa se itse se tlaa ntirela.

⁴⁴Ba tlaa re fela ba utlwa ga me, ba bo ba ineela fela mo go nna; baeng ba tlaa inkhubamisetsa.

⁴⁵Baeng ba tlaa kaologa, mme ba tlaa tla ba roroma, ba tswa mo dipharong tsa bone.

⁴⁶Jehofa o tshedile; a go bakwe lefika la me; a go godisiwe Modimo wa poloko ya me;

⁴⁷e bong Modimo o o mpusolosetsang, o ba o khubamisa batho fa tlase ga me.

⁴⁸O mphalodisa mo babeng ba me; ee, o a tle o nkgoleletse godimo ga ba ba ntsogologelang; o nkgolole mo mothong yo o thubakang.

⁴⁹Ke gone ka mo ke tlaa go ntshetsang malebogo, Jehofa, mo merafeng, ke tlaa opelela leina la gago dipako.

⁵⁰O naya kgosi ya gagwe kgololego e kgolo; o supetsa motlodiwa wa gagwe bopelonomi mo go Dafite le losika lwa gagwe go ya bosakhutleng.