Psalms 25

¹Ke tsholeletsa mowa wa me kwa go wena, Jehofa.

²Modimo wa me, ke ikantse mo go wena, a ke se tlhajwe ke ditlhong, a baba ba me ba se njele koma.

³Ee, mo go bone ba ba go lebeletseng, ga go na ope yo o tlaa tlhajwang ke ditlhong; go tlaa tlhajwa ke ditlhong bone ba ba dirang ka mooko ka bomo.

⁴Ntshupetsa metlhala ya gago Jehofa; o nthute ditsela tsa gago.

⁵Ntsamaisa mo boammaaruring jwa gago o bo o nthute; gonne ke wena Modimo wa poloko ya me; ke lebelela mo go wena ka letsatsi lotlhe.

⁶Jehofa, gakologelwa mautlwelobotlhoko a gago a manana, le mapelonomi a gago a lorato; gonne a ntse a le gone e sa le bogologolo.

⁷O se ka wa gakologelwa maleo a jale ke sa le lekau, le fa e le ditlolo tsa me; o nkgakologelwe ka fa bopelonoming jwa gago jwa lorato, ka ntlha ya molemo wa gago Jehofa.

⁸Jehofa o molemo le thokgamo; ke gone ka moo o tlaa rutang baleofi ka ga tsela.

⁹Ba ba pelonolo o tlaa ba tsamaisa mo tshiamisong; ba ba pelonolo o tlaa ba ruta tsela ya gagwe.

¹⁰Ditsela tsotlhe tsa ga Jehofa di bopelonomi jwa lorato le boammaaruri fela mo go bone ba ba bolokang kgolagano ya gagwe le ditshupo tsa gagwe.

¹¹Ka ntlha ya leina la gago Jehofa, o tle o itshwarele boikepo jwa me, gonne bo bogolo.

¹²Motho ke ofe yo o boifang Jehofa? Ke ene o tlaa mo rutang mo tseleng e o tlaa e itshenkelang.

¹³Mowa wa gagwe o tlaa aga o iketlile; losika lwa gagwe lo tlaa rua lefatshe.

¹⁴Maoma a ga Jehofa a na le ba ba mmoifang; mme o tlaa ba supetsa kgolagano ya gagwe.

¹⁵Matlho a me a ntse a lebile Jehofa fela ka gale; gonne o tlaa phamola dinao tsa me mo lotloeng.

¹⁶Retologela kwa go nna, o nkutlwele botlhoko; gonne ke swafetse, ke patikegile.

¹⁷Dikhuduego tsa pelo ya me di goletse pele; a o ko o nntshe mo dipitlaganong tsa me.

¹⁸Sekaseka patikego ya me le thekisego ya me; mme o itshwarele maleo a me otlhe.

¹⁹Sekaseka baba ba me, gonne ba bantsi; ba nkila ka kilo e e bolalome.

²⁰A ko o dibele mowa wa me, mme o nkgolole; a ke se ka ka tlhajwa ke ditlhong, gonne ke ikanya mo go wena.

²¹A botlhoka molato le thokgamo di mpoloke, gonne ke lebeletse mo go wena.

²²Modimo, golola Iseraele, o mo ntshe mo dikhuduegong tsotlhe tsa gagwe.