Psalms 30

¹Ke tlaa go godisa Jehofa; gonne o ntsholeditse, ga o a ka wa naya baba ba me gore ba itumele ka nna.

²Jehofa, Modimo wa me, ke go ikuetse, mme o mphodisitse.

³Jehofa, o tlhatlositse mowa wa me mo Bobipong; o ntse o ntshedisitse gore ke se ka ka fologela mo moleteng.

⁴Opelelang Jehofa dipako, lona baitshepi ba gagwe, ntshetsang leina la gagwe le le boitshepo malebogo.

⁵Gonne bogale jwa gagwe bo ema ka ponyo ya leitlho fela; mo tlhogonolofatsong ya gagwe go botshelo; go ka lala go le selelo bosigo, mme e re ka moso go bo go tle boitumelo.

⁶Ka ga me, e rile mo go kokotlegeleng ga me, ke buile, ka re: “Ga nketla ke ba ke tshikinyega gope.”

⁷Wena, Jehofa, ka botsalano jwa gago o tiisitse thaba ya me gore e eme e nne thata; o ne wa iphitlha sefatlhogo; ka fuduega.

⁸Ka kuela koo go wena, Jehofa; ka isa mekokotlelo kwa go Jehofa.

⁹“E tlaa re ke fologela mo moleteng, madi a me a tlaa bo a na le molemo ofe? A lorole lo tlaa go baka? A lo tlaa bolela boammaaruri jwa gago?

¹⁰Utlwa, Jehofa, o nkutlwele botlhoko; Jehofa a e nne wena mothusi wa me.”

¹¹Selelo sa me o se mphetoletse pino; o nkapotse letsela la kgetse, o ntlamile ka boitumelo;

¹²e le gore kgalalelo ya me e go opelele pako, mme e se ka ya didimala. Jehofa Modimo wa me, ke tlaa go leboga ka bosakhutleng.