Psalms 34

¹Ke tlaa baka Jehofa ka metlha yotlhe; pako ya gagwe e tlaa nna ka gale mo molomong wa me.

²Mowa wa me o tlaa ipelafatsa mo go Jehofa; ba ba pelonolo ba tlaa go utlwela, mme ba tlaa itumela.

³A ko lo godiseng Jehofa le nna, a re goletseng leina la gagwe mmogo.

⁴Ka batla Jehofa, mme a nkaraba, a nkgolola mo dipoifong tsa me tsotlhe fela.

⁵Ba ne ba leba kwa go ene, mme ba sa matlho; difatlhogo tsa bone ga di ketla di sosobagana gope.

⁶Mohumanegi yo, o ne a bitsa, mme Jehofa a mo utlwa, a mo golola mo ditlalelong tsotlhe tsa gagwe.

⁷Moengele wa ga Jehofa o thibelela mo ntlheng tsotlhe tsa ba ba mmoifang, mme o a ba golola.

⁸A ko lo lekeng lo bone fa Jehofa a le molemo; go sego monna yo o mo ikanyang.

⁹A ko lo boifeng Jehofa, lona baitshepi ba gagwe; gonne ga go na go tlhoka mo go ba ba mmoifang.

¹⁰Ditawana di a tle di tlhoke, di bolawe ke tlala; mme ba ba batlang Jehofa bone, ga ba ketla ba tlhoka sepe se se molemo.

¹¹Ntlong lo ntheetseng bana ke lona, ke tlaa lo ruta poifo ya ga Jehofa.

¹²Ke ofe motho yo o eletsang botshelo, a rata bontsi jwa malatsi, gore a tle a bone molemo?

¹³O kganele loleme lwa gago mo bosuleng le dipounama tsa gago mo go bueng tsietso.

¹⁴Tlogela bosula, mme o dire molemo; batla kagiso, mme o e latelele.

¹⁵Matlho a ga Jehofa a mo go ba ba mmoifang, le ditsebe tsa gagwe di kwa go goeng ga bone.

¹⁶Sefatlhogo sa ga Jehofa se bifetse ba ba dirang bosula, go nyeletsa go gopolwa ga bone mo lefatsheng.

¹⁷Basiami ba ne ba goa, mme Jehofa a utlwa, a ba golola mo ditlalelong tsotlhe tsa bone.

¹⁸Jehofa o gaufi le ba ba pelo e phatlogileng, o boloka ba ba mowa o o ngomogileng.

¹⁹Dipatikego tsa mosiami di dintsi; mme Jehofa o mo golola mo go tsone tsotlhe.

²⁰O boloka marapo otlhe a gagwe; ga go na lepe la one le le robegileng.

²¹Bosula bo tlaa bolaya moikepi; le ba ba ilang mosiami ba tlaa sekisiwa.

²²Jehofa o rekolola mowa wa batlhanka ba gagwe; mo go ba ba mo ikanyang ga go na bape ba ba tlaa bonwang molato.