Psalms 35

¹Jehofa, ganela le ba ba ganelang le nna; o tlhabane le ba ba tlhabanang le nna.

²Tsaya thebe le thejane, mme o nkemele go nthusa.

³Lerumo le lone o le somole, mme ba ba nkhukhelang o ba thibele tsela; o reye mowa wa me, o re: “Ke nna poloka ya gago.”

⁴Ba ba tsomang mowa wa me a ba tlhajwe ke ditlhong ba tlotlololwe; ba ba logang maano a go nkutlwisa botlhoko, a ba busediwe kwa morago, ba sosobaganngwe.

⁵A ba nne jaaka mmoko mo phefong, e be e nne moengele wa ga Jehofa yo o ba kgopholang.

⁶A tsela ya bone e nne lefifi le borethe, e le moengele wa ga Jehofa yo o ba khukhelang.

⁷Gonne ba ntshubetse lotloa lwa bone mo lehuting ka bomo; ba epetse mowa wa me lemena ka bomo.

⁸A tshenyego e mo wele a itebetse; a lotloa lwa gagwe lo o lo fitlhileng lo tshware ene ka esi; a a wele mo tshenyegong eo ka yosi.

⁹Mowa wa me o tlaa nna ka boitumelo mo go Jehofa; o tlaa itumela mo polokeng ya gagwe.

¹⁰Marapo a me otlhe a tlaa re: “Jehofa, mang yo o tshwanang nao? Yo o gololang mohumanegi mo go yo o thata bogolo go ene, ee, mohumanegi le motlhoki mo go ene yo o mo thukhuthang?”

¹¹Basupi ba ba sa siamang ba tle ba eme, ba mpotse ka ga dilo tse ke sa di itseng.

¹²Ba ntefela molemo ka bosula, ba thukhutha mowa wa me.

¹³Mme ka ga me, e rile ba le botlhoko, go apara ga me ya bo e le matsela a kgetse; ka patika mowa wa me ka go ikitsa go ja; morapelo wa me wa ba wa boela mo sehubeng sa me.

¹⁴Ka etsa jaaka ekete ke direla tsala ya me kgotsa ngwana wa ga rre; ka obega ka khutsafalo jaaka mongwe yo o lelelang mmaagwe.

¹⁵Nna e rile ke tlhotsa, bone ba itumela, ba ba ba phuthega mmogo; ba babenyana ba mphuthegela mmogo, mme ka bo ke sa itse; ba nkgagola ba se ka ba khutla,

¹⁶jaaka basotli ba ba matlhapa mo medirong, ba ntšhenetse meno.

¹⁷Jehofa o tlaa leba fela goleele go le kaye? Falodisa mowa wa me mo ditshenyong tsa bone; moratwanyana wa me mo ditaung.

¹⁸Ke tlaa go ntshetsa malebogo mo phuthegong e kgolo; ke tlaa go baka mo bontsing jo bogolo jwa batho.

¹⁹A ba e leng baba ba me ba se itumele ka nna ka mo go sa siamang; le gone ba ba nkilang ka bomo a ba se soke leitlho.

²⁰Gonne ga ba bue kagiso; ba baakanyetsa ba ba ntseng ba ituletse fela mo lefatsheng mafoko a tsietso.

²¹Ee, ba nkatlhamisetsa melomo ya bone thata; ba re: “Ahe! Ahe! Leitlho la rona le go bonye.”

²²Jehofa, wena o go bonye; o se ka wa didimala; Jehofa o se ka wa nna kgakala le nna.

²³Kubuga, o tsogele katlholo ya me, e bong go mo go sekwang ga me, Modimo wa me le Morena wa me.

²⁴Nkatlhola, Jehofa, Modimo wa me, ka fa tshiamong ya gago; a ba se itumele ka nna.

²⁵A ba se bue mo pelong ya bone ba re: “Ahe! Re rata ga nna jalo.” A ba se re: “Re mo komeditse.”

²⁶A ba tlhajwe ke ditlhong, ba sosobaganngwe mmogo ba ba itumelelang kutlobotlhoko ya me; a ba ba inkgodisetsang ba apesiwe ditlhong le tlotlologo.

²⁷Ba ba tshabang le nna ka ga mo ke go sekang ga tshiamo, a ba duduetse ka boitumelo; ee, a ba nne ba re ka gale: “A go goletsege Jehofa yo o kgatlhwang ke go kokotlegela ga motlhanka wa gagwe.”

²⁸Loleme lwa me lo tlaa bua ka ga tshiamo ya gago, le ka ga pako ya gago ka letsatsi lotlhe fela.