Psalms 36

¹Tlolo ya moikepi e bua mo pelong ya me, ya re: Ga go na poifo ya Modimo fa pele ga matlho a gagwe.

²Gonne o iphora mo matlhong a gagwe, a re, boikepo jwa gagwe ga bo ketla bo lemogwa, bo ilwa.

³Mafoko a molomo wa gagwe ke boikepo le tsietso fela; o baketse go nna botlhale le go dira molemo.

⁴O loga maano a boikepo mo bolaong jwa gagwe; o ipaya mo tseleng e e seng molemo; ga a feretlhwe ke bosula.

⁵Bopelonomi jwa gago jwa lorato Jehofa, bo kwa magodimong; boikanngo jwa gago bo fitlha kwa marung.

⁶Tshiamo ya gago e tshwana jaaka dithaba tsa Modimo; dikatlholo tsa gago ke lediba le le boteng jo bogolo; Jehofa, o tlamela batho le ditshedi.

⁷Ana bopelonomi jwa gago jwa lorato bo botlhokwa jang, Modimo! E bile bana ba batho ba tshabela mo moriting wa diphuka tsa gago.

⁸Monono wa ntlo ya gago ba tlaa o kgora thata; o tlaa ba nosa ka noka ya tse di natefang tsa gago.

⁹Gonne motswedi wa botshelo o ntse nao; mo leseding la gago re tlaa bona lesedi.

¹⁰A o ko o tsweleleletse bopelonomi jwa gago jwa lorato mo go ba ba go itseng; le tshiamo ya gago mo go ba ba dipelo di thokgameng.

¹¹A lonao lo lo mabela lo se tle fa go nna; a seatla sa moikepi se se nkgarametse.

¹²Gone ba ba dirang boikepo ba ole; ba gateletswe, mme ga ba ketla ba nonofa go tsoga.