Psalms 55

¹Sekegela morapelo wa me tsebe Modimo; o se ka wa iphitlhela mokokotlelo wa me.

²Nkela tlhoko, o nkarabe; ke tlabatlaba mo go itokeng ga me, ke a duma;

³ka ntlha ya lentswe la mmaba, ka ntlha ya patiko ya baikepi; gonne ba latlhela boikepo mo go nna, ba mpogisa ka bogale.

⁴Pelo ya me e tlhokofaditswe thata mo teng ga me; le ditheregiso tsa loso di nkwetse.

⁵Go boifa le go roroma go tsile mo go nna; le go tshoga mo go be go nkhurumeditse.

⁶Ka ba ka tla ka re: “Ija! Ke ka bo ke na le diphuka jaaka lephoi! Foo ke ne ke tlaa fofela koo, ke tsamaya ke nna kwa boikhutsong.

⁷Bonang, jalo ke ne ke tlaa timelela kgakala, ke ne ke tlaa nna nna mo nageng. Sela.

⁸Ke ne ke tlaa itlhaganelela botshabelonyana, ke tshaba matsubutsubu a phefo le ledimo.”

⁹Morena, senya, o fatole loleme lwa bone; gonne ke bonye go thubaka le go lwa mo motseng.

¹⁰Motshegare le bosigo ba dikologa mo dithakong tsa one; boikepo bo mo gare ga one le bosenyi.

¹¹Tshiamololo e mo gare ga one; patiko ga e tloge le boferefere mo mebileng ya one.

¹²Gonne yo o neng a nkgoba e ne e se mmaba; fa go ne go ntse jalo nka bo ke go itshoketse, le gone yo o neng a inkgodisetsa e ne e se yo o nkilang, fa go ne go ntse jalo nka bo ke mo iphitlhetse;

¹³mme e ne e le wena monna, molekane wa me, kala ya me, le tsala ya me e ke itsanyeng nayo.

¹⁴Re ne re tle re gakololane mmogo mo go monate, ra tsamaya mo ntlong ya Modimo re na le tshobokano ya batho.

¹⁵A ba welwe ke loso ka tshoganetso, a ba fologele mo moleteng ba sa ntse ba utlwa; gonne boikepo bo mo boagong jwa bone mo gare ga bone.

¹⁶Ka ga me, ke tlaa bitsa Modimo; mme Jehofa o tlaa mpoloka.

¹⁷Ke tlaa itoka, ke duma, maitseboa le ka moso, le motshegare, mme o tlaa utlwa lentswe la me.

¹⁸O golotse mowa wa me ka kagiso mo tlhabanong e e neng e mphenya; gonne ba ba lwang le nna ba ne ba le bantsi.

¹⁹Modimo o tlaa utlwa, o ba o ba patika, e bong one o o sa leng o nna bogologolo, Sela, ke go re, banna ba ba se nang diphetogo, mme ba boifa Modimo.

²⁰Ba ba neng ba agisantse nae monna yo, o ba ntsheditse mabogo go tlhabana nabo; o tlhapaditse kgolagano ya gagwe.

²¹Legano la gagwe le ne le le borethe jaaka mafura a serethe, pelo ya gagwe yone e ne e le ntwa fela; mafoko a gagwe a ne a gaisa lookwane ka boleta, le fa go ntse jalo e ne e le ditšhaka fela tse di ekilweng.

²²Latlhela morwalo wa gago mo go Jehofa, mme o tlaa go kokotletsa; ga a ketla a leseletsa mosiami gope go tshikinngwa.

²³Mme wena, Modimo, o tlaa ba folosetsa mo moleteng wa tshenyegelo; ba tsholola madi, le ba ba tsietsang, ga ba ketla ba tshela ba swetsa bontlha bongwe jwa malatsi a bone; mme nna ke tlaa ikanya mo go wena.