Psalms 66

¹Dudueletsa Modimo, ka modumo wa boitumelo, wena lefatshe lotlhe:

²Opelela godimo kgalalelo ya leina la one; galaletsa pako ya one.

³Raya Modimo o re: “Ana ditiro tsa gago di boitshega jang! Baba ba gago ba tlaa ineela mo go wena ka ntlha ya bogolo jwa thata ya gago.

⁴Lefatshe lotlhe le tlaa go obamela, le tlaa go opelela; ba tlaa opelela leina la gago.” Sela.

⁵Tlang, lo bone ditiro tsa Modimo; o a boitshega mo go direng ga one mo baneng ba batho.

⁶Lewatle o kile wa le fetola lefatshe le le omeletseng; ba ralala noka ka dinao; gone foo, ra itumela mo go one.

⁷O busa ka nonofo ya one ka bosakhutleng; matlho a one a tlhokometse merafe; a batsuolodi ba se ikgodise. Sela.

⁸A ko lo bakeng Modimo wa rona, lona ditšhaba, lo utlwatse lentswe la pako ya one;

⁹o o tshegeleditseng mowa wa rona mo botshelong, o bo o sa leseletse dinao tsa rona go tshikinyega.

¹⁰Gonne wena Modimo o re lekile; o re lekile jaaka selefera se tle se lekwe.

¹¹O ne wa re tlisa mo lotloeng; wa baya mokgweleo o o botlhoko mo dinokeng tsa rona.

¹²Ba ba pagameng o ba re tlodisitse godimo ga ditlhogo tsa rona; ra ralala molelo le metsi; wa re ntshetsa kwa felong fa go letlotlo.

¹³Ke tlaa tsena mo ntlong ya gago ka ditshupelo tsa phiso, ke tlaa go lefela maikano a me,

¹⁴a dipounama tsa me di a boletseng, le a molomo wa me o a buileng, jale ka ke le mo pitlaganong.

¹⁵Ke tlaa go isetsa ditshupelo tsa phiso, tsa tse di nonneng, di na le maswalo a diphelefu; ke tlaa isa dikgomo di na le dipodi tshupelo. Sela.

¹⁶Ntlong lo utlweng, lona lotlhe ba lo boifang Modimo, mme ke tlaa kakanya se o se diretseng mowa wa me.

¹⁷Ke ne ka tlhaeletsa kwa go one ka molomo wa me, wa ba wa bakwa thata ka loleme lwa me.

¹⁸Fa nkabo ke ne ka tsaya boikepo tsia mo pelong ya me, Jehofa o ne a tlaa se ke a reetse.

¹⁹Ruri Modimo o utlwile; o tsere lentswe la morapelo wa me tsia.

²⁰A go bakwe Modimo o o se kang wa faposa morapelo wa me, le fa e le boutlwelobotlhoko jwa one go bo faposa mo go nna.