Psalms 72

¹Naya kgosi dikatloholo tsa gago Modimo, le morwa kgosi o mo neye tshiamo ya gago.

²O tlaa atlhola batho ba gago ka tshiamo, le bahumanegi ba gago ka tshekatsheko.

³Dithaba di tlaa leretse batho kagiso, le dithabana, mo tshiamong.

⁴O tlaa atlhola bahumanegi ba batho, bana ba batlhoki o tlaa ba boloka, mme mopatiki o tlaa mo phatlakanya.

⁵Ba tlaa nna ba go boifa ka letsatsi le sa leyo, le kgwedi e sa leyo, mo ditshikatshikeng.

⁶O tlaa na jaaka pula e e nang bojang jo bo segilweng, jaaka medupe e e nosang lefatshe.

⁷Mo metlheng ya gagwe basiami ba tlaa thama; go tlaa nna letlotlo la kagiso, go tle go tsamaye kgwedi e tlhokafalele ruri.

⁸O bile o tlaa nna le puso go tswa lewatleng go ya lewatleng, le go tswa Nokeng go ya dikhutlong tsa lefatshe.

⁹Ba ba agileng mo dinageng ba tlaa obama fa pele ga gagwe; le baba ba gagwe ba tlaa latswa lorole.

¹⁰Dikgosi tsa Tarešiše le tsa ditlhake di tlaa tlisa dimpho; dikgosi tsa Sheba le Seba di tlaa isa dineo.

¹¹Ee, dikgosi tsotlhe di tlaa wela fa pele ga gagwe; merafe yotlhe e tlaa mo direla.

¹²Gonne o tlaa golola motlhoki mogang o lelang; le mohumanegi yo o se nang mothusi.

¹³O tlaa tlhomogela bahumanegi le batlhoki pelo; mme mewa ya batlhoki o tlaa e boloka.

¹⁴O tlaa golola mewa ya bone mo pogisong le mo thubakong; mme madi a bone a tlaa tlotlega mo matlhong a gagwe;

¹⁵mme ba tlaa tshela; ene o tlaa newa gouta ya Sheba; batho ba tlaa nna ba mo rapelela ka gale; ba tlaa mmaka ka letsatsi lotlhe.

¹⁶Go tlaa nna letlotlo la mabele mo lefatsheng, mo ditlhoeng tsa dithaba; loungo lwa one lo tlaa ebelega jaaka Lebanone; mme ba e leng ba motse ba tlaa kgaba jaaka bojang jwa lefatshe.

¹⁷Leina la gagwe le tlaa emela ruri ka bosakhutleng; leina la gagwe le tlaa nna le isiwa kwa pele ka letsatsi le sa leyo; batho ba tlaa segofala mo go ene; merafe yotlhe e tlaa mmitsa mosegofadiwa.

¹⁸A go bakwe Jehofa Modimo, Modimo wa Iseraele, yo o dirang dikgakgamatso a le esi;

¹⁹a go bakwe leina la gagwe le le galalelang ka bosakhutleng; mme a lefatshe lotlhe le tlale kgalalelo ya gagwe. A go nne jalo, fela jalo.

²⁰Merapelo ya ga Dafite Morwa Jese e khutlile.