Psalms 73

¹Ruri Modimo o molemo go Iseraele, e bong go ba ba itshekileng mo pelong.

²Ka ga me, dinao tsa me di batlile go ya, dikgato tsa me tsa batla go relela.

³Gonne e rile ke bona letlhogonolo la baitelaganyi ka nna pelotshetlha ka ga bone baikepi.

⁴Gonne ga go na dipitlagano mo losong lwa bone; mme thata ya bone e nitame fela.

⁵Ga ba mo tlalelong jaaka batho ba bangwe; le gone ga ba tshwenyege jaaka batho ba bangwe.

⁶Ke gone ka mo boikgodiso bo ba rarileng jaaka dibaga mo thamong; go thubaka go ba apesitse jaaka kobo.

⁷Matlho a bone a rotologile ka monono; ba na le mo go fetang keletso ya pelo.

⁸Ba a sotla mme ba bue patiko ba le mo bosuleng; ba bue ka boikgantsho.

⁹Ba nyunyubetsa magodimo; loleme lwa bone lo ralale lefatshe.

¹⁰Ke gone ka moo batho ba ga gabo ba tleng ba boele fa; mme metsi a senwelo se se tletseng a gopiwe ke bone.

¹¹Mme ba re: “Modimo o itse jang? A go na le kitso mo go Mogodimodimo?”

¹²Bona, bao ke bone baikepi; e re ka ba ntse ba le mo boiketlong ka metlha yotlhe, boo ba totelwa ke dikhumo.

¹³Ruri ke ntlafaleditse pelo ya me lefela, ka ba ka tlhapa diatla tsa me mo go se nang molato;

¹⁴gonne ke ntse ke tshwenyega ka letsatsi lotlhe, ka otlhaiwa ka meso yotlhe.

¹⁵Fa nkabo ke rile: “Ke tlaa bua jalo;” bona, nka bo ke diretse bana ba losika lwa gago ka boferefere.

¹⁶E rile ke akanya gore goo mo nka go itse jang, ga nna tapiso e e botlhoko mo go nna;

¹⁷ka tla ka tsamaya ka tsena mo felong ga boitshepo ga Modimo, mme ka akanya bofelelo jwa bone.

¹⁸Ruri o ba baya mo mareleding; o ba digela mo tshenyegong.

¹⁹Ana ba kile ba senyega jang ka ponyo ya leitlho fela! Ba jegetse ruri ka ditherego.

²⁰Jaaka toro fa motho a kubuga; le wena Morena, fa o kubuga, o tlaa nyatsa setshwano sa bone jalo.

²¹Gonne pelo ya me e ne e le botlhoko, mme ka tlhajwatlhajwa mo diphilong tsa me;

²²ka bo ke le popego ya sefolofolo fela mo go ntseng jaana, ke se na kitso; ka nna jaaka phologolo fela fa pele ga gago.

²³Le fa go ntse jalo ke ntse ke na nao ka metlha yotlhe; o ntse o tshwere seatla sa me se segolo.

²⁴O tlaa nketelela pele ka kgakololo ya gago, morago o tlaa nkamogela mo kgalalelong.

²⁵Ke na le mang kwa legodimong fa e se wena? Le mo lefatsheng ga go na ope yo ke mo eletsang fa e se wena.

²⁶Nama ya me e a fela, le pelo ya me; Modimo ke thata ya pelo ya me, le kabelo ya me ka bosakhutleng.

²⁷Gonne, bona ba ba leng kgakala nao ba tlaa nyelela; o sentse botlhe ba ba go tlogelang ba ya boakeng.

²⁸Mo go nna go molemo go atamela Modimo; ke dirile Morena Modimo botshabelo jwa me, gore ke tle ke bolele ka ga ditiro tsa gago tsotlhe fela.