Psalms 74

¹Modimo, o re latlheleletseng ruri? Bogale jwa gago bo tukelelang dinku tsa bohulo jwa gago?

²Gakologelwa phuthego ya gago, e o sa leng wa e reka bogologolo, e o e rekolotseng, gore e nne sešaba sa boswa jwa gago; le thaba ya Sione e o kileng wa aga mo go yone.

³Tsholeletsa dinao tsa gago kwa maropeng a a ntseng ka bosaengkae; kwa bosuleng jo mmaba o bo dirileng mo felong ga boitshepo.

⁴Baganetsi ba gago ba ntse ba bopa fa gare ga phuthego ya gago; ba tlhomile mekgele ya bone go nna ditshupo.

⁵Ba kile ba nna jaaka ekete ke batho ba ba ekelang sekgwa sa ditlhare dilepe.

⁶Jaanong dilo tse di kwadilweng ka botswerere ka go setwa, ba di thubaka ka seletswana le dinoto.

⁷Ba tshubetse felo ga gago ga boitshepo; ba itshepolotse boago jwa leina la gago, ka go bo digela fa fatshe.

⁸Mo pelong tsa bone ba rile: “A re di gasagaseng gotlhe fela;” ba jele matlo a thuto a otlhe a Modimo mo lefatsheng ka molelo.

⁹Ga re bone ditshupo tsa rona; ga go tlhole go na le moperofeti ope; le gone ga go na ope yo o itseng gore ke lobaka lo lo kaye.

¹⁰Modimo, kana moganetsi o tlaa nna a kgoba goleele go le kaye? A mmaba o tlaa nna a tlhapatsa leina la gago ka bosakhutleng?

¹¹O gonelang letsogo la gago, e bong letsogo la gago le le siameng? Le ntshe mo sehubeng sa gago o ba nyeletse.

¹²Le fa go ntse jalo, Modimo o ntse o le Kgosi ya me le mo bogologolong, o ntse o dira poloko mo gare ga lefatshe.

¹³O ne wa kgaoganya lewatle ka nonofo ya gago; wa thuba ditlhogo tsa dikgogela mo metsing.

¹⁴O thubagantse ditlhogo tsa kubu e tona, wa e naya batho ba ba ntseng mo nageng go e ja.

¹⁵O ne wa fatoganya motswedi le morwalela; wa kgadisa dinoka tse dikgolo thata.

¹⁶Motshegare ke wa gago, bosigo le gone ke jwa gago; o baakantse lesedi le letsatsi.

¹⁷O tlhomile dithoko tsotlhe tsa lefatshe; o dirile selemo le mariga.

¹⁸Gakologelwa mo, Jehofa, go re mmaba o kgobile, le go re batho ba ba dieleele ba tlhapaditse leina la gago.

¹⁹O se ka wa neela sebatana mowa wa lephoi la gago; o se ka wa lebala botshelo jwa bahumanegi ba gago ka bosakhutleng.

²⁰Tlhokomela kgolagano, gonne mafelo a a lefifi a lefatshe a tletse maago a thubakanyo.

²¹A bapatikwi ba ke ba se ka ba bowa ka ditlhong; a bahumanegi le batlhoki ba bake leina la gago.

²²Modimo, nanoga o ipuelele mo kgannyeng ya gago; gakologelwa ka fa motho wa seeleele o tlholang a go kgoba ka letsatsi lotlhe ka teng.

²³O se ka wa lebala lentswe la baganetsi ba gago; tlhapeo ya ba ba go tsogologelang e tlhatloga ka gale le ka gale.