Psalms 78

¹Lona batho ba me, beelang molao wa me tsebe; sekegelang mafoko a molomo wa me tsebe.

²Ke tlaa tswa molomo ka setshwantsho; ke tlaa wela dipolelo tse di lotobo tsa bogologolo,

³tse re di utlwileng, ra di itse, tse borraetsho ba di re boleletseng.

⁴Ga re ketla re di lobela bana ba bone, ka re tlaa bolelela losika lo lo tlang dipako tsa ga Jehofa, le thata ya gagwe, le ditiro tsa gagwe tse di gakgamatsang tse o di dirileng.

⁵Gonne o ne a tlhoma tshupo mo go Jakobe, a baya molao mo go Iseraele, o o o laoletseng borraetsho gore ba tle ba itsise bana ba bone dilo tse;

⁶gore losika lo lo tlang lo di itse, e bong bana ba ba tlaa tsalwang; ba ba tlaa tlogang ba ba ba di bolelela bana ba bone;

⁷gore ba tlhome tsholofelo ya bone mo Modimong, ba se ka ba lebala ditiro tsa Modimo, mme ba boloke ditaolo tsa one;

⁸gore ba se nne jaaka borraabo, ba e neng e le losika lo lo tlhogo e thata, le lwa borukhutlhi; e le losika lo lo sa tlhomang pelo ya lone ka tshiamo, lo mowa wa lone o sa emang sentle le Modimo.

⁹Bana ba ga Eferaime, e rile ba tlhometse dibolao ba bile ba sikere mara, ba menoga ba tshaba mo letsatsing la tlhabano.

¹⁰Ga ba a ka ba boloka kgolagano ya Modimo, ba gana go tsamaya mo molaong wa one;

¹¹ba lebala ditiro tsa one, le ditiro tse di gakgamatsang tse o neng o di ba bontshitse.

¹²Ke dilo tse di tseanyang, tse o di dirileng mo ponong ya borraabone, mo lefatsheng la Egepeto, le mo nageng ya Soane.

¹³O ne wa fatoganya lewatle, wa ba kgabagantsha; wa emisa metsi a nna jaaka mokoa fela.

¹⁴Le gone motshegare wa nna wa ba goga ka leru, le bosigo jotlhe ka lesedi la molelo.

¹⁵Wa fatola mafika mo nageng fela, wa ba nosa thata jaaka mo madibeng a a boteng.

¹⁶O ne wa phunya metlhodi le yone mo lefikeng, wa eledisa metsi jaaka dinoka.

¹⁷Le fa go ntse jalo ba tswelela pele fela go o leofela, go tsuololela Mogodimodimo mo loboeng lwa naga.

¹⁸Ba leka Modimo mo pelong tsa bone, ka go lopela keletso ya bone dijo.

¹⁹Ee, ba ne ba nyatsa Modimo, ba re: “A Modimo o ka baakanya lomati lwa bojelo mo nageng?”

²⁰Ba re: “Bona, o ne wa itaya lefika, metsi a ba a phothometsega le meelelo ya penologa; a bogobe le jone a o ka bo ntsha? A o tlaa etleeletsa batho ba one nama?”

²¹Ke gone ka foo Jehofa a utlwa, mme a nna bogale thata; molelo wa tshubelwa Jakobe, bogale le jone jwa tsogela Iseraele;

²²ka gobo ba se ka ba dumela Modimo, le fa e le go ikanya poloka ya one.

²³Le fa go ntse jalo wa laola maru kwa godimo, wa bula dithoba tsa legodimo;

²⁴mme wa ba nesetsa mana go a ja, wa ba naya mabele a legodimo.

²⁵Motho a ja bogobe jwa bathata; wa ba gorosetsa dijo tsa go kgorwa.

²⁶Wa fokisa phefo ya botlhabatsatsi mo loaping; wa tsamaisa phefo ya borwa ka thata ya one.

²⁷Nama le yone wa e ba nesetsa jaaka lorole, le dinonyane tse di diphuka jaaka mošawa wa lewatle.

²⁸Wa e usetsa fa gare ga bothibelelo jwa bone, mo tikologong ya manno a bone.

²⁹Jalo ba ja, mme ba kgora thata; wa ba naya se ba se eleditseng.

³⁰E rile ba ise ba tenwe ke keletso ya bone, nama e sa ntse e le mo maganong a bone,

³¹bogale jwa Modimo jwa ba tsogela, jwa bolaya ba ba nonneng bogolo mo go bone, ja ba jwa thubanyetsa makau a Iseraele fa fatshe.

³²Le fa go dirile jaana, ba fela ba leofela pele fela, ba sa dumele ditiro tse di gakgamatsang tsa one.

³³Ka ntlha ya moo wa sweletsa malatsi a bone ka lefela, le dinyaga tsa bone ka therego.

³⁴Ya re fa o ba bolaya, ya dira gone ba botsang ka ga one; mme ba bowe ba batle Modimo go sa le gale.

³⁵Ba gakologelwe fa Modimo e le lefika la bone; le go re Modimo wa Mogodimodimo ke Morekolodi wa bone.

³⁶Ba o tsoatsoa ka molomo wa bone, ba o akela ka loleme lwa bone.

³⁷Gonne pelo ya bone e ne e sa siamela one; le gone ba ne ba sa ikanyega mo kgolaganong ya one.

³⁸Mme one, ka o tletse pelotlhomogi, wa itshwarela boikepo jwa bone, wa se ka wa ba senya; ee, wa faposa bogale jwa one gantsi, mme wa se ka wa tsosa tšhakgalo yotlhe ya one.

³⁹Wa ba gakologelwa fa ba le nama fela; ba le phefo e e fetang, mme e se ke e be e boye.

⁴⁰Ba ne ba o tsuololela gantsintsi jang mo nageng! Ba o hutsafatsa mo difoleng tsa naga!

⁴¹Ba ba ba menoga gape, ba leka Modimo, ba rumola Moitshepi wa Iseraele.

⁴²Ga ba a ka ba gakologelwa seatla sa one, le fa e le letsatsi le o ba golotseng mo moganetsing ka lone.

⁴³Ka fa o tlhomileng ditshupo tsa one mo Egepeto ka gone, le dikgakgamatso mo nageng ya Soane;

⁴⁴wa fetola dinoka tsa bone madi, le dinokana tsa bone, ba ba ba retelelwa ke go nwa.

⁴⁵Wa ba tsosetsa metshitshi ya dintshi, tsa ba ja; le digwagwa tsa ba senya.

⁴⁶Le loato lwa dilo tsa bone wa lo neela diboko; le tsa letsapa la bone wa di neela tsie.

⁴⁷Wa senya mafine a bone ka sefako, le ditlhare tsa bone tsa masekamore ka kgogotshwane.

⁴⁸Dikgomo tsa bone le tsone wa di neela sefako, le matsomane a bone wa a neela tladi ya tlapana e e molelo.

⁴⁹Wa ba piriganyetsa go tuka ga bogale jwa one, tšhakgalo, le kgalefo le tlalelo, e le lesomo la barongwa ba bosula.

⁵⁰Wa phunyetsa bogale jwa one tsela; wa se ka wa rekegela mowa wa bone mo losong, wa neela kgogodi botshelo jwa bone;

⁵¹wa gaila bana ba batsalwapele botlhe ba Egepeto, tshimologo ya thata ya bone mo megopeng ya ga Hame;

⁵²mme batho ba e leng ba one, bone wa ba gogela ntle jaaka dinku, wa ba wa ba tsamaisa mo nageng jaaka letsomane fela.

⁵³Wa ba goga ka polokego, go tla ba se ka ba boifa; baba ba bone, lewatle la ba ribegetsa.

⁵⁴Wa ba fitlhisa mo molelwaneng wa felo ga one ga boitshepo, mo thabeng eno, e seatla sa one se segolo se e rekileng.

⁵⁵Merafe le yone wa e leleka fa pele ga bone, wa e aba ka thapo go nna boswa, mme wa tsenya ditso tsa Iseraele, tsa nna mo megopeng ya yone.

⁵⁶Le fa go ntse jalo Modimo Mogodimodimo ba o leka, ba o tsuololela fela, mme ba se ka ba boloka ditao tsa one;

⁵⁷mme ba boela kwa morago, ba dira ka mooko jaaka borraabo; ba fapoga jaaka bora jo bo kgopameng.

⁵⁸Gonne ba ne ba o tlhotlheletsa bogaleng ka mafelo a bone a a tlotlometseng, ba o tsenya lefufa ka ditshwantsho tse di setilweng tsa bone.

⁵⁹E rile Modimo o utlwa wa nna bogale thata, wa fedisiwa pelo fela ke Iseraele;

⁶⁰wa ba wa tla wa tlogela motlaagana wa Shilo, mogope o o o tlhomileng mo bathong;

⁶¹thata ya one wa e tsenya mo botshwarweng, le kgalalelo ya one wa e tsenya mo seatleng sa moganetsi.

⁶²Batho ba one wa ba neela tšhaka; le gone wa nna bogale thata le boswa jwa one.

⁶³Molelo wa laila makau a bone; barweetsana ba bone le bone ba se ka ba dirana le pina ya nyalo.

⁶⁴Baperesiti ba bone ba wa ka tšhaka, mme batlholagadi ba bone ba se ka ba dira selelo sepe.

⁶⁵Foo Morena a tsoga jaaka mongwe yo o tswang borokong, jaaka monna yo o thata fa a goisiwa ke bojalwa jwa mofine.

⁶⁶A phailela baganetsi ba gagwe kwa morago; a ba dira sekgobo sa metlha yotlhe.

⁶⁷Gape a gana mogope wa ga Josefe, a se ka a itshenkela lotso lwa ga Eferaime;

⁶⁸a itshenkela lotso lwa ga Juta, e bong thaba ya Sione e o e ratang.

⁶⁹A aga felo ga gagwe ga boitshepo jaaka ditlhora tsa dithaba fela; jaaka lone lefatshe le o le emiseditseng ruri ka bosakhutleng.

⁷⁰Le gone a itshenkela Dafite motlhanka wa gagwe; a mo tsaya a le mo marakaneng a dinku;

⁷¹a mo tlosa mo go saleng dinku tse di amusang morago; a tla go otla Jakobe, batho ba gagwe, le Iseraele boswa jwa gagwe.

⁷²Jalo a ba otla ka fa thokgamong ya pelo ya gagwe, a ba tsamaisa ka botswerere jwa diatla tsa gagwe.