Psalms 79

¹Ao Modimo, ba ditšhaba ba tsile mo bosweng jwa gago; ba tsentse tempele ya gago e e itshepileng leswe; ba beile Jerusalema diphikwephikwe fela.

²Ditoto tsa batlhanka ba gago ba di dirile dijo tsa dinonyane tsa loapi; nama ya baitshepi ba gago ba e neile dibatana tsa lefatshe.

³Madi a bone ba a tsholotse jaaka metsi mo ntlheng tsotlhe tsa Jerusalema; mme go ne go se na ope yo o ba fitlhang.

⁴Re ntse sekgobo fela mo go bagarona; re lesotlo le setshego mo go ba ba ntlheng tsotlhe tsa rona.

⁵E tlaa nna lobaka lo lo kaye, Jehofa? A o tlaa nna bogale ka bosakhutleng? A lefufa la gago le tlaa nna le tuka jaaka molelo fela?

⁶Gorometsa bogale jo bogolo jwa gago mo go baditšhaba ba ba sa go itseng, le mo magosing a a sa bitseng leina la gago.

⁷Gonne ba jele ba laila Jakobe, ba bile ba beile boago jwa gagwe kgakgabalo fela.

⁸O se ka wa gakologelwa maikepo a borraetsho ba bogologolo go re sekisa ka one; a mapelonomi a gago a manana a re tlele pele ka bonako; gonne re ile kwa tlase thata.

⁹Re thuse Modimo wa poloko ya rona ka ntlha ya kgalalelo ya leina la gago, o re golole; tlhatswa o tlose dibe tsa rona, ka ntlha ya leina la gago.

¹⁰Ana baditšhaba ba tlaa bo ba buelang ba re: “Modimo wa bone o kae?” A tefiso ya madi a a tsholotsweng a batlhanka ba gago e itsiwe mo go baditšhaba, mo ponong ya rona.

¹¹A go fegelwa ga mogolegwi go fitlhe koo fa pele ga gago; ka fa bogolong jwa thata ya gago a ko o boloke ba ba laoletsweng go swa;

¹²ba re bapileng nabo o ba neye mo dihubeng tsa bone gasupa, kgobo ya bone e ba go kgobileng ka yone, Morena.

¹³Jalo rona batho ba re leng ba gago, re leng dinku tsa bofulo jwa gago, re tlaa go ntshetsa malebogo ka bosenabokhutlo; pako ya gago re tlaa e bonaletsa pele mo tshikatshikeng tsotlhe.